ދިވެހި ޤައުމިއްޔަތަށް ލޯބިކުރާ، ޒިންމާދާރު ޒުވާން ޖީލެއް ބިނާކުރުމަށް ހިންގާ ދިވެހި ވަޠަނީ ޚިދުމަތުގެ ޕްރޮގްރާމް ދެމެހެއްޓެނިވި ގޮތެއްގައި ކުރިއަށް ގެންދިއުމަކީ ސަރުކާރުގެ އެންމެ މުހިންމު އެއް ސިޔާސަތު ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ދިވެހި ވަޠަނީ ޚިދުމަތުގެ 3 ވަނަ ބެޗުގެ ތަމްރީނަށް ފުރި ދިވެހި ޒުވާން ހުރިހާ ބައިވެރިންނަށް ކާމިޔާބީއަށް އެދިވަޑައިގެން ރައީސުލްޖުމްހޫރިއްޔާ ވަނީ އެކްސްގައި ޚާއްޞަ މެސެޖެއް ހިއްސާކުރައްވާފައެވެ. މި މެސެޖުގައި އެމަނިކުފާނު ފާހަގަކުރެއްވި ގޮތުގައި، މި ތަމްރީނުގެ ތެރެއިން ދިވެހި ޤައުމިއްޔަތާއި، ޒިންމާދާރު ރައްޔިތުކަމާއި، ދީނީ ތަރުބިއްޔަތާއި އަޚްލާޤުގެ އިތުރުން ސުލޫކާއި ލީޑަރޝިޕް ދަސްކޮށްދެވޭނެއެވެ. އަދި ހަށިހެޔޮކަމާއި ދިރިއުޅުމުގެ މައިދާނުގައި ބޭނުންވާނެ ތަފާތު އެތައް ދާއިރާއަކުން ޒުވާނުންނަށް މުހިންމު ހުނަރުތަކެއް އުނގަންނައިދެވޭނެކަން އެމަނިކުފާނު ވަނީ ފާހަގަކުރައްވާފައެވެ.
ދިވެހި ވަޠަނީ ޚިދުމަތުގެ ތަމްރީނަށް ހުޅުވާލި ދެވަނަ ފުރުޞަތުގައި ގިނަ އަދަދެއްގެ ޒުވާނުން ވަނީ ބައިވެރިވުމަށް ކުރިމަތިލާފައެވެ. އެގޮތުން ކުރިމަތިލި 1785 ޒުވާނުންގެ ތެރެއިން 352 ބައިވެރިން ވަނީ ނޭޝަނަލް ސަރވިސް ޓްރޭނިންގގެ 3 ވަނަ ބެޗަށް ހޮވިފައެވެ. މި ބައިވެރިން ތަމްރީނުތައް ފުރިހަމަކުރުމަށް ހަމަޖެހިފައިވަނީ ޅ. މާފިލާފުށީގައި ޤާއިމުކޮށްފައިވާ އެމްއެންޑީއެފް ކޮމްޕޮސިޓް ޓްރޭނިންގ ސެންޓަރުގައެވެ. މި ތަމްރީނުތައް 3 މަސް ދުވަހުގެ މުއްދަތަށް އެ ރަށުގައި ކުރިއަށް ގެންދާނެއެވެ.
މިފަހަރުގެ ތަމްރީނު ޕްރޮގްރާމުގައި ރާއްޖޭގެ އެކި ކަންކޮޅުތަކުން ގިނަ އަދަދެއްގެ ޒުވާނުން ބައިވެރިވެއެވެ. ނޭޝަނަލް ސަރވިސް ޓްރޭނިންގގެ 3 ވަނަ ބެޗުގައި ރާއްޖޭގެ 20 އަތޮޅަކުން 115 ރަށަކަށް ނިސްބަތްވާ ޒުވާނުން ހިމެނެއެވެ. މީގެ ތެރޭގައި ހިމެނެނީ 64 އަންހެން ޒުވާނުންނާއި 288 ފިރިހެން ޒުވާނުންނެވެ. މި ޕްރޮގްރާމަކީ އަމިއްލަ ނަފްސަށް އިތުބާރުކުރާ އަދި ޖިސްމާނީ ގޮތުންނާއި ރޫޙާނީ ގޮތުން ދުޅަހެޔޮ ޖީލެއް ބިނާކުރުމަށް މަގުފަހިކޮށްދޭނެ މުހިންމު ޤައުމީ ހަރަކާތެކެވެ.
ކިޔުންތެރިންގެ ހިޔާލު