ރާއްޖޭގެ ހުރިހާ ރަށެއްގައި ފުލުހުންގެ މަރުކަޒުތައް ގާއިމްކުރުމުގެ މަޝްރޫއުގެ ދަށުން މާޗު މަހުގެ ނިޔަލަށްް އިތުރު 11 މަޝްރޫއެއްގެ މަސައްކަތް ނިމޭނެ ކަމަށް ހޯމް މިނިސްޓަރު އަލީ އިހްސާން ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު އިހްސާން ވިދާޅުވީ ފުލުހުންގެ ހިދުމަތް މުޅި ރާއްޖެއަށް ފުޅާކުރުމަށް ހިންގާ އުމްރާނީ ތަރައްގީގެ މަޝްރޫއުގެ ދަށުން ވަކިވަކި 153 މަރުކަޒެއްގެ މަސައްކަތް ކުރެވެމުންދާ ކަމަށެވެ.
މި މަޝްރޫއުތަކުގެ ތެރޭގައި ގިނައީ މުޅިން އަލަށް އިމާރާތްކުރާ ޕޮލިސް ސްޓޭޝަންތަކާއި ޕޮލިސް ޕޯސްޓުތަކުގެ މަސައްކަތެވެ. އަދި ބައެއް ރަށްރަށުގައި މިހާރު ހުރި މަރުކަޒުތަކުގެ ޖާގަ ތަނަވަސްކޮށް އެތަންތަނަށް ގެންނަންޖެހޭ ބަދަލުތައް ގެނައުމުގެ މަސައްކަތްވެސް މި މަޝްރޫއުގެ ތެރޭގައި ހިމެނެއެވެ.
މުޅީން އަލަށް މި ސަރުކާރުން ފެށި މަޝްރޫއުތަކުގެ ތެރެއިން ދެ މަޝްރޫއެއް ނިމި، އެ މަރުކަޒުތަކުން މިހާރު ރައްޔިތުންނަށް ހިދުމަތްދެމުންދާކަމަށް ވެސް މިނިސްޓަރު ވިދާޅުވިއެވެ.
މީގެއިތުރުން މި އަހަރުގެ ފުރަތަމަ ކުއާޓާގެ ނިޔަލަށް އިތުރު 11 މަޝްރޫއެއް ނިމި، އެ މަރުކަޒުތުން ރައްޔިތުންނަށް ހިދުމަތް ފޯރުކޮށްދޭން ފެށޭނެ ކަމަށް ވެސް އޭނާ ވިދާޅުވިއެވެ.
“މީގެ ތެރެއިން ދިވެހި ސަރުކާރާ އަދުގެ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ހަވާލުވެވަޑައިގެންނެވި ފަހުން ފެށުނު ދެ ޕްރޮޖެކްޓެއް ނިންމައި އެ ދެ ޕޮލިސް ސްޓޭޝަނު ވާނީ ދިވެހި ރައްޔިތުންގެ ހިދުމަތަށް ނެރެފައި. މީގެ އިތުރުން މާޗު މަހުގެ ނިޔަލަށް އިތުރު 11 ޕްރޮޖެކްޓެއް ނިންމައި އެ ސްޓޭޝަންތައް ދިވެހި ފުލުހުންގެ ހިދުމަތުން ރައްޔިތުންގެ ހިދުމަތަށް ނެރޭނެ،” އިހުސާން ވިދާޅުވިއެވެ.
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ރާއްޖޭގެ ވެރިކަމާ ހަވާލުވެވަޑައިގަތްއިރު ރާއްޖޭގައި ފުލުހުންގެ ހިދުމަތް ގާއިމުކުރެވިފައި ނެތް ހުރިހާ ރަށެއްގައި މިހާރު އެ ހިދުމަތްވަނީ ގާއިމުކޮށް ނިންމާފައެވެ.
ކިޔުންތެރިންގެ ހިޔާލު