ސަރުކާރުގެ އިދާރާތަކުން އަމިއްލައަށް އިސްނަގައިގެން މައުލޫމާތު ހާމަކުރުން ފުރަތަމަ ފަހަރަށް 100 ޕަސެންޓަށް ހާސިލުކުރުމަކީ ސަރުކާރު ޖަވާބުދާރީކުރުވުމަށް އެޅުނު މުހިންމު ފިޔަވަޅެއްކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
އިންފޮމޭޝަން ކޮމިޝަނަރު އާހިދު ރަޝީދު ހާމަކުރެއްވި ގޮތުގައި، މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ސަރުކާރުގެ 16 ވުޒާރާއަކާއި ރައީސުލްޖުމްހޫރިއްޔާގެ އޮފީހުން ވަނީ އަމިއްލައަށް އިސްނަގައިގެން މައުލޫމާތު ހާމަކުރުމުގެ ނުވަތަ ޕްރޯއެކްޓިވް ޑިސްކްލޯޒާގެ 100 ޕަސެންޓު ހާސިލުކޮށްފައެވެ. މިއީ މި ގާނޫނަށް އަމަލުކުރަން ފެށިފަހުން މި ކާމިޔާބީ ހާސިލުކުރި ފުރަތަމަ ފަހަރެވެ. ކުރިން މި ނިސްބަތް ހުރީ އެވްރެޖުކޮށް 34 ޕަސެންޓުގައެވެ.
މިކަމާ ގުޅިގެން ރައީސް ޑރ. މުއިއްޒު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، މިއީ އާންމުންނަށް ކުރިން ނުލިބޭ ގިނަ މައުލޫމާތުތަކެއް ލިބި، ސަރުކާރު ޖަވާބުދާރީކުރުވުމަށް މަގުފަހިވެގެންދާނެ ކަމެއް ކަމަށެވެ. އަދި ހާމަކަން ބޮޑު ގޮތެއްގައި ކަންކަން ކުރުމަކީ މި ސަރުކާރުގެ ހަމައެކަނި މަގުސަދު ނޫންކަމަށާއި، މައުލޫމާތު ހޯދުމުގެ ހައްގަކީ ރައްޔިތުންގެ އިތުބާރާއި ޑިމޮކްރެޓިކް ވެރިކަމެއްގެ ބިންގާކަމަށް ސަރުކާރުން ގަބޫލުކުރާކަމަށް އެމަނިކުފާނު ވިދާޅުވިއެވެ. މީގެ އިތުރުން، މި ލަނޑުދަނޑި ހާސިލުކުރުމަށް އިދާރާތަކުން ދިން އެއްބާރުލުން އެމަނިކުފާނު ފާހަގަކުރެއްވިއެވެ.
މައުލޫމާތު ހޯދައި ލިބިގަތުމުގެ ގާނޫނުގައި ބަޔާންކޮށްފައިވާ ގޮތުން، އިދާރާތަކުގެ އޮނިގަނޑާއި ހިދުމަތްތަކުގެ އިތުރުން މުވައްޒަފުންގެ މައުލޫމާތު ހިމެނޭހެން 13 ބާވަތެއްގެ މައުލޫމާތު ކޮންމެ އަހަރަކު އާންމުކުރަންޖެހެއެވެ. ސަރުކާރުން ހާމަކޮށްފައިވާ ގޮތުގައި ފާއިތުވި އަހަރުގެ މެއި މަހުން ފެށިގެން މި އަހަރުގެ މެއި މަހުގެ ނިޔަލަށް ހުށަހެޅުނު 288 މައްސަލައިގެ ތެރެއިން 233 މައްސަލައަކަށް ވަނީ ޖަވާބުދާރީވެފައެވެ. ރައީސް ޑރ. މުއިއްޒު ވަނީ، ކުރިމަގުގައި ޑިޖިޓަލް ޕްލެޓްފޯމްތައް މެދުވެރިކޮށް މައުލޫމާތު ފޯރުކޮށްދިނުން އިތުރަށް ފުޅާކުރައްވައި، ސަރުކާރުގެ ނިންމުންތަކުގައި އާންމުންގެ ބައިވެރިވުން އިތުރުކުރައްވާނެކަމުގެ ޔަގީންކަން ދެއްވާފައެވެ.
ކިޔުންތެރިންގެ ހިޔާލު