ވ. އާރަށް މައްސަލާގައި ކުރީގެ ރައީސް ޢަބްދުﷲ ޔާމީންގެ މައްޗަށް ދައުވާކުރާ މައްސަލަތަކާ ގުޅޭ މައްސަލަތަކެއް ސުޕްރީމް ކޯޓުގައ އޮތުމުން ކްރިމިނަލް ކޯޓުގައި މަޑު ޖައްސާލާފައިވާ ޝަރީޢަތްތައް ފަށައިފިއެވެ.
ވ.އާރަށް ކުއްޔަށްދިނުމުގެ މުއާމަލާތުތައް ހިންގުމުގައި ޚިޔާނާތްތެރިވިކަމުގެ ތުހުމަތު ސާބިތުވެ، 2022 ވަނަ އަހަރުގެ ޑިސެންބަރު މަހުގެ 25ވަނަ ދުވަހު، ކުރީގެ ރައީސް ޔާމީންގެ މައްޗަށް ކްރިމިނަލް ކޯޓުން 11 އަހަރުގެ ޖަލުހުކުމެއް ވަނީ އިއްވާފައެވެ. އެ ހުކުމް ބާތިލްކޮށް އަލުން މައްސަލަ ބެލުމަށް ހައިކޯޓުން ޙުކުމްކުރީ، 18 އެޕްރިލް 2024ގައެވެ. މި މައްސަލަ އަލުން ބަލާއިރު ދައުލަތުން ހުށަހަޅާފައިވާ އާ ހެކިތައް ބަލައި ނުގަތުމަށް ހައިކޯޓުން ނިންމާފައި ވާތީ ދައުލަތުން ވަނީ އެމައްސަލަ ސުޕްރީމް ކޯޓުގައި އިސްތިއުނާފްކޮށްފައެވެ.
އެ މައްސަލާގައި ސުޕްރީމް ކޯޓުން ވަނީ އާރަށު މައްަލާގައި ރައީސް، ޢަބްދުﷲ ޔާމީން ޢަބްދުލްޤައްޔޫމްގެ މައްޗަށް ދައުލަތުން އުފުލާފައިވާ ދައުވާތަކާއި ގުޅިގެން އަލަށް ހުށަހެޅި ހެކިތައް ބަލައިނުގަތުމަށް ހައިކޯޓުން ނިންމި ނިންމުމަށް ސުޕްރީމް ކޯޓުން ވަނީ ތާއީދުކޮށްފައެވެ.
ސުޕްރީމް ކޯޓުން ގޮތެއް ކަނޑައެޅިފަހުން އާރަށު މައްސަލައިގެ އަޑުއެހުމެއް ކްރިމިނަލް ކޯޓުގައި މިއަދަށް ވަނީ ފުރަތަމަ ފަހަރަށް ތާވަލުކޮށްފައެވެ. އެ އަޑުއެހުން ކުރިއަށްދާއިރު އޭގައި އޮތީ ޝަރީޢަތުގެ ކުރިން ހުށައަޅާ ހުށައެޅުންތަކާ ގުޅޭގޮތުން ވާހަކަ ދެއްކުމެވެ.
މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރްސީ މެދުވެރިކޮށް ހިންގައިފައިވާ ޚިޔާނާތުގައި ހިމެނޭ، ރ. ފުއްގިރީގެ މުއާމަލާތް ހިންގުމުގައި ނުފޫޒު ބޭނުން ކުރައްވައިގެން ރިޝްވަތު ނެންގެވި ކަމަށް ކުރީގެ ރައީސް ޔާމިންގެ މައްޗަށް ވަނީ ތުހުމަތުކުރެވިފައެވެ. މި މައްސަލައިގައި ކްރިމިނަލް ކޯޓުން ރައީސް ޔާމީންގެ މައްޗަށް 11 އަހަރުގެ ޖަލު ހުކުމެއް 2022 ވަނަ އަހަރު އިއްވާފައިވީ ނަމަވެސް، ހައި ކޯޓުން އެ މައްސަލަ ބެލުމަށްފަހު އަލުން އެ މައްސަލަ ބެލުމަށް ކްރިމިނަލް ކޯޓަށް އަންގާފައިވެއެވެ.
އެ މައްސަލައަކީ އެމްއެމްޕީއާރްސީ މެދުވެރިކޮށް ދައުލަތަށް ލިބެންޖެހޭ ފައިސާ، އެސްއޯއެފްގެ އެކައުންޓަކަށް ޖަމާވުމުން، އެ ފައިސާ ރައީސް ޔާމީންގެ އެކައުންޓަކަށް ޖަމާކޮށްފައިވާ މައްސަލައެކެވެ. އެ މައްސަލާގެ ޝަރީއަތް ކްރިމިނަލް ކޯޓުގައި މިހާރުވެސް މިހާރު ކުރިއަށްދެއެވެ.
މީގެއިތުރުން، ކުރީގެ ރައީސް ޔާމީނާއި އެންޓި ކޮރަޕްޝަން ކޮމިޝަން އާއިއެކު ހަދާފައިވާ އެސްކްރޯ އެކައުންޓްގައި ހުރި އެއް މިލިއަން ޑޮލަރު ހޯދުމަށް އެ މަނިކުފާނު ދައުވާ ކުރައްވާ މައްސަލަ އެއް ހައިކޯޓުގައި ކުރިއަށްގެންދެއެވެ.
ކިޔުންތެރިންގެ ހިޔާލު