މާލޭގެ ފެނުގެ ޚިދުމަތުގެ ފެންވަރު ރަނގަޅުކުރުމުގެ މަޤްޞަދުގައި މާލޭ ވޯޓަރ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ) އިން ކުރިއަށްގެންދާ، ޖުމްލަ 26،000 ކިއުބިކް މީޓަރުގެ ފެން ރައްކާކުރެވޭ ތާނގީތައް ބެހެއްޓުމުގެ މަސައްކަތުގެ ތެރެއިން ބިންގަލުގެ ބައި ފަށައި، ހަލުވި ދުވެއްޔެއްގައި ކުރިއަށްދާ ކަމަށް އެ ކުންފުނިން ހާމަކޮށްފިއެވެ.

މި މަޝްރޫޢުގެ ދަށުން މާލޭގައި އަޅަނީ ކޮންމެ އެއްޗެއްގައި 13،000 ކިއުބިކް މީޓަރުގެ ޖާގަ ހުންނަ ދެ ތާނގީއެވެ. މިއީ މާލޭގައި ދިރިއުޅޭ މީހުންނަށް ދެމެހެއްޓެނިވި ގޮތެއްގައި ސާފު ފެން ފޯރުކޮށްދިނުމުގެ ކުޅަދާނަކަން ފުޅާކުރުމަށް އެޅޭ ވަރަށް މުހިންމު ފިޔަވަޅެކެވެ.

އެމްޑަބްލިއުއެސްސީން މަޢުލޫމާތު ދީފައިވާ ގޮތުގައި، މި ދުވަސްވަރު ކުރިއަށްދަނީ މި ތާނގީތައް ބަހައްޓާ ފައުންޑޭޝަން ހެދުމުގެ މަރުޙަލާއެވެ. އެގޮތުން ދަގަނޑު އެތުރުމާއި، ކަވަރު ބްލޮކް ޖެހުމާއި، ދަގަނޑު ލެނބުމުގެ އިތުރުން ސްޓީލް ފެބްރިކޭޝަންގެ މަސައްކަތްތައް އަންނަނީ ކުރަމުންނެވެ. އަދި ބިންގަލުގައި ދަގަނޑު އެޅުމުގެ މަސައްކަތުގެ 60 އިންސައްތަ މިހާރު ވަނީ ފުރިހަމަކުރެވިފައެވެ.

އިޝްތިހާރު އިޝްތިހާރު

މި ބޮޑު މަޝްރޫޢު އެއްކޮށް ނިމުމުން، ވެރިރަށް މާލޭގައި ފެން ރައްކާކޮށް ބެހެއްޓޭ މިންވަރަށް ބޮޑު ކުރިއެރުމެއް ލިބޭނެއެވެ. ނަތީޖާއެއްގެ ގޮތުން، ކުއްލި ދަނޑިވަޅުތަކުގައާއި އާންމު ހާލަތުގައިވެސް، ހުއްޓުމެއްނެތި ރައްޔިތުންނަށް ފެނުގެ ޚިދުމަތް ލިބިދިނުން ކަށަވަރުކުރުމަށް އެ ކުންފުންޏަށް ބޮޑު ލުޔެއް ލިބިގެންދާނެއެވެ.