2023 ވަނަ އަހަރުގެ އޮކްޓޫބަރު މަހުގެ ތެރޭގައި އިސްތިއުމާރީ ސިފައިން ބޮންއަޅައި ވައްޓައި ބިމާހަމަ ކޮށްލާފައިވާ އިމާރާތްތަކުގެ ދަށުން ފެނުނު އިތުރު 105 މީހުންގެ ކަށިތައް މިއަދު ވަޅުލައިފިއެވެ.
މިއީ، ޣައްޒާގެ އައް ތާޖް ސަރަހައްދަށް ޓެރަރިސްޓުން ދިން ވަރުގަދަ ވައިގެ ހަމަލާތަކުގައި ޝަހީދުވެފައިވާ މީހުންގެ ކަށިތަކެވެ.
އައް ތާޖް ސަރަހައްދަށް ބޮންއަޅައި ބިމާހަމަކޮށްލާފައިވާ އިމާރާތްތަކަކީ މުޅިންވެސް އާންމުން ދިރިއުޅެމުންދިޔަ އިމާރާތްތަކެވެ.
އާންމުން ދިރިއުޅެމުންދިޔަ އައް ތާޖް ސަރަހައްދުގެ އިމާރާތްތަކަށް ވަރުގަދައަށް ބޮންއެޅުމުގައި އިސްތިއުމާރީ ސިފައިން އެމެރިކާއިން އުފައްދާ ޖީބީޔޫ-31 ގެ 20 ބޮންވެސް ބޭނުން ކުރިއެވެ. މިއިން ކޮންމެ ބޮމެއްގެ ބަރުދަނުގައި އެއް ޓަނު ހުރެއެވެ.
ބޮންއެޅުމުގެ ސަބަބުން މުޅި ސަރަހައްދު ގާފުންޏަކަށް ވެގެންދިޔައެވެ.
މި އިމާރާތްތަކުގެ ދަށުވެ ޝަހީދުވެފައިވާ މީހުންގެތެރެއިން މިހާތަނަށް 221 މީހެއްގެ ކަށިތައް ނަގާފައިވާއިރު، އަދިވެސް އެތައް ބަޔަކު ނުފެންނަ ކަމަށް، ފަލަސްތީނުގެ ސިވިލް ޑިފެންސް ޓީމުތަކުން ބުނެއެވެ.
އެ ސަރަހައްދުން ބިމާހަމަކޮށްލި އިމާރާތްކުގެ ދަށުން ހަށިތައް ނުހޯދި ލަސްވެގެންދިޔައީވެސް، އިސްތިއުމާރީ ސިފައިން އެ ސަރަހައްދަށް ފަހުންވެސް ވަރުގަދަ ވައިގެ ހަމަލާތައް ދެމުން ގެންދިއުމާއި، އިމާރާތްތަކުގެ ދަށުވެފައިވާ މީހުން ހޯދުމުގެ މަސައްކަތް ކުރުމަށްވެސް ހުރަސް އަޅަމުން ގެންދިއުމާ އެކުގައެވެ.
އިސްތިއުމާރީ ސިފައިން ޣައްޒާގެ އެތަން މިތަނަށް ބޮންއެޅުމުގެ ސަބަބުން ޝަހީދުވި ކަމަށް ރެކޯޑްކުރެވުނު ރަސްމީ އަދަދު 75،000 އާ ގާތްކޮށްފައި ވާއިރު، ބިމާހަމަކޮށްލާފައިވާ ގެތަކާއި އިމާރާތްތަކުގެ ދަށުވެ ގެއްލިފައިވާ ކަމަށް އާއިލާތަކުން ރިޕޯޓް ކޮށްފައިވާ މީހުންގެ އަދަދު 8،000 އަށް އަރާ ކަމަށް، ޣައްޒާ އިންފޮމޭޝަން އޮފީހުން ބުނެއެވެ.
ކިޔުންތެރިންގެ ހިޔާލު