ސިޔާސީ ފައިދާ ހޯދުމުގެ ނިޔަތުގައި ދީނީ ހލާފުތައް އުފައްދައި ބައިބައިކުރުވައި، އާންމުންނަށް އޮޅުވާލައިގެން ނުވާނެ ކަމަށް ވިދާޅުވެ ކުރީގެ ރައީސް އަބްދުﷲ ޔާމީނަށް ހޯމް މިނިސްޓަރު އަލީ އިހުސާން މިއަދު ވަރަށް ބޮޑަށް ރައްދު ދެއްވައިފިއެވެ.
ރަސްމާލޭގައި ޔޫއޭއީގެ އީގަލް ހިލްސްއިން ހިންގަން އުޅޭ މަޝްރޫއަކީ ރާއްޖޭގައި ޔަހޫދީ އާބާދީއެއް ގާއިމުކުރަން ކުރާ ކަމެއް ކަމަށް ތުހުމަތު ކުރައްވައި ކުރީގެ ރައީސް ޔާމީން ދެއްކެވި ވާހަކަފުޅުތަކާ ގުޅިގެން ސަރުކާރުގެ އިސް އޮފިޝަލުން ވަނީ ވަރަށް ބޮޑަށް ކަންބޮޑުވުން ފާޅުކުރައްވައިފައެވެ. އެގޮތުން ހޯމް މިނިސްޓަރު އަލީ އިހުސާން ވިދާޅުވީ ރަސްމާލެ މަޝްރޫއަކީ ޔަހޫދީ އާބާދީއެއް ގާއިމުކުރުން ކަމަށް ބުނެ ދައްކާ ވާހަކައަކީ ހަގީގަތް އޮޅުވާލުމަށް ދައްކާ ކަނޑައެޅިގެން ދޮގު ވާހަކައެއް ކަމަށެވެ. އަދި ފަލަސްތީނަށް ދިވެހި ރައްޔިތުން ކުރާ ދެގޮތެއް ނުވާ ތާއީދަކީ ބިރުވެރިކަމާއި ނަފްރަތާއި ސައްހަ ނޫން މައުލޫމާތު ފެތުރުމަށް ބޭނުންކުރާ ސިޔާސީ ހަތިޔާރަކަށް ހަދައިގެން ނުވާނެ ކަމަށް ވެސް އެމަނިކުފާނު ވިދާޅުވިއެވެ.
މިކަމާ ގުޅޭގޮތުން އިތުރަށް ވާހަކަދައްކަވަމުން މިނިސްޓަރު އިހުސާން ވިދާޅުވީ ސިޔާސީ ގޮތުން ކޮޅަށް ހުރުމަށްޓަކައި ދީނީ ބައިބައިވުންތައް އުފައްދައި އާންމުންނަށް އޮޅުވާލުން ހުއްޓާލަންޖެހޭ ކަމަށެވެ. އަދި ގައުމީ ތަރައްގީއަކީ އަމިއްލަ ސިޔާސީ ހަސަދަވެރިކަމެއްގެ ތެރެއިން ގެއްލިގެންދާ އެއްޗަކަށް ހަދައިގެން ނުވާނެ ކަމަށާއި ދިވެހިރާއްޖެއަށް ހައްގުވަނީ ޒިންމާދާރު ލީޑަރޝިޕެއް ކަމަށް ވެސް އެމަނިކުފާނު ފާހަގަކުރެއްވިއެވެ.
މި މަޝްރޫއާ ގުޅޭގޮތުން ޕީއެންސީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވެސް ވަނީ ރައްދު ދެއްވައިފަ އެވެ. އެމަނިކުފާނު ވިދާޅުވީ ދިވެހި ރައްޔިތުންނަކީ ބަޔަކު ޖަހާހާ ބެރަކަށް ނަށާ ވަރަށް ވުރެ މާ ބޮޑަށް ތަސައްރަފު ފުދިފައި ތިބި ބައެއް ކަމަށެވެ. އަދި ރައީސް ޑރ. މުހައްމަދު މުއިއްޒުގެ ވެރިކަމުގައި ލަހެއް ނުވެ މި ބިޔަ މަޝްރޫއު ފެށިގެންދާނެ ކަމަށާއި، މި މަޝްރޫއު ކުރިއަށް ދާނީ ގާނޫނުއަސާސީއާ އެއްގޮތްވާގޮތުގެ މަތިން ކަމަށް ވެސް އަބްދުއްރަހީމް ވިދާޅުވިއެވެ.
ކިޔުންތެރިންގެ ހިޔާލު