ސަރުކާރުގެ ބޯހިޔާވަހިކަމުގެ މަޝްރޫޢުގެ ދަށުން ފުލެޓާއި ގޯއްޗަށް އެދި ހުށަހަޅާފައިވާ ފޯމުތަކުގެ ތެރެއިން މަޢުލޫމާތު ފުށުއަރާ ފަރާތްތަކަށް ބޯހިޔާވަހިކަން ޕޯޓަލް މެދުވެރިކޮށް އަންގަން ފަށައިފިއެވެ.
މިކަން ހާމަކުރެއްވީ ދައުލަތުގެ މީޑިއާގެ ޕްރޮގްރާމެއްގައި ވާހަކަދައްކަވަމުން ހައުސިން މިނިސްޓްރީގެ ސްޓޭޓް މިނިސްޓަރު އަޙްމަދު ނާޒިމް މުޙައްމަދުއެވެ. އޭނާ ވިދާޅުވީ ރާއްޖޭގެ ހުރިހާ ކައުންސިލްތަކާއި އިދާރާތަކުގައި ހުރި ގޯތިގެދޮރުގެ ރަޖިސްޓްރީއާ ގުޅޭ މަޢުލޫމާތުތައް މިހާރު އެއްކުރެވިފައިވާ ކަމަށެވެ.
އޮޓޮމޭޓެޑް ސިސްޓަމެއްގެ ތެރެއިން މައުލޫމާތު ފުށުއަރާ ފަރާތްތަކަށް ޖަވާބުދާރީވުމަށް ހަތް ދުވަހުގެ މުއްދަތެއް ދެއެވެ. އެ މުއްދަތުގެ ތެރޭގައި ޕޯޓަލް މެދުވެރިކޮށް ޖަވާބު ނުދީފިނަމަ މަޢުލޫމާތު ރަނގަޅުކުރުމުގެ ފުރުޞަތު ބަންދުވާނެއެވެ.
މި މަސައްކަތަށް އެހީތެރިވުމަށްޓަކައި ދަރުބާރުގޭގައި ކޯލް ސެންޓަރެއް އަދި ހައުސިން މިނިސްޓްރީގައި ހެލްޕް ޑެސްކެއް ވަނީ ގާއިމުކޮށްފައެވެ. ރަސްމީ ބަންދު ނޫން ކޮންމެ ދުވަހަކު ހެނދުނު 9:00 އިން މެންދުރުފަހު 3:00 އަށް ކޯލް ސެންޓަރުގެ ޚިދުމަތް ލިބޭނެއެވެ.
ސަރުކާރުގެ ބޯހިޔާވަހިކަމުގެ މަޝްރޫޢަށް ޖުމްލަ 58,585 ފޯމު ވަނީ ހުށަހަޅާފައެވެ. ސަރުކާރުގެ އަމާޒަކީ ވެރިފިކޭޝަން މަސައްކަތްތައް އަވަހަށް ނިންމައި އަންނަ ޑިސެމްބަރު މަހުގެ ތެރޭގައި ދާއިމީ ލިސްޓު ޢާއްމުކުރުމެވެ.
ކިޔުންތެރިންގެ ހިޔާލު