މެރިކާގެ ޖޯޖިއާ ސްޓޭޓުގެ ތާރީޚުގައި ފުރަތަމަ ފަހަރަށް އެ ސްޓޭޓުގެ ގަވަރުނަރުކަމަށް ކަޅުނަސްލުގެ އަންހެން ބޭފުޅަކު އިންތިޚާބުވެ، ކީޝާ ލާންސް ބޮޓޮމްސް އާ ރެކޯޑެއް ޤާއިމުކުރައްވައިފިއެވެ. ކުރީގެ ރައީސް ޖޯ ބައިޑަންގެ އިސް މުޝީރެއްގެ ގޮތުގައި ޚިދުމަތްކުރެއްވި ބޮޓޮމްސް މި މަޤާމު ކާމިޔާބުކުރެއްވީ ރިޕަބްލިކަން ޕާޓީގެ ކެންޑިޑޭޓް ރިކް ޖެކްސަންގެ މައްޗަށް ކުރި ހޯއްދަވައިގެންނެވެ. މިއީ އެމެރިކާގެ މުޅި ތާރީޚުގައި ވެސް ކަޅުނަސްލުގެ އަންހެނަކު ގަވަރުނަރު ކަމަށް ހޮވުނު ފުރަތަމަ ފަހަރެވެ.

މަޤްބޫލު ރިޕަބްލިކަން ގަވަރުނަރު ބްރަޔަން ކެމްޕްގެ ބަދަލުގައި އެ ގޮނޑި ކާމިޔާބުކުރެއްވުމަށް ރިޕަބްލިކަން ޕާޓީން ވާދަކުރެއްވި ބިލިއަނަރު ރިކް ޖެކްސަން ވަނީ އޭނާގެ އަމިއްލަ މުދަލުން 200 މިލިއަނަށް ވުރެ ގިނަ ޑޮލަރު ކެމްޕޭނަށް ހޭދަކުރައްވާފައެވެ. އެހެންނަމަވެސް، އެޓްލާންޓާގެ ކުރީގެ މޭޔަރު ބޮޓޮމްސް ވަނީ އޭނާގެ މައްޗަށް ކާމިޔާބީ ހޯއްދަވާފައެވެ. އެކަމަނާއަށް މި ލިބިވަޑައިގެންނެވި "ބޮޑު ނަޞީބު" ގައި އެންމެ އިސް ދައުރެއް އަދާކުރީ، ކުރީބައިގައި ވޯޓުދިނުމުގެ ތެރޭގައި އެ ސްޓޭޓުގެ ކަޅުނަސްލުގެ ރައްޔިތުން ނުކުމެ ދިން ވަރުގަދަ ތާއީދެވެ.

ކެމްޕޭނުގެ މުއްދަތުގައި، ބޮޓޮމްސް މޭޔަރުކަން ކުރެއްވި ދުވަސްވަރު އެޓްލާންޓާގައި ކުށްކުރުން އިންތިހާއަށް އިތުރުވެ، އެ ސިޓީގެ ޙާލަތު ބޮއްސުންލައިގެން ދިޔަ ކަމަށް ދައްކުވައިދިނުމަށް ރިޕަބްލިކަނުން ވަރަށް ބޮޑަށް މަސައްކަތްކުރިއެވެ.

އިޝްތިހާރު އިޝްތިހާރު

މިކަމާ ގުޅިގެން އެސޯސިއޭޓެޑް ޕްރެސް (އޭޕީ) އަށް މަޢުލޫމާތު ދެއްވަމުން ބޮޓޮމްސް ފާހަގަކުރެއްވި ގޮތުގައި، އެޓްލާންޓާއަކީ ނުރައްކާތެރި، ގޯސް ތަނެއްގެ ގޮތުގައި ސިފަކުރުމަކީ އިދިކޮޅު ފަރާތްތަކުން އަބަދުވެސް ބޭނުންކުރަމުން އަންނަ އުކުޅެކެވެ.

ޖޯޖިއާގެ ޑިމޮކްރެޓުން ގަވަރުނަރު ކަމަށް ވިދިވިދިގެން ތިންވަނަ ފަހަރަށް ކަޅުނަސްލުގެ އަންހެނަކު ނެރުނުއިރު، މީގެ ކުރިން 2018 އަދި 2022 ވަނަ އަހަރު ސްޓޭސީ އަބްރަމްސް ވަނީ ކެމްޕް އަތުން ނާކާމިޔާބީއާ ކުރިމަތިލައްވަން ޖެހިވަޑައިގެންފައެވެ. ދައުރު ހަމަވުމާ ގުޅިގެން، އަށް އަހަރުގެ ވެރިކަމަށްފަހު ގަވަރުނަރު ކެމްޕް އަންނަ ޖެނުއަރީ މަހު މަޤާމުން ވަކިވެވަޑައިގަންނަވާނެއެވެ.