ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ މައްޗަށް ދައުލަތުން އުފުލާފައިވާ ދެ މައްސަލައެއްގެ އަޑުއެހުންތައް ގިނަ މަސްތަކަކަށް ފަހު މި މަހުގެ ފަހުކޮޅު ބޭއްވުމަށް ކްރިމިނަލް ކޯޓުން ތާވަލުކޮށްފިއެވެ.
އެ ކޯޓުން ތާވަލުކޮށްފައި ވަނީ އެމްއެމްޕީއާރުސީ މެދުވެރިކޮށް ވ. އާރަށާއި ރ. ފުއްގިރި ކުއްޔަށް ދިނުމުގެ މުއާމަލާތްތަކުގައި ރިޝްވަތު ނެންގެވުމާއި މަނީ ލޯންޑަރ ކުރެއްވި ކަމަށް ތުހުމަތުކޮށް އުފުލާފައިވާ މައްސަލަތަކުގެ އަޑުއެހުންތަކެވެ.
ކްރިމިނަލް ކޯޓުގެ އޮފިޝަލަކު ވިދާޅުވިގޮތުގައި ރ. ފުއްގިރި މައްސަލައިގެ އަޑުއެހުން މި މަހުގެ 23 ވާ ބުދަ ދުވަހަށް ތާވަލުކޮށްފައިވާއިރު، ވ. އާރަށުގެ މައްސަލައިގެ އަޑުއެހުން ތާވަލުކޮށްފައި ވަނީ މި މަހުގެ 29 ވަނަ ދުވަހަށެވެ.
ވ. އާރަށުގެ މައްސަލަ ކްރިމިނަލް ކޯޓުގައި ކުރިއަށް ނުގެންގޮސް މަޑުޖައްސާލީ އެ މައްސަލައިގައި ދައުލަތުން ހުށަހެޅި އާ ހެކިތަކެއް ބަލައިނުގަތުމަށް ހައި ކޯޓުން ކުރި ހުކުމް ދައުލަތުގެ ފަރާތުން ސުޕްރީމް ކޯޓުގައި އިސްތިއުނާފު ކުރުމުންނެވެ. އެ އިސްތިއުނާފީ މައްސަލައިގައި ސުޕްރީމް ކޯޓުން ނިންމާފައި ވަނީ ހައި ކޯޓުގެ ނިންމުމަށް ތާއީދުކޮށް އެ ހެކިތައް ބަލައިނުގަނެވޭނެ ކަމަށެވެ.
އޭގެ އިތުރުން ރ. ފުއްގިރި މައްސަލައިގެ އަޑުއެހުންތަކެއް ނިމުނު އަހަރުގެ ފަހުކޮޅު ބޭއްވުމަށް ފަހު އިތުރު އަޑުއެހުމެއް ބޭއްވިފައެއް ނުވެއެވެ. އެ މައްސަލައިގައި ހިމެނޭ ސަން ސިޔާމްގެ ދެ ކުންފުނީގެ މައްޗަށް ކުރި ދައުވާ ސާބިތުނުވާ ކަމަށް ކްރިމިނަލް ކޯޓުން ހުކުމްކޮށްފައިވާއިރު، ކްރިކް އަހުމަދު ރިޒާގެ މައްޗަށް ކުރި ދައުވާ ދައުލަތުން ވަނީ އަނބުރާ ގެންގޮސްފައެވެ.
ކިޔުންތެރިންގެ ހިޔާލު