ފުވައްމުލައް ސިޓީގެ ފެނުގެ ޚިދުމަތް އިތުރަށް ހަރުދަނާކުރުމުގެ ގޮތުން ދުވާލަކު 350 ޓަނުގެ ފެން އުފެއްދޭ އިތުރު އާރޯ (އާރް.އޯ) ޕްލާންޓެއް އެ ސިޓީއަށް ގެންގޮސްފިއެވެ.
އެމްޑަބްލިއުއެސްސީ ގެ މެނޭޖިންގ ޑިރެކްޓަރ ޙުސައިން ފަހުމީ އެކްސްގައި ކުރެއްވި ޕޯސްޓެއްގައި ވިދާޅުވީ، މި އާރޯ ޕްލާންޓް އޮޕަރޭޝަނަށް ގެނައުމާއެކު، ފުވައްމުލަކުގައި ފެން އުފެއްދުމުގެ ޤާބިލުކަން ގާތްގަނޑަކަށް 90 އިންސައްތަ އިތުރުވެގެންދާނެ ކަމަށެވެ.
މީގެ ސަބަބުން ރަށުގެ ރައްޔިތުންނަށް މެދުކެނޑުމެއްނެތި، އިތުބާރާއެކު ރައްކާތެރި ބޯފެން ފޯރުކޮށްދިނުމަށް އެ ކުންފުނިން ވެފައިވާ ވަޢުދު އިތުރަށް ވަރުގަދަވެގެންދާނެ ކަމަށް އޭނާ ފާހަގަކުރެއްވިއެވެ.
ފެނަކަ ކޯޕަރޭޝަނުން ބަލަހައްޓަމުން ގެންދިޔަ އައްޑޫ ސިޓީ (ހުޅުދޫ އަދި މީދޫ ހިމެނޭހެން) އާއި ފުވައްމުލައް ސިޓީގެ ފެނާއި ނަރުދަމާގެ ޚިދުމަތްތައް އެމްޑަބްލިއުއެސްސީން ރަސްމީކޮށް ހަވާލުވެފައިވަނީ މި އޮކްޓޫބަރު މަހުގެ 1 ވަނަ ދުވަހުއެވެ. މި ބަދަލު ގެނައުމަށްޓަކައި އެމްޑަބްލިއުއެސްސީ އާއި ފެނަކަ ކޯޕަރޭޝަނާ ދެމެދު ވަނީ ޚާއްޞަ ފްރޭމްވޯކް އެއްބަސްވުމެއް އެކުލަވާލައި ސޮއިކޮށްފައެވެ. އަދި އެ އެއްބަސްވުމުގެ ދަށުން ދެ ސިޓީގެ އިންފްރާސްޓްރަކްޗަރ ބަދަލުކުރުމުގެ މަސައްކަތް މިހާރު ވަނީ ފުރިހަމައަށް ނިމިފައެވެ.
އެމްޑަބްލިއުއެސްސީން މަޢުލޫމާތު ދޭގޮތުގައި، ޚިދުމަތް ބަދަލުވަމުންދާ މަރުޙަލާގައިވެސް އެއްވެސް މެދުކެނޑުމެއްނެތި ރައްޔިތުންނަށް ޚިދުމަތް ފޯރުކޮށްދިނުމަށް އެ ކުންފުނިން ދަނީ އިސްކަންދެމުންނެވެ. އަދި މި ނިޒާމުތައް އިތުރަށް ހަރުދަނާކޮށް، ފެންވަރު ރަނގަޅު ޚިދުމަތެއް ކަށަވަރުކޮށްދިނުމަށްޓަކައި މިހާތަނަށް ހަދާފައިވާ ފަންނީ އެސެސްމަންޓްތަކަށް ބިނާކޮށް، އައްޑޫ އަދި ފުވައްމުލަކު ސިޓީގެ ޚިދުމަތްތައް އަޕްގްރޭޑްކުރުމަށާއި، އޮޕަރޭޝަނަލް ހިންގުން ހަރުދަނާކުރުމުގެ ޢަމަލީ މަސައްކަތްތައް މިހާރުވެސް ބާރަށް ކުރިއަށްދާ ކަމަށް އެ ކުންފުނިން ބުނެއެވެ.
ކިޔުންތެރިންގެ ހިޔާލު