ކުޑަ އިންޓްރެސްޓް ރޭޓެއްގައި ބޯހިޔާވަހިކަމަށް ފައިސާ ދޫކުރާ “ހިޔާވެހި” ފައިނޭންސިން ސްކީމުގެ ދަށުން މިހާތަނަށް 244 މީހަކަށް ލޯނު ދޫކޮށްފައިވާއިރު، އިތުރު 629 މީހަކަށް ކުރިއަށް އޮތް މަސް ދުވަހުގެ ތެރޭގައި ލޯނު ދޫކުރައްވާނެ ކަމަށް ހައުސިން މިނިސްޓްރީގެ ސްޓޭޓް މިނިސްޓަރު އަހުމަދު ނާޒިމް މުހައްމަދު ވިދާޅުވެއްޖެއެވެ.
މިދިޔަ އަހަރުގެ އޭޕްރީލް މަހުގެ 30 ގެ ނިޔަލަށް އެ ސްކީމަށް ހުށަހެޅި 2،256 އެޕްލިކޭޝަންގެ ތެރެއިން އެކި މަރުހަލާތަކަށް ފަހު 891 ފޯމެއް ބަލައިގެންފައިވާ ކަމަށް ސްޓޭޓް މިނިސްޓަރު ނާޒިމް ފާހަގަކުރެއްވި އެވެ. އަދި އަމާޒަކީ މި އަހަރުގެ ނިޔަލަށް އެ ހުރިހާ ފަރާތްތަކަށް ލޯނު ދޫކޮށް ނިންމުން ކަމަށްވެސް އޭނާ ވިދާޅުވިއެވެ.
ދައުލަތުގެ މީޑިއާ، ޕަބްލިކް ސާވިސް މީޑިއާ (ޕީއެސްއެމް) ގެ “ރާއްޖެމިއަދު” ޕްރޮގްރާމުގައި ވާހަކަދައްކަވަމުން ނާޒިމް ވިދާޅުވީ، ޕްރޮގްރާމަށް ހޮވި ފައިސާ ދޫނުކޮށް ތިބި 629 މީހުންނަށް ކުރިއަށް އޮތް މަހެއްގެ ތެރޭގައި ފައިސާ ދޫކުރުމުގެ މަސައްކަތް ދަނީ ކުރަމުންނެވެ. އެ މަސައްކަތް ލަސްވުމަށް ދިމާވި މައިގަނޑު ސަބަބަކީ ފައިސާ ދޫކުރުމުގެ އުސޫލުތަކާއި އިޖުރާއަތްތައް ފުރިހަމަކުރުމަށް ގިނަ ވަގުތުތަކެއް ހޭދަވުން ކަމަށް އޭނާ ވިދާޅުވިއެވެ.
އެގޮތުން ގޭގެ ކުރެހުމުގައި ވިޔަފާރި ބޭނުމަށް ކަނޑައެޅޭނީ 20 އިންސައްތަ ކަމަށް އޮތް ނަމަވެސް، ބައެއް ފަރާތްތަކުން އެއަށްވުރެ ބޮޑަށް ހުށަހަޅާފައިވުމާއި ބީއޯކިއު އަގު ލޯނުގެ އަދަދަށްވުރެ ބޮޑުވުން ފަދަ ކަންކަން އިސްލާހުކުރަން ޖެހުނު ކަމަށް ނާޒިމް ވިދާޅުވި އެވެ. އެ ކަންކަން ހައްލުކުރުމަށް މިނިސްޓްރީ އާއި ބޭންކުތަކާއި ފޯމު ހުށަހެޅި ފަރާތްތަކުގެ މެދުގައި ގިނަ މަސައްކަތްތަކެއް ކުރަންޖެހުނު ކަމަށްވެސް އޭނާ ފާހަގަކުރެއްވިއެވެ.
ހިޔާވެހި ސްކީމުގެ ދަށުން ލޯނު ދޫކުރަނީ މައިގަނޑު ތިން ކެޓަގަރީއަކަށް ބަހާލައިގެންނެވެ. އެއީ ހުރިހާ ރަށަކަށް އަމާޒުކޮށްގެން ދޫކުރާ 1 މިލިއަން ރުފިޔާގެ “ރަށްވެހި” ސްކީމާއި، އާބަން ސަރަހައްދުތަކަށް ދޫކުރާ 3 މިލިއަން ރުފިޔާގެ “ސަހަރު” ސްކީމުގެ އިތުރުން މާލެ ސަރަހައްދަށް ދޫކުރާ 6 އިން 10 މިލިއަން ރުފިޔާގެ “ފަހިމާލެ” ސްކީމެވެ. މިހާތަނަށް ރަށްވެހި ސްކީމުން 363 އެޕްލިކޭޝަން، ސަހަރު ސްކީމުން 438 އެޕްލިކޭޝަން އަދި ފަހިމާލެ ސްކީމުން 40 އެޕްލިކޭޝަން ވަނީ އެޕްރޫވްވެފައެވެ.
ބޭންކް އޮފް މޯލްޑިވްސް (ބީއެމްއެލް) އާއި އެޗްޑީއެފްސީ އަދި އެމްއައިބީ ގުޅިގެން އިސްލާމީ އުސޫލުން 5 އިންސައްތައިގެ ފައިދާގައި ކުރިއަށްގެންދާ މި ސްކީމުން ލޯނު އަނބުރާ ދެއްކުމަށް 25 އަހަރުގެ މުއްދަތެއް ލިބެއެވެ. އަދި ރަށްވެހި ސްކީމުގައި އިކުއިޓީ ބަހައްޓަން ނުޖެހޭއިރު، ސަހަރު ސްކީމަށް 5 އިންސައްތަ އަދި ފަހިމާލެ ސްކީމަށް 10 އިންސައްތައިގެ އިކުއިޓީއެއް ބަހައްޓަންޖެހެ އެވެ.
އަހަރަކު 2 ބިލިއަން ރުފިޔާ ދޫކުރުމަށް ނިންމާފައިވާ މި ޕްރޮގްރާމްގެ ކާމިޔާބީ ފާހަގަކުރައްވަމުން، ކުރިއަށް އޮތް ދެ މަސް ދުވަހުގެ ތެރޭގައި މިފަދަ އިތުރު މަޝްރޫއެއް އިފްތިތާހުކުރެވޭނެ ކަމަށްވެސް ސްޓޭޓް މިނިސްޓަރު ވަނީ ވިދާޅުވެފައެވެ.
ކިޔުންތެރިންގެ ހިޔާލު