ބޭރުގެ ކުންފުނިތަކަކަށް އޮޅުވާލައި ސައްހަ ނޫން ޓެލެގްރަފިކް ޓްރާންސްފާ ފޮނުވައިގެން ބޮޑެތި އަދަދުތަކުން މުދާ ހޯދި މައްސަލާގައި ދައުލަތުން ކުރި އެކި ދައުވާތައް ސާބިތުވެ، 109 އަހަރަށް ޖަލަށް ލާފައިވާ ހުސައިން ޝިފާއު، ޞިއްޙީ ޙާލަތާ ގުޅިގެން ވަގުތީގޮތުން ގޭބަންދަށް ބަދަލުކޮށްފައިވާ ކަމަށް ހޯމް މިނިސްޓަރު ޢަލީ އިޙުސާން ވިދާޅުވެއްޖެއެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ވިދާޅުވީ ޖަލުތަކާ ބެހޭ ޤާނޫނުގައިވާ ގޮތުގެ މަތިން ޖަލުގައި ހުރެގެން ފަރުވާ ދެވެން ނެތް ޙާލަތްތަކުގައި މީހުން ވަގުތީގޮތުން ގެއަށް ބަދަލުކުރެވޭނެ ކަމަށެވެ. އެގޮތުން ޝިފާއު ފުރަތަމަ އެއް މަސްދުވަހަށް ގެއަށް ބަދަލުކޮށްފައިވަނީ މެޑިކަލް ކޮންޑިޝަނަށް ބެލުމަށްފަހު ކަމަށާއި، އިތުރު މުއްދަތެއް ދޭނީ އެ މުއްދަތުގެ ތެރޭގައި ޙާލަތު ރަނގަޅުނުވާ ނަމަ ޑޮކްޓަރުންގެ ލަފާގެ މމަތިން ކަމަށް އޭނާ ވިދާޅުވިއެވެ.
ޝިފާއު ގޭބަންދަށް ބަދަލުކުރީ ކަނޑައެޅިފައިވާ ޝަރުތުތަކަކާ އެކުގައި ކަމަށާއި އެ ޝަރުތުތަކާ ޚިލާފުވާ ނަމަ ވަގުތުން ޖަލަށް އަނބުރާ ގެންދާނެ ކަމަށް ވެސް މިނިސްޓަރު ވިދާޅުވިއެވެ.
ޝިފާއުގެ މައްޗަށް މިދިޔަ އަހަރުގެ ޑިސެމްބަރު މަހު ކްރިމިނަލް ކޯޓުން މި ޙުކުމް އިއްވާފައިވަނީ ސައްހަ ނޫން ލިޔުން ދިނުމާއި، މަކަރާއި ހީލަތް ހެދުމުގެ އިތުރުން މަނީ ލޯންޑްރިންގެ ކުށް ސާބިތުވުމާ ގުޅިގެންނެވެ. އޭނާގެ މައްޗަށް 23 ދައުވާއެއް އުފުލާފައިވާ އިރު، މި ޙުކުމާ އެކު އޭނާ ވެފައިވަނީ ރާއްޖޭގައި އެކެއްގެ މައްޗަށް އެންމެ ދިގު މުއްދަތެއްގެ ޖަލު ޙުކުމެއް އައި އެއް ބޭފުޅަކަށެވެ.
ކިޔުންތެރިންގެ ހިޔާލު