ފުލުހުންގެ އެންޓި ސްކޭމް ސެންޓަރުން ތަހުގީގުކުރަމުންދާ މައްސަލައެއްގައި ސުވާލުކުރުމަށް، ސ. ހިތަދޫ، ކަށިސުތުލިގެ، އުމުރުން 46 އަހަރުގެ މުޙައްމަދު ޢިމާދު ހޯދަން އިއުލާނުކޮށްފިއެވެ.
ފުލުހުން މައުލޫމާތު ދީފައިވާ ގޮތުގައި އޭނާ ހޯދަން އިއުލާނުކުރީ އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް އަންގާ ޗިޓު ރައްދުކުރެވިފައި ނުވާތީއެވެ. ޖިނާއީ މައްސަލަތައް ތަހުގީގުކުރުމުގައި ފުލުހުން އަމަލުކުރާނެ އިޖުރާއަތުގެ ގަވާއިދުގެ ދަށުން ނެރުނު މި އިއުލާނުގައިވާ ގޮތުން އޭނާ ހާޒިރުކުރެވެނީ މައްސަލައިގެ ތުހުމަތުގައި ސުވާލުކުރުމަށެވެ.
މުޙައްމަދު ޢިމާދު ހާޒިރުވާން އަންގާފައިވަނީ އަންނަ ބުރާސްފަތި ދުވަހުގެ ހެނދުނު 10:00 އިން 12:00 އަށް، ސާޖަންޓު އާދަމް ޙަލީމް ކްރިމިނަލް އިންވެސްޓިގޭޝަން ބިލްޑިންގަށެވެ.
ރާއްޖޭގައި މާލީ މުއާމަލާތްތަކާ ގުޅޭ ސްކޭމްގެ މައްސަލަތައް އިތުރުވަމުންދާތީ، އެފަދަ މައްސަލަތައް ތަހުގީގުކުރުމަށް ފުލުހުން ވަނީ ހާއްސަ އެންޓި ސްކޭމް ސެންޓަރެއް ގާއިމުކޮށްފައެވެ. މި ސެންޓަރުން ދަނީ މަކަރާއި ހީލަތުން ފައިސާ ހޯދާ މައްސަލަތައް ތަހުގީގުކޮށް، އާންމުން ހޭލުންތެރިކުރުމަށް ފުޅާ ދާއިރާއެއްގައި މަސައްކަތްކުރަމުންނެވެ. ފަހަކަށް އައިސް ތަފާތު އެކި ގޮތްގޮތަށް އޮޅުވާލައިގެން މީހުންގެ އަތުން ފައިސާ ހޯދާ މައްސަލަތައް ވަނީ ވަރަށް ބޮޑަށް އާންމުވެފައެވެ.
ކިޔުންތެރިންގެ ހިޔާލު