އިދިކޮޅު މައި ޕާޓީ، އެމްޑީޕީގެ ކޮންގްރެސް އިފުތިތާހުކުރުމަށް މިރޭ ބާއްވާ ޚާއްޞަ ޖަލްސާގައި ވެރިކަންކުރާ ޕީއެންސީގެ ފަރާތުން އެ ޕާޓީގެ ނައިބު ރައީސް އަދި ފިޝަރީޒް މިނިސްޓަރު އަޙްމަދު ޝިޔާމް ބައިވެރިވެވަޑައިގެންފިއެވެ.
މިއީ އެމްޑީޕީގެ ކޮންގްރެސްގެ ހަރާތްތައް ރަސްމީކޮށް ފެށުމުގެ ގޮތުން ބާއްވާ އިފުތިތާހީ ޖަލްސާއެވެ. މީގެކުރިން ޕީއެންސީގެ ކޮންގްރެސް ފެށުމުގެ ރަސްމިއްޔާތުގައި އެމްޑީޕީގެ ފަރާތުން ބައިވެރިވެވަޑައިގަތީ އެ ޕާޓީގެ ޗެއާޕާސަން އަދި ކުރީގެ ރައީސް މުޙައްމަދު ނަޝީދެވެ.
މިރޭ ބޭއްވި އިފުތިތާހީ ޖަލްސާގައި އެމްޑީޕީގެ ޗެއާޕާސަން މުޙައްމަދު ނަޝީދުގެ އިތުރުން ކުރީގެ ރައީސް އިބްރާހީމް މުޙައްމަދު ޞާލިޙް ވާހަކަފުޅު ދެއްކެވިއެވެ.
އިފުތިތާހީ ޖަލްސާއަށްފަހު މާދަމާ އިންވެސްޓްމަންޓް ފޯރަމް އޮންނައިރު، ކޮންގްރެސްގެ ރަސްމީ މަސައްކަތްތައް ފެށުމަށް ހަމަޖެހިފައިވަނީ ހޮނިހިރު ދުވަހުއެވެ. މި މަސައްކަތްތަކުގެ ތެރޭގައި އެމްޑީޕީގެ އަސާސީ ގަވާއިދަށް އިޞްލާޙު ގެނައުމާއި، ޕާޓީއަށް ގެންނަ ބޮޑެތި ބަދަލުތަކާ ގުޅޭ ގަރާރުގެ އިތުރުން ލާމަރުކަޒީ ނިޒާމާ ގުޅޭ ގަރާރަށް ބަހުސްކޮށް ގޮތް ނިންމުން ހިމެނެއެވެ.
އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ޑެޕިއުޓީ ޗެއާޕާސަން އިބްރާހީމް ވަހީދު ވިދާޅުވީ، ކޮންގްރެސްއަށް ވަރަށް ބޮޑު ތަރުހީބެއް ލިބެމުންދާ ކަމަށާއި މިހާތަނަށް ނުވަސަތޭކަ އައްޑިހައަށްވުރެ ގިނަ ބައިވެރިން ރަޖިސްޓްރީވެފައިވާ ކަމަށެވެ.
އިލެކްޝަންސް ކޮމިޝަނުގެ ދަފްތަރުން ދައްކާ ގޮތުގައި ފަންސާސް ފަސްހާސް ތިންސަތޭކަ ނުވަދިހަ ނުވަ މެންބަރުންނާއެކު އެމްޑީޕީއަކީ މިވަގުތު ރާއްޖޭގައި އޮތް ދެވަނައަށް އެންމެ މެންބަރުން ގިނަ ސިޔާސީ ޕާޓީއެވެ.
ކިޔުންތެރިންގެ ހިޔާލު