އީރާނުގެ ކުރީގެ ރޫޙާނީ އެންމެ މަތީ ވެރިޔާ ޢަލީ ޚާމަނާއީގެ އަނބިކަނބަލުން އަވަހާރަވެއްޖެ ކަމަށް އެ ޤައުމުގެ ރަސްމީ މީޑިއާއިން ރިޕޯޓްކޮށްފިއެވެ.
އީރާނުގެ ރަސްމީ މީޑިޔާ އިން ބުނީ އަވަހާރަވެފައިވާ ރޫޙާނީ އެންމެ މަތީ ވެރިޔާ އާޔަތުﷲ ޢަލީ ޚާމަނާއީގެ އަނބިކަނބަލުން މަންޞޫރާ ޚުޖަސްތާ ބާޤިރުޒާދާ މިއަދު އަވަހާރަވެފައިވާ ކަމަށެވެ.
މީޑިއާ ރިޕޯޓްތައް ބުނާގޮތުގައި، މަންޞޫރާ ޚުޖަސްތާ އަވަހާރަވީ މިދިޔަ ހޮނިހިރު ދުވަހު އިސްރާއީލާއި އެމެރިކާގެ އަސްކަރީ މަތިންދާބޯޓުތަކުން ދިން ވައިގެ ޙަމަލާތަކުގައި ލިބުނު ސީރިއަސް އަނިޔާތަކަށް ފަރުވާ ދެމުންދަނިކޮށް މިއަދުގެ ވަގުތެއްގައެވެ.
މަންޞޫރާ ޚުޖަސްތާ ބާޤިރުޒާދާ އުފަންވެވަޑައިގަތީ 1947 ވަނަ އަހަރު އީރާނުގެ މަޝްހަދުގައެވެ. އެކަމަނާއަކީ ދީނީ ގޮތުން ނުފޫޒުގަދަ އަދި އިޙްތިރާމް ލިބިގެންވާ ބޮޑު ޢާއިލާއަކަށް ނިސްބަތްވެވަޑައިގަންނަވާ ބޭކނބަލެކެވެ.
އެކަމަނާ ޢަލީ ޚާމަނާއީއާ ކައިވެނި ބައްލަވައިގަތީ 1965 ވަނަ އަހަރުއެވެ. އެ ދެމަފިރިންނަށް ހަ ބޭފުޅުން ލިބިވަޑައިގެންފައިވެއެވެ. އެއީ ހަތަރު ފިރިހެން ބޭފުޅުންނާއި ދެ އަންހެން ބޭފުޅުންނެވެ.
އީރާނުގެ ރޫޙާނީ އެންމެ މަތީ ވެރިޔާ ޢަލީ ޚާމަނާއީ އަވަހާރަވީ މިދިޔަ ހޮނިހިރު ދުވަހު، ތެހެރާނަށް އިސްރާއީލާއި އެމެރިކާއިން ދިން ވަރުގަދަ ވައިގެ ޙަމަލާތަކެއްގައެވެ.
މި ޙަމަލާތަކުގައި ޚާމަނާއީގެ އިތުރުން އެމަނިކުފާނުގެ އަންހެން ދަރިކަނބަލަކާއި، ދަނބިދަރިކަލަކާއި، ކާފަ ދަރިކަލެއްގެ އިތުރުން ޅީދަރިކަނބަލަކު ވެސް ވަނީ އަވަހާރަވެފައެވެ.
ކިޔުންތެރިންގެ ހިޔާލު