އިސްރާއީލުގެ ބޮޑުވަޒީރުގެ މަގާމުގައި އޭނާ ހުރިހާ ހިނދަކު ފަލަސްތީނުގެ މިނިވަން ދައުލަތެއް ނުއުފެއްދޭނޭ ކަމަށް، އިސްތިއުމާރީ އިސްރާއީލުގެ ބޮޑުވަޒީރު މުޖުރިމު ނަތަންޔާހޫ ބުނެފިއެވެ.
އޭނާ މިހެން ބުނެފައިވަނީ، އޭނާގެ ހަށުކަށި ސަރުކާރުގެ ކެބިނެޓު ބައްދަލުވުމެއްގައި ވާހަކަ ދައްކަމުންނެވެ.
ނަތަންޔާހޫ ބުނީ، އޭނާ ބޮޑުވަޒީރަކަށް ހުރިހާ ހިނދަކު ޣައްޒާގައިވެސް އަދި ހުޅަނގު އައްސޭރީގައިވެސް ފަލަސްތީނުގެ ދައުލަތެއް ނުއުފެއްދޭނޭ ކަމަށެވެ.
ނަތަންޔާހޫ ވަނީ، އެމެރިކާގެ ރައީސް ޑޮނަލްޑް ޓްރަމްޕް އުފެއްދި ބޯޑް އޮފް ޕީސްއިން ހުށަހަޅާފައިވާ 15 ނުކުތާ ހިމެނޭ ޣައްޒާ ސުލްހައިގެ ޕްލޭނާ ދެކޮޅު ހަދާކަން ރަސްމީކޮށް ހާމަކޮށްފައެވެ.
ބޯޑް އޮފް ޕީސްއިން ހުށަހަޅާފައިވާ ރޯޑްމެޕަށް ހަމާސްއިން އެއްބަސްވެފައި ވާއިރު، މިއީ، މި ރޯޑްމެޕަށް ނަތަންޔާހޫ ފާޅުގައި ދެކޮޅު ހެދި ފުރަތަމަ ފަހަރެވެ.
ހަމާސްއިން މިއަދު އާންމުކުރި ބަޔާނެއްގައި، ބޯޑް އޮފް ޕީސްގެ ރޯޑްމެޕް ފުރިހަމައަށް ތަންފީޒުކުރުމަށް މީޑިއޭޓަރުންނާއި، ބައިނަލްއަގްވާމީ އެހެން ފަރާތްތަކަށްވެސް ގޮވާލާފައި ވެއެވެ.
ރޯޑްމެޕްގައި ހިމެނޭގޮތުގެމަތިން އިސްތިއުމާރީ ސިފައިން ޣައްޒާއަށް ދެމުންގެންދާ ހަމަލާތައް ހުއްޓާލައި، އިސްތިއުމާރީ ސިފައިން ޣައްޒާއިން ބޭލުމަށާއި، ޣައްޒާއަށް ވަދެނުކުންނަ ދޮރާށިތައް ހުޅުވާލައި، އިންސާނީ އެހީއާއި، ޓެންޓުތަކާއި، އަދި ކޮންސްޓްރަކްޝަން މަސައްކަތަށް ބޭނުންވާ ސާމާނު އެތެރެކުރަން ފެށުމަށް ހަމާސްއިން ގޮވާލާފައި ވެއެވެ.
ޓްރަމްޕްގެ ރޯޑްމެޕް ފުރިހަމައަށް ތަންފީޒު ކުރުމަށް ހަމާސްގެ ފަރާތުން ފުރިހަމަ ތާއީދާއި އެއްބާރުލުން ދޭނޭ ކަމަށާއި، ޒިންމާދާރުކަމާއެކު މަސައްކަތް ކުރާނޭ ކަމަށްވެސް ހަމާސްއިން ބުނެފައި ވެއެވެ.
އެކަމަކު، މުޖުރިމު ނަތަންޔާހޫ މިއަދު ބުނީ، ހަމާސްއިން ހުރިހާ ހަތިޔާރެއް ބެހެއްޓުމުން ނޫނީ، ޣައްޒާއިން އިސްރާއީލު ސިފައިން ނުބާލާނޭ ކަމަށެވެ. އެމެރިކާގެ ރައީސް އެންގިޔަސް އެކަން ނުކުރާނޭ ކަމަށް ނަތަންޔާހޫ ބުނެފައި ވެއެވެ.
އިސްރާއީލުގެ ސިޔާސީ އިދިކޮޅު ބައެއް ފަރާތްތަކުން ބުނަނީ، މިއީ، ނަތަންޔާހޫ ދެއްކި ސިޔާސީ މަންފާ ލިބިގަތުމުގެ ވާހަކަތަކެއް ކަމަށާއި، ޓްރަމްޕްގެ ޕްލޭނާ ނަތަންޔާހޫ ދެކޮޅުހެދީ އޮކްޓޫބަރު މަހު ބާއްވާ އިންތިޚާބަށް އާންމުންގެ ތާއީދު ހޯދުމުގެ ބޭނުމުގައި ކަމަށެވެ.
ކިޔުންތެރިންގެ ހިޔާލު