ދިފާޢީ އަދި ވަޠަނީ ޚިދުމަތާބެހޭ ވަޒީރު ޙަސަން ރަޝީދު، އެމްއެންޑީއެފް ސަދަން އޭރިއާ ކޮމާންޑަށް ކުރައްވަމުން ގެންދަވާ ޒިޔާރަތުގެ ތެރެއިން ގަން އެއަރ ސްޓޭޝަންގެ މަސައްކަތްތައް ބައްލަވާލައްވައިފިއެވެ.
ވަޒީރު ޙަސަން ރަޝީދު ގަން އެއަރ ސްޓޭޝަނަށް ކުރެއްވި ޒިޔާރަތުގައި، އެމްއެންޑީއެފް އެއަރ ކޯރގެ ސިފައިންނާ ބައްދަލުކުރައްވައި އެ މަރުކަޒުގެ އެކިއެކި މަސައްކަތްތައް ވަނީ ގާތުން ބައްލަވާލައްވާފައެވެ. އަދި ޤައުމުގެ ކަނޑުގެ ސަރަޙައްދު ބެލެހެއްޓުމަށާއި ސަލާމަތްތެރިކަން ކަށަވަރުކުރުމަށް އެއަރ ކޯރ އިން ކުރިއަށްގެންދާ ޚާއްޞަ އޮޕަރޭޝަންތަކާ ގުޅޭގޮތުން މަޢުލޫމާތު ހޯއްދަވައި، އެ އޮޕަރޭޝަންތައް ހިނގަމުންދާ ގޮތް ވަޒީރު ބައްލަވާލެއްވިއެވެ.
ގަން އެއަރ ސްޓޭޝަންގެ އިތުރުން، އައްޑޫ ސިޓީ ގަމުގައި ޤާއިމްކޮށްފައިވާ އެމްއެންޑީއެފް ސަދަން އޭރިއާ ކޮމާންޑަށްވެސް ވަޒީރު ވަނީ ޒިޔާރަތްކުރައްވާފައެވެ. މި މަރުކަޒުގައި މަސައްކަތްކުރައްވާ ސިފައިންނާ ބައްދަލުކުރައްވައި، ސަދަން އޭރިއާގެ ތަރައްޤީއަށް މިހާރު ކުރިއަށްދާ މަސައްކަތްތައް ވަޒީރު ވަނީ ބައްލަވާލައްވާފައެވެ. ހަމައެއާއެކު، ސަދަން އޭރިއާގައި ފަރިތަކުރަމުންދާ ސިފައިންނަށް ކުރިމަތިވާ ގޮންޖެހުންތަކާއި ދަތިތަކާ ގުޅޭގޮތުން މަޝްވަރާކުރައްވައި، އެކަންކަމަށް ޙައްލު ހޯއްދަވައިދެއްވުމަށް ވަނީ ވާހަކަފުޅުދައްކަވާފައެވެ.
ސަދަން އޭރިއާއަށް ކުރައްވާ ދަތުރުފުޅުގެ ތެރެއިން ދެން ވަޒީރު ވަޑައިގެންނެވީ ފުވައްމުލަކު ސިޓީގައި ޤާއިމްކޮށްފައިވާ ފުވައްމުލައް ޕޯސްޓަށެވެ. އެ މަރުކަޒުގައި ތިއްބަވާ ސިފައިންނާ ބައްދަލުކުރައްވައި، މަރުކަޒުގެ މަސައްކަތްތައް ކުރިއަށްދާ ގޮތް ވަޒީރު ވަނީ ބައްލަވާލައްވާފައެވެ. އަދި ފުވައްމުލަކުގައި ޤާއިމްވެތިބޭ ސިފައިންނަށް ދަތިވާ ކަންކަން އޮޅުންފިލުއްވައި، އެކަންކަން ޙައްލުކުރުމަށް ކުރެވިދާނެ ކަންތައްތަކާ މެދު ވަނީ މަޝްވަރާކުރައްވާފައެވެ. ދިފާޢީ ވަޒީރު ޙަސަން ރަޝީދު މަޤާމާ ޙަވާލުވެވަޑައިގަތުމަށްފަހު، ރާއްޖޭގެ އެކި ސަރަޙައްދުތަކުގައި ޤާއިމްކޮށްފައިވާ ސިފައިންގެ މަރުކަޒުތަކަށް ޒިޔާރަތްކުރައްވައި ސިފައިންގެ ޙާލަތު ބައްލަވާލެއްވުމުގެ މަސައްކަތްތައް ދަނީ މެދުކެނޑުމެއްނެތި ކުރައްވަމުންނެވެ.
ކިޔުންތެރިންގެ ހިޔާލު