މީހުން ދިރިއުޅޭ ރަށްރަށް ކައިރީގައި ސަފާރީތައް ބާއްވައިގެން ރަށްރަށް ބަނގުރާ ގެންގޮސް އިސްލާމްދީނުގައި ހަރާމްކުރައްވާފައިވާ އަމަލުތައް ހިންގަމުންދާތީ ރަށްރަށާ ކައިރީގައި ސަފާރީ ބޭއްވުން މަނާކުރަން ރައީސް ޑރ. މުހައްމަދު މުއިއްޒު ނިންމަވައިފިއެވެ.
ރައީސް މިކަން ހާމަކުރެއްވީ ވެރިކަންކުރާ ޕީއެންސީގެ އޮފީސް ހުޅުވުމަށް މިރޭ ބޭއްވި ޖަލްސާގައި ވާހަކަފުޅުދައްކަވަމުންނެވެ.
ރައީސް ވިދާޅުވީ ލޯކަލް ޓޫރިޒަމް ހިންގާ ރަށްރަށް ކައިރީގައި ސަފާރީތައް ބާއްވައިގެން ނުގަވާއިދުން ބަނގުރާ ވިއްކުމުގެ ކަންކަން ހިންގަމުންދާ ކަމުގެ ޝަކުވާ ލިބެމުންދާ ކަމަށެވެ.
އެހެންކަމުން މީހުން ދިރިއުޅޭ ކޮންމެ ރަށަކާ މަދުވެގެން އެއް ކިލޯ މީޓަރު ދުރުގައި ނޫނީ ސަފާރީ ނުބޭއްވޭ ގޮތަށް އުސޫލު ބަދަލުކޮށް، ވަރަށް އަވަހަށް ގެޒެޓްކުރާނެ ކަމަށް ރައީސް ވިދާޅުވިއެވެ.
“ސަފާރީ ތަކަކީ ލައިސަންސެއް އޮވެގެން، ރިސޯޓުތަކުގައި އޮންނަ ގޮތަށް ލައިސަންސް އޮވެގެން އެ ސަފާރީގައި ނިދައި ޓޫރިސްޓުންނަށް ރާ ވިއްކުމުގެ ހުއްދަ އޮންނަ، ލައިސަންސް އޮންނަ ބައެއް. ގަވާއިދު މި ބަދަލުކުރަނި މީހުން ދިރިއުޅޭ ރަށްރަށާ، މީހުން ދިރިއުޅޭ ކޮންމެ ރަށެއްގެ ވެސް އެއް ކިލޯމިޓަރު ދުރުގައި ކަމަށް ސަފާރީ ބޭއްވޭނީ،” ރައީސް ވިދާޅުވި އެވެ.
މީގެއިތުރުން ލޯކަލް ޓޫރިޒަމް ތަރައްގީކުރަން ވެސް ސަރުކާރުން މަސައްކަތް ކުރަމުން އަންނަ ކަމަށެވެ. އެގޮތުން ލޯކަލް ޓޫރިޒަމް ފުޅާވަމުން އަންނަ ރަށްރަށުގައި ޑޮލަރު އޭޓީއެމްތައް ބަހައްޓަމުން އަންނަ ކަމަށް ރައީސް ވިދާޅުވިއެވެ.
ކިޔުންތެރިންގެ ހިޔާލު