ކޮލަމްބިއާގެ ރައީސް ގުސްތާވޯ ޕެޓްރޯގެ ޑިޕްލޮމެޓިކް ވިސާ ބާތިލްކުރަން އެމެރިކާއިން ނިންމައިފިއެވެ.
އެމެރިކާގެ ޚާރިޖިއްޔާއިން މި ފިޔަވަޅު އެޅީ، މުޖުރިމު ނަތަންޔާހޫ އދގެ އާންމު މަޖިލީހުގައި ތަގްރީރު ކުރި ވަގުތާ ދިމާކޮށް އދ އިމާރާތުގެ ބޭރުގައި ބޭއްވި ބިޔަ މުޒާހަރާގައި ބައިވެރިވެވަޑައިގެން އަދި މުޒާހަރާގެ ބައިވެރިންނާ މުޚާތަބު ކުރައްވައި ވާހަކަފުޅު ދެއްކެވުމުންނެވެ.
ކޮލަމްބިއާގެ ރައީސްގެ ވާހަކަފުޅުގައި، ރައީސް ޑޮނަލްޑް ޓްރަމްޕްގެ އަމުރުތަކަށް ކިޔަމަން ނުވުމަށާއި، އިންސާނިއްޔަތަށް ކިޔަމަންވުމަށް އެމެރިކާ ސިފައިންނަށް ގޮވާލެއްވިއެވެ.
މިކަމާ ގުޅިގެން އެމެރިކާގެ ޚާރިޖިއްޔާއިން އެކްސްގައި ޕޯސްޓްކުރި މެސެޖެއްގައި ބުނެފައިވަނީ، ކޮލަމްބިއާގެ ރައީސް ގުސްތާވޯ ޕެޓްރޯގެ އެ އަމަލަކީ ވަރަށް ޒިންމާދާރުކަންކުޑަ އަދި ހަމަނުޖެހުން އުފެއްދުމުގެ އަމަލެއް ކަމަށެވެ.
އޭނާ މަސައްކަތް ކުރެއްވީ ނިއުޔޯކްގެ މަގުތައް މަތީގައި އެމެރިކާ ސިފައިންގެ މެދުގައި ހަމަނުޖެހުން އުފެއްދުމަށް ކަމަށްވެސް ތުހުމަތު ކޮށްފައި ވެއެވެ.
އދގެ މައި މަރުކަޒުގެ ބޭރަށް އެއްވެފައި ތިބި އެތައްހާސް އާންމުންނާ މުޚާތަބު ކުރައްވައި ކޮލަމްބިއާގެ ރައީސް ގުސްތާވޯ ޕެޓްރޯ ވިދާޅުވީ، އިސްރާއީލު ހުއްޓުވެން އޮތީ އަސްކަރީ ބާރުގެ ބޭނުންކޮށްގެން ކަމަށެވެ.
އެހެންކަމުން، ފަލަސްތީނު މިނިވަން ކުރުމަށް، ހަތިޔާރު އެޅި ބައިނަލްއަގްވާމީ ވަރުގަދަ ލަޝްކަރެއް އުފެއްދުމަށް ގޮވާލައްވާފައެވެ. އެ ލަޝްކަރު އިސްރާއީލަށް ވުރެ ބޮޑުވާންޖެހޭނެ ކަމަށްވެސް ވިދާޅުވިއެވެ.
އިސްރާއީލާ ދެކޮޅަށް ހަތިޔާރުގެ ދަތިކުރުމުގެ ފިޔަވަޅުތައް އެޅުމަށާއި، ދައްކާ ވާހަކަތައް އަމަލުން ދެއްކުމަށްވެސް، ކޮލަމްބިއާގެ ރައީސް، ދުނިޔެއަށް ގޮވާލެއްވިއެވެ.
ކޮލަމްބިއާގެ ރައީސް ގުސްތާވޯ ޕެޓްރޯއަކީ، ޣައްޒާ މައްސަލާގައި ވަރަށް ފާޅުކަންބޮޑު ގޮތެއްގައި ވާހަކަފުޅު ދައްކަވައި، އެކަން ކުށްވެރި ކުރައްވަމުން ގެންދަވާ ބޭފުޅެކެވެ.
އަދި އިސްރާއީލާ ދެކޮޅަށް ބައިނަލްއަގްވާމީ ގޮތުން ކުރެވޭ ހުރިހާ މަސައްކަތެއްގައި ކޮލަމްބިއާއިން ގެންދަނި އިސް ދައުރެއް އަދާކުރަމުންނެވެ.
ކިޔުންތެރިންގެ ހިޔާލު