ތައުލީމު ލިބިފައިވާ މީހުންގެ ކިބައިން ޖަމާއަތުގެ މަސްލަހަތު އިސްކުރުން ފަދަ ހަރުދަނާ އަޚުލާގު ފެންނަންޖެހޭނެ ކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ.
މިއާންޒް ކޮލެޖަށް 20 އަހަރު ފުރުން ފާހަގަކުރުމަށް އިމާދުއްދީން ސްކޫލުގައި ބޭއްވި ޚާއްސަ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުން ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވަނީ މިއާންޒް ކޮލެޖުން ކުރު މުއްދަތެއްގެ ތެރޭގައި ހަލުވި ދުވެލީގައި ހޯދާފައިވާ ކާމިޔާބީތައް ފާހަގަކުރައްވައިފައެވެ. އެ ކަމަނާ ވިދާޅުވި ގޮތުގައި، ގައުމީ ފެންވަރުގައި ރަނގަޅު ތަރުބަވީ އާޖީލެއްގެ ބިންގާ އަޅައިދިނުމަށް އެ ކޮލެޖުން ކުރަމުންދާ މަސައްކަތްތަކަކީ މުޅި ދައުލަތަށް ވެސް ލިބޭ އުފަލެކެވެ. ތައުލީމަކީ އިންސާނާ ތަރައްގީކޮށްދޭ މައިގަނޑު ވަސީލަތް ކަމަށާއި، ތަރައްގީއަކީ އިންސާނާއަށް އަންނަ ހެޔޮ ބަދަލުތަކެއްކަން އެ ކަމަނާ ފާހަގަކުރެއްވިއެވެ.
ތައުލީމު ހާސިލުކުރުމުގެ ބޭނުމަކީ ދީނާއި ގައުމަށާއި، އަމިއްލަ ފަސްގަނޑާއި އާއިލާގެ އިތުރުން އަމިއްލަ ނަފުސަށް ބާއްޖަވެރިކަން ގެނައުން ކަމަށް ސާޖިދާ ވިދާޅުވިއެވެ. އެ ކަމަނާގެ ވާހަކަފުޅުގައި، ހަގީގީ ތައުލީމީ މީހެއްގެ ކިބައިން ފެންނަންވާނެ ސިފަތަކުގެ މައްޗަށް އަލިއަޅުވާލައްވަމުން ވިދާޅުވީ، ދީނީ ކަންކަމަށް ފަރުވާތެރިވުމާއި، މުއާމަލާތް ކުރުމުގައި އަނެކުންނަށް އިޙުތިރާމު ކުރުމަކީ މުހިންމު ކަންތައްތަކެއް ކަމަށެވެ. މީގެ އިތުރުން، އަމިއްލަ އެދުމަށް ވުރެ ޖަމާއަތުގެ މަސްލަހަތު އިސްކުރުމަކީ ތައުލީމީ މީހެއްގެ ކިބައިން ފެންނަންޖެހޭ އެންމެ މަތީ އަޚުލާގީ ސިފަކަން އެ ކަމަނާ ފާހަގަކުރެއްވިއެވެ.
މި ރަސްމިއްޔާތުގައި ރައީސުލްޖުމްހޫރިއްޔާގެ އަނބިކަނބަލުން ވަނީ މިއާންޒް ކޮލެޖަށް ދިގު މުއްދަތަކަށް ޚިދުމަތްކުރެއްވި ބޭފުޅުންގެ އަގުވަޒަންކުރައްވައިފައެވެ. އެގޮތުން، އެ ކޮލެޖަށް 15 އަހަރަށް ވުރެ ގިނަ ދުވަހު ޚިދުމަތްކުރެއްވި ބޭފުޅުންނަށް ހަނދާނީ ފިލާ ޙަވާލުކޮށްދެއްވީ ސާޖިދާ މުޙައްމަދު އެވެ. މީގެ އިތުރުން، 5 އަހަރާއި 10 އަހަރަށް ވުރެ ގިނަ ދުވަހު ޚިދުމަތް ކުރެއްވި މުވައްޒަފުންނަށް ވެސް ހަނދާނީ ފިލާ ދީފައިވެއެވެ.
ކިޔުންތެރިންގެ ހިޔާލު