2018 ވަނަ އަހަރު ރަޝިޔާގައި ބޭއްވި ފީފާ ވޯލްޑްކަޕްގެ ތިންވަނަ ހޯދާފައިވާ ބެލްޖިއަމް އިން މި ފަހަރުގެ ވޯލްޑްކަޕާއި ކުރިމަތިލަނީ 2022 ވަނަ އަހަރުގެ ވޯލްޑްކަޕްގެ ގްރޫޕް ސްޓޭޖުން ކަޓާފައިވާތީ އެ ހަނދާންތައް ފޮހެލުމުގެ އަޒުމުގައެވެ.
ވޯލްޑްކަޕްގެ ޖާގައެއް ބެލްޖިއަމް އިން ހޯދާފައިވަނީ ޔޫރަޕްގެ ކޮލިފައިންގެ ގްރޫޕް ޖޭ ގައި ކުޅުނު އަށް މެޗުގެ ތެރެއިން ފަސް މެޗުން މޮޅުވެ ތިން މެޗު އެއްވަރުކޮށް ގްރޫޕްގެ އެއްވަނަ ޓީމުގެ ގޮތުގަ އެވެ. އެއްވެސް މެޗަކުން ބަލިނުވެ މި އަށް މެޗުގައި ޖުމްލަ 29 ލަނޑު ޖަހާފައިވާއިރު ބައިކޮޅަށް ވަދެފައިވަނީ އެންމެ ހަތް ލަނޑެވެ. މި އަހަރުގެ ތެރޭގައި ބެލްޖިއަމް ކުޅުނު އެކުވެރިކަމުގެ ހަތަރު މެޗުގެ ތެރެއިން މެކްސިކޯ އާއި އެއްވަރުވެފައިވާއިރު އެމެރިކާ އާއި ކްރޮއޭޝިޔާގެ އިތުރުން ޓިއުނީޝިޔާ އާއި ދެކޮޅަށް ކުޅުނު މެޗުތަކުން ވަނީ މޮޅުވެފަ އެވެ.
މި ފަހަރުގެ ވޯލްޑްކަޕާއި ބެލްޖިއަމް ކުރިމަތިލާއިރު އެ ޓީމުގައި ތިބި މުހިންމު ކުޅުންތެރިންގެ ތެރޭގައި ގޯލުކީޕަރ ތިބޮއު ކޯޓުއާ, ނަޕޮލީގެ ކެވިން ޑި ބްރޭނާ, ޔޫރީ ޓިއެލެމަންސް, ރޮމެލޫ ލުކާކޫ, މެންޗެސްޓަރ ސިޓީގެ ޖެރެމީ ޑޯކޫ އަދި އާސެނަލްގެ ލިއާންދްރޯ ޓްރޮސާޑްފަދަ ކުޅުންތެރިން ހިމެނެއެވެ.
އެއާ ޚިލާފަށް މިސްރު މިރޭގެ މެޗަށް ބެލްޖިއަމާ ދެކޮޅަށް ނިކުން މިސްރުން އެންމެ ބޮޑަށް އަމާޒު ހިފާފައިވަނީ މީގެ ކުރިން ވޯލްޑް ކަޕްގައި ކުޅުނު ހަތް މެޗުންވެސް މޮޅެއް ހޯދިފައި ނުވާތީ އެކަން ބަދަލުކުރުމަށެވެ.
މިސްރުން ވޯލްޑްކަޕްގައި ފުރަތަމަ ކުޅެފައިވަނީ 1934 ވަނަ އަހަރު އެވެ. އޭގެ ފަހުން 1990 ވަނަ އަހަރާއި 2018 ވަނަ އަހަރުގެ ފީފާ ވޯލްޑް ކަޕަށް މިސްރު ވަނީ ކޮލިފައިވެފައެވެ.
މިފަހަރުގެ މުބާރާތަށް މިސްރުން ފުރުސަތު ހޯދާފައިވަނީ އެފްރިކާގެ ކޮލިފައިންގެ ގްރުޕް އޭ ގެ އެއްވަނަ ޓީމުގެ ގޮތުގައެވެ. ބްރުކިނަފާސޯ އާއި ސިއެރަ ލިއޯން, ގިނީ ބިސާއޫ އަދި އިތިއޯޕިއާގެ އިތުރުން ޖިބޫޓީ އާއި އެއް ގްރޫޕެއްގައި ހިމެނި މިސްރު ވަނީ ކުޅުނު 10 މެޗުގެ ތެރެއިން އަށް މެޗުން މޮޅުވެ ދެ މެޗު އެއްވަރުކޮށްފައެވެ.
މިސްރުގެ ޓީމުގެ ހުރިހާ ކާމިޔާބީއެއް ބިނާވެފައިވަނީ މުހައްމަދު ސަލާޙްއާއި މެންޗެސްޓަރ ސިޓީގެ އުމަރު މަރްމޫޝް ދައްކާ ކުޅުމަކަށެވެ. މުހައްމަދު ސަލާ ގައުމީ ޓީމަށް މިހާތަނަށް ކުޅުނު 116 މެޗުގައި ވަނީ ޖުމްލަ 67 ލަނޑު ޖަހާފައެވެ.
ކިޔުންތެރިންގެ ހިޔާލު