ޗައިނާ ސަރުކާރުގެ ހިލޭ އެހީގެ ދަށުން މާލޭގެ މަގުތައް ޒަމާނީ ފެންވަރަކަށް ތަރައްގީކުރުމަށް ހިންގާ ބިޔަ މަޝްރޫއުގެ އަމަލީ މަސައްކަތް ލަސްވެގެން އަންނަ އަހަރުގެ ކުރީކޮޅު ފެށޭނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިކަން ހާމަކުރެއްވީ ސަރުކާރުން ކުރިއަށްގެންދާ “ދަ ޕަލްސް” ޕޮޑްކާސްޓް ސިލްސިލާގެ ހަތަރުވަނަ އެޕިސޯޑުގައި ވާހަކަފުޅުދައްކަވަމުންނެވެ. އެމަނިކުފާނު ވިދާޅުވި ގޮތުގައި މާލޭގެ މަގުތައް އެއްކޮށް ތަރައްގީކުރުމުގެ މިފަދަ ބޮޑު މަޝްރޫއެއް އެންމެ ފަހުން ހިންގާފައިވަނީ ކުރީގެ ރައީސް މައުމޫން އަބްދުލްގައްޔޫމުގެ ވެރިކަމުގައެވެ. އޭގެ ފަހުން މަގުތައް ބެލެހެއްޓުމުގައި ބޮޑެތި އިހުމާލުތަކެއް ވެފައިވާކަން ފާހަގަކުރެއްވިއެވެ. އަލަށް ފަށާ މި މަޝްރޫއުގެ ދަށުން މާލޭގެ މަގުތަކުގައި ފެން ބޮޑުވާ މައްސަލައަށް ހައްލު ހޯދުމަށް ސްޓޯމްވޯޓަރ ޑްރައިނޭޖް ނިޒާމަކާއި، އިމާރާތްކުރުމަށް ބޭނުންކުރާ ޑީވޯޓަރިން ނިޒާމުގެ އިތުރުން އަލިފާން ނިއްވަން ބޭނުންކުރާ ފަޔަރ ހައިޑްރަންޓް ނިޒާމުވެސް ގާއިމުކުރެވިގެންދާނެއެވެ.
މި ބިޔަ މަޝްރޫއުގައި ނުހިމެނޭ ބޮޑުތަކުރުފާނު މަގު ޒަމާނީ ފެންވަރަށް ތަރައްގީކުރުމަށް ކުރަމުންދާ މަސައްކަތްތަކަށްވެސް ރައީސް ވަނީ އަލިއަޅުއްވާލައްވާފައެވެ. އެގޮތުން އިއްޒުއްދީން ފާލަމުން ފެށިގެން ކުރީގެ ނަސަންދުރާއާ ހަމައަށް އޮންނަ ސަރަހައްދުގެ މަސައްކަތް ނިންމައި އަންނަ ހަފުތާގައި އެ މަގު ހުޅުވުމަށް ދަނީ ތައްޔާރުވަމުންނެވެ. އެ ސަރަހައްދުގައި ފަސްސަތޭކަ ސައިކަލު ޕާކުކުރެވޭނެ ޖާގަ ހަމަޖެހިފައިވާއިރު، މީގެ ސަބަބުން އެތެރޭގެ މަގުތަކަށް ބޮޑު ލުޔެއް ލިބިގެންދާނެކަމަށް އެމަނިކުފާނު ވިދާޅުވިއެވެ. މީގެ އިތުރުން، އެމްޕީއެލް އިން ފެށިގެން ރަސްފަންނާ ހަމައަށް އޮންނަ ހަލާކުވެފައިވާ ސަރަހައްދު މަރާމާތުކުރުމުގެ މަސައްކަތްވެސް މި ފިޔަވަހި ނިމުމާއެކު ފެށޭނެކަން ވަނީ ހާމަކުރައްވާފައެވެ.
މާލޭގެ ފަޅުން ބައެއް ހިއްކައިގެން މަގު ފުޅާކުރުމުގެ ސަބަބުން ބަނދަރު ބޭނުންކުރާ އުޅަނދުފަހަރަށް ތޮށިގަނޑާ ކައިރިކުރުމަށް އިތުރު ޖާގަ ލިބި، ފަސޭހަވެގެންދާނެކަން ރައީސް ފާހަގަކުރެއްވިއެވެ. މި މަޝްރޫއުތަކުގެ ސަބަބުން މާލޭގެ ތޮއްޖެހުމަށް ކޮންމެވެސް ވަރެއްގެ ލުޔެއް ލިބުނު ނަމަވެސް، ދާއިމީ ހައްލެއް ލިބޭނީ ސަރަހައްދީ ތަރައްގީ ގެނެވިގެންކަމަށް އެމަނިކުފާނު ވިދާޅުވިއެވެ. ސަރުކާރުގެ އަމާޒަކީ ޚިދުމަތްތަކާއި ފުރުސަތުތަކުގެ އިތުރުން ބޯހިޔާވަހިކަން ލާމަރުކަޒުކޮށް، ދުރު ރާސްތާގެ ޕްލޭނެއްގެ ދަށުން މާލޭގެ ތޮއްޖެހުމުގެ މައްސަލައަށް ހަގީގީ ހައްލެއް ހޯދައިދިނުމެވެ.
ކިޔުންތެރިންގެ ހިޔާލު