ޔޫއެފާ ނޭޝަންސް ލީގުގައި ރޭ ބެލްޖިއަމް އާއި ދެކޮޅަށް ފްރާންސް ކުޅުނު މެޗު 1-0 ގެ ނަތީޖާއަކުން ކާމޔާބުކޮށްފިއެވެ. މިއާއެކު ފްރާންސް ވަނީ ގްރޫޕްގެ އެއްވަނަ މަގާމަށް ވާސިލްވެފައެވެ.
މި ގްރޫޕްގައި ފްރާންސްވަނީ މިހާތަނަށް ކުޅުނު 2 މެޗުންވެސް މޮޅުވެ ޖުމްލަ 6 ޕޮއިންޓް ހޯދާފައިވާއިރު، ބެލްޖިއަމަށް ލިބިފައިވާ 3 ޕޮއިންޓާއެކު އެ ޓީމު އޮތީ ގްރޫޕްގެ ދެވަނާގައެވެ. ބެލްޖިއަމްގެ ބްރަސަލްސްގައި 40 ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގައި ގިނައިރު ބޯޅަ ހިފަހައްޓައިގެން ކުޅެ ގިނަ ފުރުސަތުތައް ތަނަވަސްކޮށްފައިވަނީވެސް ފްރާންސް އިންނެވެ.
މި މެޗަށް ފްރާންސް ނިކުތްއިރު އެ ޓީމުގެ ކޯޗު ޒިދާން ވަނީ ނޭޝަންސް ލީގުގެ ފުރަތަމަ މެޗުގައި ތުރުކީ އާއި ދެކޮޅަށް ކުޅުނު މެޗަށް ނިކުތް ޓީމަށް 9 ބަދަލެއް ގެނެސްފައެވެ. އެގޮތުން އަނިޔާގެ ސަބަބުން ފްރާންސްގެ ކެޕްޓަން އަދި އެ ޓީމަށް އެންމެ ގިނަ ލަނޑު ޖަހައިދީފައިވާ ކިލިއަން އެމްބާޕޭ ވަނީ ޓީމާއި ވަކިވެފައެވެ. ފްރާންސުން މި މެޗުގައި ޖެހި ހަމައެކަނި ލަނޑަކީ މެޗުގެ ފުރިހަމަ ވަގުތު ހަމަވާން 2 މިނިޓަށް ވެފައިވަނިކޮށް އަމިއްލަ ހާފުގެ ތެރެއިން މައިކަލް އޮލިސޭއަށް ލިބުނު ބޯޅައެއް ހިފައިގެން ގޮސް އޭނާ ޖަހާފައިވާ ހިތްގައިމު ލަނޑެކެވެ.
މި މެޗުގައި ފްރާންސަށް ލަނޑު ޖަހަން ރަނގަޅު ފުރުސަތުތަކެއް ލިބިގެންގޮސްފައިވާއިރު އެ ޓީމުގެ ޑިޒޭ ޑުއޭއަށް ވަނީ ރަނގަޅު ފަސް ފުރުސަތެއް ލިބި ބޭކާރުވެފައެވެ.
ނޭޝަންސް ލީގުގައި ދެން ފްރާންސް ނިކުންނާނީ އަންނަ ހުކުރު ދުވަހު އިޓަލީއާ ދެކޮޅަށެވެ.
ކިޔުންތެރިންގެ ހިޔާލު