މިނިސްޓްރީ އޮފް އިންފްރާސްޓްރަކްޗާ، ހައުސިން އެންޑް އާބަން ޑިވެލޮޕްމަންޓުގެ ރަސްމީ ލިޔެކިޔުންތަކެއް ހުރި ލޮކަރުތަކެއް އޮންނަ އުސޫލުގެ ބޭރުން ހުޅުވާފައި ހުރި ކަމަށް ބުނެ ހުށަހެޅި މައްސަލައަކާ ގުޅިގެން ފުލުހުން އެތަން ބެލިއިރު އެއްވެސް ލިޔުމެއް މަދުވެފައި ނުވާކަން ޔަގީންވެފައިވާ ކަމަށް ދިވެހި ފުލުހުންގެ ޚިދުމަތުން ބުނެފިއެވެ.
ފުލުހުން ނެރުނު ބަޔާނެއްގައި ބުނީ އިއްޔެ ރޭގެ ވަގުތެއްގައި މި މައްސަލަ ހުށަހެޅުމާ ގުޅިގެން ފުލުހުންގެ ޓީމެއް އެ ވުޒާރާއަށް ގޮސް މައްސަލަ ބަލައި ފާސްކޮށްފައިވާ ކަމަށެވެ. އެގޮތުން ފުލުހުންގެ ހާޒިރުގައި އެ ވުޒާރާގެ މުވައްޒަފުން ލިޔެކިޔުންތައް ބަލައި ޗެކްކުރިއިރު، އެއްވެސް ލިޔުމެއް ނުވަތަ އެހެން އެއްޗެއް ވެސް މަދުވެފައި ނުވާކަން ވަނީ ކަށަވަރުކުރެވިފައެވެ.
ހައުސިން މިނިސްޓްރީ ހިންގަމުން އައި އިމާރާތުގައި ހިނގި އަލިފާނުގެ ހާދިސާއަށް ފަހު، އެ މިނިސްޓްރީގެ މަސައްކަތްތައް މިހާރު ވަގުތީ ގޮތުން ހިންގަމުން ދަނީ ދަރުބާރުގޭގައެވެ.
އެ މިނިސްޓްރީގެ އޮފިޝަލަކު މައުލޫމާތު ދެއްވި ގޮތުގައި، ހުޅުވައިގެން ހާވާފައި ހުރީ މުވައްޒަފުން ދުވަހުން ދުވަހަށް ގެންގުޅޭ ލިޔެކިޔުންތައް އަޅަން ބޭނުންކުރާ، ތަޅުނުލާ ހުންނަ ލޮކަރުތަކެކެވެ.
ކިޔުންތެރިންގެ ހިޔާލު