މިދިޔަ އަހަރު ބޭއްވި މުޒާހަރާއެއްގައި ފުލުހުންގެ ވާޖިބަށް ހުރަސްއެޅި ކަމުގެ ތުހުމަތުގައި މާލޭ ސިޓީ ކައުންސިލްގެ ހުޅުމާލެ އުތުރު ދާއިރާގެ ކައުންސިލަރު ފާތިމަތު ޒަހިއްޔާގެ މައްޗަށް އުފުލާފައިވާ ދައުވާގެ އިބްތިދާއީ އަޑުއެހުން އަންނަ ބުދަ ދުވަހަށް ތާވަލުކޮށްފިއެވެ.
ކޯޓުން ފޮނުވާފައިވާ ޗިޓުގައިވާ ގޮތުން، މި މައްސަލައިގެ އަޑުއެހުން އޮންނާނީ އަންނަ ބުދަ ދުވަހުގެ ހެނދުނު ދިހައެއް ޖަހާއިރުއެވެ. ޒާޔާގެ މައްޗަށް މި ދައުވާ އުފުލާފައިވަނީ މިދިޔަ އަހަރުގެ އޮކްޓޯބަރު މަހުގެ ތިންވަނަ ދުވަހުގެ ރޭ އިދިކޮޅު އެމްޑީޕީން މާލޭގައި ބޭއްވި “ލޫޓުވައިފި” މުޒާހަރާގެ ތެރެއިން ފުލުހުންގެ ވާޖިބު އަދާކުރުމަށް ގަސްދުގައި ހުރަސްއެޅި ކަމަށް ބުނެއެވެ. ޕްރޮސެކިއުޓަރ ޖެނެރަލްގެ އޮފީހުން ބުނެފައިވަނީ، މި ފަރާތްތަކަށް ދައުވާކުރަނީ މުޒާހަރާގެ ތެރެއިން އާންމު ދަތުރުފަތުރަށް ހުރަސްއަޅައި، ފުލުހުންގެ އަމުރަށް ނުކިޔަމަންތެރިވެ، ވާޖިބު އަދާކުރުމަށް ހުރަސްއެޅި މައްސަލައިގައި ކަމަށެވެ.
މި ކަމާ ގުޅިގެން ޒާޔާ މިއަދު ސޯޝަލް މީޑިއާގައި ކުރި ޕޯސްޓެއްގައި ވިދާޅުވީ، އޭނާ ކޯޓަށް ހާޒިރުވާން އަންގާފައިވަނީ ރައްޔިތުން އޭނާ އިންތިޚާބުކުރި ޒިންމާ އުފުލުމަށްޓަކައި ޖަލްސާއަށް ދާން އޮތް ގަޑިއަށް ކަމަށެވެ. މިއީ ހުރަސް އެޅުމެއް ނޫންތޯ ސުވާލު އުފައްދަވަމުން، ކިތަންމެ ދައުވާއެއް ކުރިޔަސް ހަދާނެ ޑީލެއް ނުވަތަ ދެއްކޭނެ ބިރެއް ނޯންނާނެ ކަމަށާއި، މި ސަރުކާރަށް ބޯގުދު ނުކުރާނެ ކަމަށް ވެސް އޭނާ ވިދާޅުވެފައިވެއެވެ.
މި މައްސަލައިގައި ޕީޖީ އޮފީހުން ވަނީ ޒާޔާގެ އިތުރުން ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރާއި އިތުރު ބައެއްގެ މައްޗަށް ވެސް ދައުވާކޮށްފައެވެ.
ކިޔުންތެރިންގެ ހިޔާލު