މާލޭ ކޮމާޝަލް ހާބަރުގައި މި ހިނގާ ޖޫން މަހުގެ 14 އަދި 15 ވަނަ ދުވަހު މޯލްޑިވްސް ކަސްޓަމްސް ސާވިސްއިން ހިންގި ޚާއްސަ އޮޕަރޭޝަނެއްގައި ކާބޯތަކެތީގެ ތެރޭގައި ފޮރުވައިގެން ރާއްޖެއަށް އެތެރެކުރަން އުޅުނު ގިނަ އަދަދެއްގެ ވޭޕް ކާޓްރިޖާއި ޑިވައިސްތައް އަތުލައިގަނެފިއެވެ.
މި ތަކެތި އަތުލައިގަނެފައިވަނީ ކަނޑުމަގުން ރާއްޖެއަށް ގެނައި ޝިޕްމަންޓެއްގައި ޝައްކުކުރެވޭ ކަންތައްތަކެއް ހުރެގެން ކަސްޓަމްސްއިން ބަލައި ފާސްކުރުމުގެ ތެރޭގައެވެ. މިގޮތުން ބަލައި ފާސްކުރި ޝިޕްމަންޓުގެ ތެރެއިން ވަނީ ގިނަ އަދަދެއްގެ ވޭޕް ކާޓްރިޖް ފެނިފައެވެ. މި ތަކެތި ހުރީ ޕޮޓޭޓޯ ޗިޕްސް ދަޅުތަކާއި ޗޮކްލެޓް ޕައުޑަރު ޕެކެޓުތަކުގެ ތެރޭގައި ވަރަށް ބޮޑަށް ފޮރުވާފައެވެ. އަތުލައިގަނެވުނު ތަކެތީގެ ތެރޭގައި 1108 ވޭޕް ކާޓްރިޖާއި 27 ވޭޕް ޑިވައިސް ހިމެނޭކަމަށް ކަސްޓަމްސްއިން މަޢުލޫމާތު ދެއްވައެވެ.
ޤާނޫނާއި ގަވާއިދާ ޚިލާފަށް އެތެރެކުރަން އުޅުނު މި ތަކެތި މިހާރު ވަނީ ކަސްޓަމްސްގެ ބެލުމުގެ ދަށަށް ގެނެވިފައެވެ. ކާބޯތަކެތީގެ ތެރޭގައި ފޮރުވައިގެން މަނާ ތަކެތި އެތެރެކުރުން ހުއްޓުވުމަށް ކަސްޓަމްސްއިން ދަނީ މިފަދަ މައްސަލަތައް ވަރަށް ސީރިއަސްކޮށް ބަލަމުންނެވެ. ރާއްޖެއަށް އެތެރެކުރާ މުދަލުގެ ތެރޭގައި ފޮރުވައިގެން މަނާ ތަކެއްޗާއި ގަވާއިދާ ޚިލާފު ތަކެތި އެތެރެކުރުން ހުއްޓުވުމަށް ކަސްޓަމްސްއިން ދަނީ ވަރުގަދަ އޮޕަރޭޝަންތަކެއް މެދުކެނޑުމެއްނެތި ހިންގަމުންނެވެ.
މި މައްސަލައާ ގުޅިގެން އިތުރަށް ބަލަންޖެހޭ ކަންކަން ބެލުމަށްޓަކައި ކަސްޓަމްސްއިން ދަނީ މި މައްސަލަ އިތުރަށް ތަޙުޤީޤު ކުރަމުންނެވެ. މިފަދަ އަމަލުތައް ހިންގާ ފަރާތްތަކާމެދު ޤާނޫނީ ގޮތުން އަޅަންޖެހޭ އެންމެހާ ފިޔަވަޅުތައް އެޅުމަށް ކަމާބެހޭ އިދާރާތަކުން ދަނީ ގުޅިގެން މަސައްކަތް ކުރަމުންނެވެ.
ކިޔުންތެރިންގެ ހިޔާލު