ފެބްރުއަރީ މަހު ކަނޑުމަގުން ރާއްޖެއަށް އެތެރެކުރި މުދާތަކެއްގެ ތެރޭގައި ފޮރުވައިގެން 36 ކިލޯއަށް ވުރެ ގިނަ މަސްތުވާތަކެތި އެތެރެކުރުމުގެ މައްސަލައިގައި އިސްކޮށް ހަރަކާތްތެރިވި ކަމަށް ތުހުމަތުކުރެވޭ ޕާކިސްތާނުގެ ރައްޔިތަކު ދިވެހި ފުލުހުން ހައްޔަރުކޮށްފިއެވެ.
ފުލުހުންނާއި ކަސްޓަމްސް ގުޅިގެން ފެބްރުއަރީ މަހުގެ 12 ވަނަ ދުވަހު ހިންގި ހާއްސަ އޮޕަރޭޝަނެއްގައި އަތުލައިގަތް މި ޝިޕްމެންޓާ ގުޅިގެން މީގެ ކުރިން ވަނީ ދެ ދިވެއްސަކު ހައްޔަރުކޮށްފައެވެ. އެއީ މަސްތުވާތަކެތި އެތެރެކޮށް ވިޔަފާރިކުރަން އުޅުނު ކަމުގެ ތުހުމަތުގައި ހައްޔަރުކުރި މ. މުލައް، މަދާރުގެ، ހަސަން މަފާޒު އަދި ހ. ފިލްމީސައިޓް، ވިޝާމް މުހައްމަދެވެ.
މި މައްސަލައިގައި ހަތަރު މަސް ފަހުން ކޯޓު އަމުރެއްގެ ދަށުން ފުލުހުން ހައްޔަރުކޮށްފައިވަނީ އުމުރުން 51 އަހަރުގެ ޒަފަރް އަހްމަދެވެ. ފުލުހުން ކޯޓުގައި މައުލޫމާތު ދީފައިވާ ގޮތުގައި، ރާއްޖޭގައި ދިރިއުޅެމުންދާ މި މީހާއަކީ ރާއްޖެއަށް މުދާ އެތެރެކުރާ ކުންފުންޏެއްގެ އިސް މަގާމެއްގައި ހުރި ފަރާތެކެވެ. އަދި 36 ކިލޯގެ މަސްތުވާތަކެތި އެތެރެކުރުމުގެ މައިގަނޑު ރޭވުންތެރިޔަކީ އޭނާ ކަމަށް ފުލުހުން ވަނީ ތުހުމަތުކޮށްފައެވެ.
ޒަފަރް އަހްމަދު ހައްޔަރުކުރުމަށްފަހު، އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، އޭނާގެ ބަންދަށް ވަނީ އިތުރު 15 ދުވަހުގެ މުއްދަތެއް ދީފައެވެ. ކޯޓު އަމުރުގައި ބަޔާންކޮށްފައިވާ ގޮތުން، މި މުއްދަތު ދީފައިވަނީ އޭނާއަށް ގާނޫނީ ވަކީލަކާ ބައްދަލުކުރުމުގެ ފުރުސަތު ލިބިފައިނުވާތީ އެކަމަށް މަގުފަހިކޮށްދިނުމުގެ ގޮތުންނެވެ.
ކިޔުންތެރިންގެ ހިޔާލު