އަންނަ އަހަރަށް ލަފާކޮށް ދައުލަތުގެ ބަޖެޓު ހުށަހެޅުމުގެ ކުރިން، އަންހެނުންގެ ތަރައްގީއަށް މަސައްކަތްކުރާ ރަށްރަށުގެ ކޮމިޓީތަކަށް ރަށްރަށުގެ ކައުންސިލްތަކުން ދޭ ބަޖެޓު ދެ ގުނަ ބޮޑުކުރަން ރައީސް ޑރ. މުހައްމަދު މުއިއްޒު ނިންމަވައިފިއެވެ.
“އެކްސް”ގައި މިރޭ ރައީސް ވިދާޅުވީ މި ބަދަލު ގެނައުމަށް ސަރުކާރުން ނިންމީ އަންހެނުންގެ ތަރައްގީއަށް މަސައްކަތްކުރާ ކޮމިޓީތައް އިތުރަށް ބާރުވެރިކުރުވުމަށް ޓަކައެވެ.
ސަރުކާރުން ނިންމާފައިވަނީ އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ބަޖެޓު ދެގުނަކުރުމުގެ އިތުރުން، އެ ކޮމިޓީތަކުގެ މެންބަރުންނަށް ދޭ ރަމަޟާން މަހުގެ އިނާޔަތްތައް ކޮމިޓީތަކުގެ ބަޖެޓުން ދިނުމުގެ ބަދަލުގައި ކައުންސިލްތަކުގެ ބަޖެޓުން ދޭ ގޮތަށް ހަމަޖެއްސުމަށް ކަމަށް ރައީސް ވިދާޅުވިއެވެ.
މި ބަދަލުތައް އަންނަ އަހަރަށް ލަފާކުރާ ބަޖެޓު، އަންނަ އޮކްޓޯބަރު މަހުގެ ފަހުކޮޅު ހުށަހެޅުމުގެ ކުރިން ސަރުކާރުން ގެންނާނެ ކަމަށް، އެމަނިކުފާނު ވިދާޅުވިއެވެ.
އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ މެންބަރުންނަށް ރޯދަ އިނާޔަތް ލިބޭ ގޮތް ހެދީ މިދިޔަ ފެބްރުއަރީ މަހުގެ 19ވަނަ ދުވަހުގައެވެ.
ކިޔުންތެރިންގެ ހިޔާލު