އެމެރިކާއާ އެކު މަޝްވަރާ އީރާނުން ކުރިއަށް ގެންދާނެ ކަމަށް އީރާނުގެ ރައީސް މަސްއޫދު ޕެޒެޝްކިއާން ވިދާޅުވެއްޖެއެވެ.
އީރާނުގެ ރައީސް މިފަދައިން ވިދާޅުވީ، ތެހެރާނުގައި ވިޔަފާރިވެރިންގެ ބަޔަކާ ބައްދަލު ކުރައްވައި ވާހަކަ ދައްކަވަމުންނެވެ.
އީރާނުގެ ރައީސް ވިދާޅުވީ، މަޝްވަރާތަކުގެ ތެރޭގައި އެމެރިކާއިން ތިން ފަހަރުމަތިން އީރާނަށް ހަމަލާދިން ނަމަވެސް އެމެރިކާއާ މަޝްވަރާ ކުރުމާ އީރާނު ދުރަށް ނުޖެހޭނޭ ކަމަށެވެ. އަދި މަޝްވަރާ ކުރުން އީރާނުން ހުއްޓާނުލާނޭ ކަމަށްވެސް ވިދާޅުވިއެވެ.
ޖޫންމަހުގެ ތެރޭގައި އީރާނާއެކު އިސްލާމްއާބާދު އެމްއޯޔޫގައި ސޮއި ކުރުމަށްފަހުވެސް އެމެރިކާއިން އީރާނަށް ހަމަލާދިންކަން އީރާނުގެ ރައީސް ފާހަގަ ކުރެއްވިއެވެ.
އީރާނުގެ ވިޔަފާރީގެ ދާއިރާއާ ގުޅުންހުރި ހުރިހާ މައްސަލަތައް ހައްލުކުރުމަށް ސަރުކާރުން ސީރިއަސް މަސައްކަތްތަކެއް ކުރަމުންގެންދާ ކަމަށްވެސް މަސްއޫދު ޕެޒެޝްކިއާން ވިދާޅުވިއެވެ.
އެކަމަށްޓަކައި ދައުލަތުގެ ވެރިންގެ މެދުގައި ރަނގަޅު ކޯޑިނޭޝަނެއް އޮތުމުން އެންމެންވެސް މަސައްކަތް ކުރަމުންދަނީ މައްސަލަތަކާއި ގޮންޖެހުންތައް ހައްލުކުރުމަށް ކަމަށް ވިދާޅުވިއެވެ.
ކަނޑުމަގުން ހުރަސްތަކެއް ދިމާވެފައި އޮތް ނަމަވެސް، އެއްގަމުމަގުން ޕާކިސްތާން، އިރާގު، ތުރުކުމެނިސްތާން އަދި އަޒަރުބައިޖާން މެދުވެރިކޮށް އިމްޕޯޓް-އެކްސްޕޯޓް ފުޅާކުރުމަށް އީރާނުން މަސައްކަތް ކުރަމުންދާ ކަމަށްވެސް އީރާނުގެ ރައީސް ވިދާޅުވިއެވެ.
އެމެރިކާގެ ބްލޮކޭޑްގެ ސަބަބުންނާއި، އެމެރިކާއިން އަޅަމުންދާ ދަތިކުރުމުގެ އައު ފިޔަވަޅުތަކުގެ ސަބަބުން އީރާނަށް އެކަމުގެ މާލީ ގެއްލުންތަކާ ދަނީ ކުރިމަތިވަމުންނެވެ.
ހޮރްމޫޒު މުޅިން ހުޅުވާލުމާ ގުޅޭގޮތުން އީރާނުން ހުށަހެޅި ޕްލޭނަށް އެމެރިކާ ސަރުކާރުގެ ރަސްމީ ޖަވާބު އިއްޔެ ދީފައި ވާއިރު، އެ ޖަވާބު އީރާނު ސަރުކާރުން މިހާރު ގެންދަނީ ރިވިއު ކުރަމުންނެވެ.
ޕާކިސްތާނާއި ގަތަރު އަދި މިސްރާއި ތުރުކީފަދަ ގައުމުތަކުން ގެންދަނީ އީރާނު-އެމެރިކާ ހަނގުރާމައާއި، ކުރިމަތިލުންތައް ހުއްޓުވައި ދެ ފަރާތް ސުލްހައިގެ މޭޒުދޮށަށް ގެނެސް ދާއިމީ ސުލްހައިގެ އެއްބަސްވުމެއް ހެދުމަށް މަސައްކަތް ކުރަމުންނެވެ.
ކިޔުންތެރިންގެ ހިޔާލު