އައްޑޫ ސިޓީގެ ހިތަދޫގައި މިދިޔަ ހަފުތާގައި ހިނގި އެކްސިޑެންޓުގައި ބޮޑެތި އަނިޔާތަކެއް ލިބުނު ރަމީޒް އަބްދުﷲ، އޭޑީކޭ ހޮސްޕިޓަލުގައި ފަރުވާދެމުން ދަނިކޮށް މިއަދު ނިޔާވެއްޖެއެވެ.
މިދިޔަ ހަފުތާގެ އާދިއްތަ ދުވަހުގެ ރޭ ހިތަދޫ ބޮޑު މަގުގައި ދެ ސައިކަލު ޖެހިގެން ހިނގި މި ހިތާމަވެރި ހާދިސާގައި ނިޔާވެފައި ވަނީ ހިތަދުއަށް އުފަން ރަމީޒް އަބްދުﷲ އެވެ. ސޯޝަލް މީޑިއާގައި އާންމުވެފައިވާ ސީސީޓީވީ ވީޑިއޯއިން ފެންނަ ގޮތުގައި މި އެކްސިޑެންޓު ހިނގާފައިވަނީ، ބާރު ސްޕީޑުގައި ނުބައި ފަޅިން ދުއްވާފައި ދިޔަ ސައިކަލެއް ގޮސް، މަޑުން ދުއްވާފައި ދިޔަ ސައިކަލެއްގައި ޖެހިގެންނެވެ. އެކްސިޑެންޓުވި ވަގުތު މީހަކު ވިއްސައިގެން ގޮސް މަގުމައްޗަށް ވެއްޓޭ މަންޒަރު ވެސް އެ ވީޑިއޯއިން ފެނެއެވެ.
މި ހާދިސާގައި ރަމީޒަށް ލިބުނު ސީރިއަސް އަނިޔާތަކާ ގުޅިގެން އިތުރު ފަރުވާއަށް އޭނާ ވަނީ މާލެ ގެނެސްފައެވެ. އޭނާ މަރުވެފައިވަނީ އޭޑީކޭ ހޮސްޕިޓަލުގެ އައިސީޔޫގައި ފަރުވާދެމުން ދަނިކޮށް މިއަދުއެވެ.
މި ނުރައްކާތެރި އެކްސިޑެންޓާ ގުޅޭ މައްސަލަ ދިވެހި ފުލުހުންގެ ޚިދުމަތުން މިހާރު ދަނީ ތަހުގީގުކުރަމުންނެވެ.
ކިޔުންތެރިންގެ ހިޔާލު