ދައުލަތުގެ ކުންފުނިތަކުގެ ހަރަދު ކުޑަކުރުމަށް ސަރުކާރުން ފަށާފައިވާ މަސައްކަތުގެ ދަށުން ފެނަކަ ކޯޕަރޭޝަނުން އަމިއްލައަށް ވަޒީފާއިން ވަކިވުމަށް ހުޅުވައިލި ފުރުސަތުގައި 97 މުވައްޒަފަކު އެކަމަށް އެދި ހުށަހަޅައިފިއެވެ.
ފެނަކައިގެ މާލީ ހާލަތު ރަނގަޅުކޮށް ކުންފުނި ހަމަމަގަށް އެޅުވުމަށްޓަކައި މުވައްޒަފުންގެ އަދަދު މަދުކުރުމަކީ ކޮންމެހެން ކުރަންޖެހިފައިވާ ކަމެއްކަމަށް އެ ކުންފުނީގެ މެނޭޖިން ޑިރެކްޓަރު މުހައްމަދު އަފީފު ހުސައިން ވަނީ ވިދާޅުވެފައެވެ. މި މަގުސަދު ހާސިލުކުރުމަށްޓަކައި އަމިއްލައަށް ވަކިވާން އެދޭ މުވައްޒަފުންނަށް ހަތަރު މަހުގެ މުސާރަ އެއްފަހަރާ ދިނުމަށް ކުންފުނިން ވަނީ ނިންމާފައެވެ. މި ހުށަހެޅުން ގަބޫލުކޮށް ހަފުތާއެއްގެ ތެރޭގައި ގިނަ އަދަދެއްގެ މުވައްޒަފުން ވަނީ ވަޒީފާއިން ވަކިވުމަށް ހުށަހަޅާފައެވެ.
އާ މެނޭޖުމަންޓާ ހަވާލުވިއިރު ފެނަކައިގެ ޕޭރޯލުގައި 8000 އެއްހައި މުވައްޒަފުން ތިބިކަން ފާހަގަކުރައްވައި އެ މުވައްޒަފުންނަށް މުސާރަ ދިނުމަށް މަހެއްގެ މައްޗަށް 90 މިލިއަން ރުފިޔާއާ ގާތްކުރާ އަދަދެއް ހަރަދުވަމުންދާކަމަށް އަފީފު ވިދާޅުވިއެވެ. އޭނާ ފާހަގަކުރެއްވި ގޮތުގައި ކުރީގެ ސަރުކާރުން ސިޔާސީ މަގުސަދުތައް ހާސިލުކުރުމަށް ގިނަ އަދަދެއްގެ މުވައްޒަފުން ވަޒީފާއަށް ނަގާފައިވެއެވެ. މީގެ ތެރޭގައި ލިޔަންކިޔަން ނުދަންނަ މީހުންނާއި މަސައްކަތުގެ ވަގުތުގައި ވަޒީފާއަށް ނުނިކުމެ އެހެނިހެން ކަންކަމުގައި އުޅޭ މީހުން ހިމެނޭކަމަށްވެސް ވިދާޅުވިއެވެ. މުސާރައަށް ކުރަންޖެހޭ ބޮޑު ހޭދައިގެ ސަބަބުން ކުންފުނިން ހިންގަން ބޭނުންވާ މަޝްރޫއުތައް ހިންގުމަށް ފައިސާގެ ދަތިކަން ވަނީ ކުރިމަތިވެފައެވެ.
ފެނަކައިގެ އިތުރުން ހައުސިން ޑިވެލޮޕްމެންޓު ކޯޕަރޭޝަން އިންވެސް ވަނީ މުވައްޒަފުން އަމިއްލައަށް ވަޒީފާއިން ވަކިވެވޭ ގޮތަށް ރިޑަންޑެންސީ ޕްރޮގުރާމެއް ތައާރަފުކޮށްފައެވެ. މި ފިޔަވަޅަކީ އެ ކުންފުނީގެ މާލީ ހާލަތު ރަނގަޅުކުރުމަށް އެޅި ފިޔަވަޅެއްކަމަށް އެ ކުންފުނިން ބުނެފައިވެއެވެ. މީގެ އިތުރުން ދައުލަތުގެ ކުންފުނިތަކުގެ މާލީ ހާލަތު ރަނގަޅުކުރުމުގެ ގޮތުން ކުންފުނިތަކުގެ މުވައްޒަފުންގެ އަދަދު 33 އިންސައްތައަށް މަދުކުރުމަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން ވަނީ ދައުލަތުގެ ހުރިހާ ކުންފުނިތަކަށް އިރުޝާދު ދީފައެވެ.
ކިޔުންތެރިންގެ ހިޔާލު