އެމެރިކާގެ ރައީސް ޑޮނަލްޑް ޓްރަމްޕްގެ ސުލްހައިގެ ޕްލޭންގެ ދެވަނަ ފިޔަވަހި ތަންފީޒުކުރަން ފެށޭނީ، ފުރަތަމަ ފިޔަވަހީގައި ކުރަން ކަނޑައެޅި ކަންކަން އިސްތިއުމާރީ ދައުލަތުން ފުރިހަމަ ކުރުމުން ކަމަށް ހަމާސްއިން ބުނެފިއެވެ.
ހަމާސްއިން މިކަން ހާމަކޮށްފައިވަނީ، ދެވަނަ ފިޔަވަހި ފުރިހަމަ ކުރުމަށް އެކަށައެޅި ރޯޑްމެޕްގެ ދެލިކޮޕީއަށް އެއްބަސްވުމަށް ފަހުގައެވެ.
މި ފިޔަވަހީގައި، ހަމާސްއިން ހަތިޔާރު ބެހެއްޓުމާއި، ޣައްޒާގެ ވެރިކަން މިނިވަން ކޮމިޓީއަކާ ހަވާލުކުރުންވެސް ހިމެނެއެވެ.
ދެވަނަ ފިޔަވަހީގައި ހިމެނޭ ކަންކަން ތަންފީޒުކުރުމުގެ ރޯޑްމެޕެއް އެކަށައަޅާފައި މިވަނީ އެމެރިކާ، ގަތަރު، ތުރުކީ އަދި މިސްރު މެދުވެރިވެގެން ކުރި މަޝްވަރާތަކަށް ފަހުގައެވެ.
ހަމާސްގެ އިތުރުން، ފަލަސްތީނުގެ ހުރިހާ ޖަމާއަތްތަކުންވެސް ވަނީ، ރޯޑްމެޕްގައި ހިމެނޭ ކަންކަމަށް އެއްބަސްވެފައެވެ.
އެހެން ނަމަވެސް، ހަމާސްއިން މިއަދު ބުނެފައިވަނީ، ފުރަތަމަ މަރުހަލާގެ ދަށުން ފުރިހަމަ ކުރުމަށް އިސްރާއީލުން ވެފައިވާ ހުރިހާ ވައުދުތަކެއް ނުފުއްދާހާ ހިނދަކު ދެވަނަ މަރްހަލާ ތަންފީޒުކުރުން ކުރިއަށް ނުދެވޭނެ ކަމަށެވެ.
ހަމާސްއިން ބުނެފައިވަނީ، އިސްރާއީލުން ޣައްޒާއަށް ދެމުންގެންދާ ހަމަލާތައް ދާއިމީކޮށް ހުއްޓާލުމާއި، އިސްތިއުމާރީ ސިފައިން ޣައްޒާއިން ފޭބުން އެއީ އެންމެ ފުރަތަމަ ކުރަންޖެހޭ ކަންކަން ކަމަށެވެ.
މަޝްވަރާތަކުގައި ހަމާސްގެ ފަރާތުން ބައިވެރިވެވަޑައި ގެންނެވި އިސް މަންދޫބު ޣާޒީ ހަމަދު ވިދާޅުވީ، ސުލްހައިގެ އެއްބަސްވުމުގެ ފުރަތަމަ ފިޔަވަހީގެ ދަށުން ޣައްޒާގެ ބިމުގެ 53 އިންސައްތަ ބިމުން އިސްތިއުމާރީ ސިފައިން ނުފައިބާނަމަ ހަތިޔާރު ބެހެއްޓުމުގެ އެއްވެސް ވާހަކައެއް ހަމާސްއިން ނުދައްކާނޭ ކަމަށާއި، އަދި އެއްބަސްވުމުގައި ހިމެނޭ އެއްވެސް ކަމަކަށް އަމަލު ނުރާނޭ ކަމަށެވެ.
ހަމާސްއިން ހަތިޔާރު ބަހައްޓަން އެއްބަސް ވެއްޖެ ކަމަށްބުނެ އެމެރިކާގެ ރައީސާއި، ދުނިޔޭގެ ގައުމުތަކުން އެކަމަށް އުފާކޮށް މަރްހަބާ ކިޔަމުން ގެންދާއިރު، އިސްތިއުމާރީ ދައުލަތުން ގެންދަނީ ރޯޑްމެޕާ ދެކޮޅު ހަދަމުންނެވެ. އޭގައި ހިމެނޭ ބައެއް މާއްދާތަކާ ދެކޮޅު ހަދާނޭ ކަމަށް ބުނަމުންނެވެ.
ހަމަލާތައް ހުއްޓާލަން ވެފައިވާ އެއްބަސްވުމާވެސް ޚިލާފްވަނީ އިސްތިއުމާރީ ދައުލަތުންނެވެ. ފުރަތަމަ ފިޔަވަހީގައި ކުރަން ކަނޑައެޅި ގިނަ ކަންކަން އެމީހުން ފުރިހަމައެއް ނުކުރިއެވެ. ދެވަނަ ފިޔަވަހި ފުރިހަމަ ކުރަން ޕްލޭނެއް ހެދިނަމަވެސް އެޔާ ދެކޮޅުހަދައި ފެއިލްކޮށްލާނީ އިސްރާއީލުންކަން މިހާރުވެސް ދަނީ ހާމަވަމުންނެވެ.
ކިޔުންތެރިންގެ ހިޔާލު