ދިވެހިރާއްޖޭގެ ގައުމީ ޔުނިވަސިޓީން ކުރި ދިރާސާއަކުން ހާމަވެފައިވާ ގޮތުގައި، މާލޭގެ ރަސްފަންނު ބީޗުގެ ފެންވަރު ތަކުރާރުކޮށް ދަށްވަނީ އެ ސަރަހައްދުގެ ފެން ދައުރުވުން ކުޑަވުމާއި ކައިރީގައިވާ ނަރުދަމާ ނިޒާމުގެ ހޮޅިތަކުން ބޭރުވާ ނަޖިހުގެ ސަބަބުންނެވެ.
“މޯލްޑިވްސް ޖާނަލް އޮފް އެންޖިނިއަރިން އެންޑް ޓެކްނޮލޮޖީ” ގައި ޝާއިއުކޮށްފައިވާ މެރިން ބަޔޮލޮޖީ ދާއިރާގެ މި ދިރާސާއިން، ރަސްފަންނު ސަރަހައްދުގެ ފެނުގެ ރައްކާތެރިކަމާމެދު އޮތް ކަންބޮޑުވުންތަކަށް ވަނީ ސައިންޓިފިކް ހެކިތަކެއް ހުށަހަޅައިދީފައެވެ. ދިރާސާއިން ފާހަގަކުރާ ގޮތުގައި، ގުދުރަތީ ގޮތުން އޮއި ދައުރުވެ ފެން ބަދަލުވުމަށް އެ ސަރަހައްދު ހަދާފައިވާ ގޮތުން ބޮޑެތި ހުރަސްތަކެއް ކުރިމަތިވެ، ފެން އެއްތަނެއްގައި ބެދިފައި އޮތުމަކީ ފެންވަރު ދަށްވުމުގެ މައިގަނޑު ސަބަބެކެވެ. މީގެ އިތުރުން، މާލޭގެ ނަރުދަމާ ނިޒާމުން ކަނޑަށް ނަޖިސް ބޭރުކުރާ މައި ހޮޅިތައް އެ ސަރަހައްދާ ކައިރީގައި ހުރުމުން، މޫސުމީ ބަދަލުތަކާއި އޮއިވަރު ހުންނަ ގޮތުން ނަޖިހުގެ އަސަރު ރަސްފަންނަށް ފޯރުމުގެ ފުރުސަތު ވަރަށް ބޮޑެވެ.
ފެން ދައުރުވުން ކުޑަވެ، ނަޖިހުގެ އަސަރު ފޯރުމުގެ ސަބަބުން އެ ސަރަހައްދުގެ ފެނުގައި ގެއްލުންދެނިވި ބެކްޓީރިއާ އުފެދުމުގެ ނުރައްކާ އޮތްކަން ދިރާސާގައި ފާހަގަކޮށްފައިވެއެވެ. މީގެ ސަބަބުން އެ ތަނަށް ފަތަންދާ މީހުންނަށާއި ކުޑަކުދިންނަށް ހަމުގެ ބަލިތަކާއި، ބޮލުގައި ރިއްސުމާއި، ބޭރަށްހިންގުން ފަދަ ސިއްހީ މައްސަލަތައް ކުރިމަތިވުމުގެ ފުރުސަތު ބޮޑެވެ. މި މައްސަލައަށް ހައްލެއް ގެނައުމުގެ ގޮތުން، ފެން ދައުރުވާ މިންވަރު އިތުރުކުރުމަށް ފަރުމާއަށް ބަދަލުތަކެއް ގެނައުމާއި، ނަރުދަމާ ހޮޅިތަކުން ބޭރުކުރާ ތަކެތި މޫދަށް ދޫކުރުމުގެ ކުރިން ފަރުވާދޭ ނިޒާމެއް ގާއިމުކުރުމަށް ދިރާސާގައި ލަފާދީފައިވެއެވެ. އަދި ކަމާބެހޭ އިދާރާތަކުން ގަވާއިދުން ފެންވަރު ޓެސްޓުކޮށް، އާންމުންނަށް މައުލޫމާތު ހާމަކުރުމުގެ މުހިންމުކަން ވެސް ވަނީ ބަޔާންކޮށްފައެވެ.
ރަސްފަންނަކީ އާންމުންގެ ގިނަ ބަޔަކު ބޭނުންކުރާ ތަނަކަށް ވީނަމަވެސް، ފެނުގެ ކޮލިޓީ ދަށްވެގެން އެކި ފަހަރު މަތިން އެ ތަން ބަންދުކުރަން ޖެހިފައިވެއެވެ. ދާދި ފަހުން ވެސް މަރާމާތަށް ބަންދުކުރުމަށްފަހު ހުޅުވިތަނާ، ކަނޑުން ފަޅުތެރެއަށް ކަޅުތެޔޮ ވަދެ މޫދު ތަޣައްޔަރުވުމުގެ ސަބަބުން އަނެއްކާވެސް ބަންދުކުރަން ޖެހުނެވެ. މިހާރު އަލުން ހުޅުވާފައިވީ ނަމަވެސް، ދިރާސާއިން ހާމަވި ސިއްހީ ނުރައްކާތަކުން ރައްޔިތުން ސަލާމަތްކުރުމަށްޓަކައި ދެމެހެއްޓެނިވި ހައްލުތަކެއް ހޯދުމަކީ ކޮންމެހެން ކުރަންޖެހިފައިވާ ކަމެކެވެ.
ކިޔުންތެރިންގެ ހިޔާލު