ދަނޑުވެރިކަމާއި ގަސްގަހާގެހި ހެއްދުމުގެ މަސައްކަތުގައި ޞިއްޙީ ގޮތުން ރައްކާތެރި ހަމަތަކާއި މިންގަނޑުތައް ނެގެހެއްޓުމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު އިލްތިމާސްކުރައްވައިފިއެވެ.
އެކަމަނާ މިކަމަށް އިލްތިމާސްކުރެއްވީ މިއަދު ފާހަގަކުރަމުންދާ ޤައުމީ ދަނޑުވެރިންގެ ދުވަހުގެ މުނާސަބަތުގައި ސޯޝަލް މީޑިއާ މަންސައެއްގައި ހިއްސާކުރެއްވި ޕޯސްޓެއްގައެވެ.
ފަސްޓް ލޭޑީގެ ޕޯސްޓުގައި ފާހަގަކުރައްވާފައިވާ ގޮތުގައި، ޒަމާނީ ޓެކްނޮލޮޖީއަށް އައިސްފައިވާ ބޮޑެތި ކުރިއެރުންތަކާއެކު، މިއަދު ދަނޑުވެރިކަމަކީ ކުދިކުދި ޖާގަތަކުގައިވެސް ނުހަނު ބޮޑު މަންފާއަކާއި ނަފާއެއް ނެރެވޭނެ ގޮތަށް ކުރިއަށް ގެންދެވިދާނެ މަސައްކަތެކެވެ. އެގޮތުން، ކޮންމެ ގެއެއްގެ ގޯތިތެރޭގައި ވިޔަސް ދަނޑުވެރިކަމުގެ ކުޑަ މިންވަރެއްގެ މަސައްކަތެއް ކުރުމަކީ ތިމާވެށީގެ ފެހިކަން އިތުރުވެ، ނޭވާލާ ވައި ސާފުވުމުގެ އިތުރުން، ފައިދާހުރި ރަނގަޅު ކާނާ އަމިއްލައަށް ހޯދުމަށް ލިބިގެންދާނެ ވަރަށް އަގުހުރި ފުރުޞަތެއް ކަމަށް އެކަމަނާ ވިދާޅުވިއެވެ.
މި ދާއިރާގައި މަސައްކަތްކުރައްވާ އެންމެހައި ޚިދުމަތްތެރިންނަށް ދުވަހުގެ ހެޔޮއެދުމާއި ތަހުނިޔާ ފޮނުއްވަމުން، ކޮންމެ ދިވެހި ރައްޔިތަކީވެސް އަމިއްލައަށް ގަސް އިންދައި ހެއްދުމަށް ޝައުޤުވެރިވާ މީހަކަށް ވުމަށް މެޑަމް ސާޖިދާ ވަނީ ގޮވާލައްވާފައެވެ.
ދިވެހި ދަނޑުވެރިން ޤައުމަށްޓަކައި ކޮށްދެއްވާ ބުރަ މަސައްކަތުގެ އަގުވަޒަންކުރުމުގެ ގޮތުން އެންމެ ފުރަތަމަ ދަނޑުވެރިންގެ ދުވަސް ފާހަގަކުރަން ފަށާފައިވަނީ 2009 ވަނަ އަހަރުގެ އޮގަސްޓު މަހުގެ 10 ވަނަ ދުވަހުއެވެ. ނަމަވެސް، ދަނޑުވެރިންނާއި އެ ފަރާތްތަކުގެ އުފެއްދުންތަކަށް ހާއްސަކޮށްގެން ފުޅާ ދާއިރާއެއްގައި ހަރަކާތްތައް ހިންގުމުގެ މަގުފަހިކުރުމަށާއި، ބައިނަލްއަޤްވާމީ ފެންވަރުގައި ފާހަގަކުރާ ދުނިޔޭގެ ކާބޯތަކެތީގެ ދުވަސް ކަމުގައިވާ އޮކްޓޫބަރު 16 އާ ގުޅުވައިލުމަށްޓަކައި، ދުވަސް ބަދަލުކުރުމަށް ވަޒީރުންގެ މަޖިލީހުން ނިންމެވިއެވެ. އެގޮތުން 2020 ވަނަ އަހަރުގެ ފެބްރުއަރީ 11 ގައި ވަޒީރުންގެ މަޖިލީހުން ނިންމެވި ނިންމެވުމާ އެއްގޮތަށް، 2020 ވަނަ އަހަރުން ފެށިގެން ކޮންމެ އަހަރެއްގެވެސް އޮކްޓޫބަރު މަހުގެ 15 ވަނަ ދުވަސް އަންނަނީ ޤައުމީ ދަނޑުވެރިންގެ ދުވަހުގެ ގޮތުގައި ފާހަގަކުރަމުންނެވެ.
ކިޔުންތެރިންގެ ހިޔާލު