2019 ވަނަ އަހަރު ތުއްތު ކުއްޖަކު މަރާލިކަން ސާބިތުވެ، އެ ކުއްޖާގެ މާމައާއި އޭނާގެ ލޯބިވެރިޔާ އަދި އިތުރު މީހެއްގެ މައްޗަށް ކްރިމިނަލް ކޯޓުން ޖަލު ހުކުމް އިއްވައިފިއެވެ.
ކްރިމިނަލް ކޯޓުން މިދިޔަ ބުރާސްފަތި ދުވަހު ސިއްރުކޮށްގެން ކުރިއަށްގެންދިޔަ ޝަރީއަތުގެ މަޖިލީހުގައި، ދައުލަތުން ދައުވާ އުފުލި ތިން މީހުންގެ މައްޗަށް ވަނީ ޖަލު ހުކުމް އިއްވާފައެވެ. މި ތިން މީހުންވެސް ވަނީ ދައުލަތާއެކު އިއުތިރާފުގެ އެއްބަސްވުމެއް ހަދައި، ކުށަށް އެއްބަސްވެފައެވެ. އެހެންކަމުން މައްސަލައިގެ ހުކުމް އިއްވާފައިވަނީ މި އެއްބަސްވުމުގެ މައްޗަށް ބިނާކޮށެވެ.
މިއީ މެދުރާއްޖެތެރޭގެ ރަށެއްގައި 2019 ވަނަ އަހަރު ހިނގާފައިވާ ހިތާމަވެރި ހާދިސާއެކެވެ. މައުލޫމާތު ލިބިފައިވާ ގޮތުގައި، މަރާލާފައިވަނީ އުމުރުން 18 އަހަރު ނުފުރޭ ކުޑަކުއްޖަކަށް ކައިވެނީގެ ބޭރުން ލިބިފައިވާ ތުއްތު ކުއްޖެކެވެ. މި އަމަލު ހިންގުމުގައި އެންމެ އިސްކޮށް ހަރަކާތްތެރިވެފައިވަނީ މަރާލެވުނު ކުއްޖާގެ މާމައެވެ.
މި އަމަލު ހިންގުމުގައި މާމަގެ އިތުރުން ދެން ބައިވެރިވެފައިވަނީ މާމަގެ ލޯބިވެރިޔާއާއި، ވިހޭ ކުއްޖާގެ މަންމަގެ ލޯބިވެރިޔާއެވެ. ތުހުމަތު ކުރެވޭ ގޮތުގައި ވިހޭ ކުއްޖާގެ ބައްޕައަކީވެސް މި ހާދިސާގައި ހިމެނޭ ތިންވަނަ މީހާއެވެ. ކޯޓުގެ ހުކުމާއެކު މިހާރު މި ތިން މީހުންވެސް ވަނީ ޖަލަށް ލެވިފައެވެ.
ކިޔުންތެރިންގެ ހިޔާލު