މޯލްޑިވްސް ނޭޝަނަލް ޑިފެންސް ފޯސްގެ ޙާލަތު ރަނގަޅުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަންގަވާފައިވާ ކަންކަން ސަރުކާރުން ކުރިއަށް ގެންދަވާނެކަމަށް މިނިސްޓަރ އޮފް ޑިފެންސް އެންޑް ނޭޝަނަލް ސަރވިސް ޙަސަން ރަޝީދު ވިދާޅުވެއްޖެއެވެ.
މިނިސްޓަރ މިހެން ވިދާޅުވީ އެމްއެންޑީއެފްގެ 134 ވަނަ އަހަރީ ދުވަސް ފާހަގަކުރުމަށް ބޭއްވި ރަސްމިއްޔާތުގައެވެ.
މިނިސްޓަރ ވިދާޅުވީ، އެމްއެންޑީއެފްގެ އަހަރީ ދުވަސް ފާހަގަކުރުމުގެ މައިގަނޑު މަޤުޞަދަކީ، ޤައުމާއި ރައްޔިތުން ޙިމާޔަތްކުރުމުގައި އެމްއެންޑީއެފްގެ ސިފައިން ވެފައިވާ ޤުރުބާނީއާއި ކޮށްފައިވާ ބުރަ މަސައްކަތްތައް ބަލައިގަތުންކަމަށެވެ. އެމްއެންޑީއެފްގެ ސިފައިންނަކީ ހިތްވަރުގަދަ ބައެއްކަމަށް ސިފަކުރައްވައި، އެމީހުންގެ އިޚްލާޞްތެރިކަން އަމިއްލަފުޅަށް ދެކެވަޑައިގެންފައިވާކަމަށް މިނިސްޓަރު ވިދާޅުވިއެވެ.
މިނިސްޓަރު ހާމަކުރެއްވި ގޮތުގައި، މަޤާމާ ޙަވާލުވެވަޑައިގަތުމަށްފަހު ރައީސް ޑރ. މުޢިއްޒުއާއެކު ބޭއްވެވި ފުރަތަމަ ބައްދަލުކުރެއްވުމުގައި، އެމްއެންޑީއެފްގެ ޙާލަތު ރަނގަޅުކުރުމަށް ރައީސް ވަނީ އަންގަވާފައެވެ.
މަރުކަޒުތަކާއި އާލާތްތައް ތަރައްޤީކުރުންއޮޕަރޭޝަނަލް އާލާތްތައް ތަރައްޤީކުރުމަށާއި، އެމްއެންޑީއެފްގެ މަރުކަޒުތަކާއި ކޭމްޕުތަކުގެ ޙާލަތު ރަނގަޅުކުރުމަށާއި، އަދި އެމްއެންޑީއެފްގެ ޔުނީފޯމާއި ސަލާމަތީ އާލާތްތައް ފެންވަރު ރަނގަޅުކުރުމަށް ރައީސް އެދިވަޑައިގެންފައިވާކަމަށް އެމަނިކުފާނު ހާމަކުރެއްވިއެވެ. މި މައްސަލަތައް ޙައްލުކުރުމުގެ މަސައްކަތް މިހާރުވެސް ފެށިފައިވާކަމަށް ވިދާޅުވެ، ރަނގަޅުކުރަންޖެހޭ އިތުރު ދާއިރާތައް ދެނެގަތުމުގެ މަސައްކަތް އެމްއެންޑީއެފްގެ ޓެކްނިކަލް ޓީމަކުން މިހާރު ކުރަމުންދާކަމަށްވެސް އެމަނިކުފާނު އިތުރުކުރެއްވިއެވެ.
މި މަސައްކަތްތަކަށް ސަރުކާރުގެ އެހެނިހެން ވުޒާރާތަކާއި ދައުލަތުގެ ކުންފުނިތަކުން ދެއްވާ އެއްބާރުލުން ފާހަގަކުރައްވައި، އެ ފަރާތްތަކުން ވެދެއްވާ އެހީތެރިކަމަށް މިނިސްޓަރ ޝުކުރުއަދާކުރެއްވިއެވެ. ދިވެހިރާއްޖޭގެ ސިޔާދަތާއި މިނިވަންކަން ރައްކާތެރިކުރުމަކީ ރައީސް މުޢިއްޒުގެ އެންމެ އިސް ސިޔާސަތުކަމުގައި ހަސަން ވިދާޅުވިއެވެ.
ކިޔުންތެރިންގެ ހިޔާލު