އިންޑިއާއަށް އެކި ބޭނުންތަކުގައި ދަތުރުކުރާ ބޭރު ގައުމުތަކުގެ މީހުންނަށް ފަސޭހަކޮށްދިނުމުގެ ގޮތުން، އެ ގައުމުގެ ވިސާ ދޫކުރުމުގެ އޮނިގަނޑަށް ބޮޑެތި އިސްލާހީ ބަދަލުތަކެއް ގެނެސްފިއެވެ.
މި ބަދަލުތަކުގެ ދަށުން، މީގެ ކުރިން އޮތް 13 ވިސާ ކެޓަގަރީ ވަނީ 9 އަކަށް މަދުކޮށްފައެވެ. އަދި 49 ސަބް ކެޓަގަރީގެ އަދަދު 23 އަށް ތިރިކޮށް، ވިސާއަށް އެދި ހުށަހަޅާއިރު ފުރަންޖެހޭ މައުލޫމާތުތައް %65 އާއި %70 އާ ދެމެދުގެ މިންވަރަކަށް ވަނީ މަދުކޮށްފައެވެ. އިންޑިއާ ސަރުކާރުން ބުނީ މި ބަދަލަކީ ދަތުރުވެރިންނަށް އެ މީހަކު ބޭނުންވާ ވިސާއެއް ފަސޭހައިން ދެނެގަނެވޭނެ ގޮތް ހަމަޖެއްސުމަށް ގެނައި ބަދަލެއް ކަމަށެވެ.
އާ އުސޫލުގެ ދަށުން ދޫކުރާ މައިގަނޑު ކެޓަގަރީތަކަކީ: ބިޒްނަސް، ޑިޕްލޮމެޓިކް، ވޯކް، ޖާނަލިސްޓް، މެޑިކަލް، އޮފިޝަލް، ސްޓޫޑެންޓް، ވިޒިޓާ އަދި މިސަލޭނިއަސް ވިސާއެވެ.
މައިގަނޑު ބަދަލުތައް:
-
ވިޒިޓާ ވިސާ: ކުރިން 'ޓޫރިސްޓު ވިސާ' ގެ ގޮތުގައި ދެމުން އައި ވިސާގެ ނަން 'ވިޒިޓާ ވިސާ' އަށް ބަދަލުކޮށް، ދެ ބަޔަކަށް ވަނީ ބަހާލައިފައެވެ. އެއީ ކުރު މުއްދަތުގެ ވިޔަފާރި ބައްދަލުވުންތަކާއި ސަގާފީ ކަންކަމަށް ހާއްސަ 30 ދުވަހުގެ މަލްޓިޕަލް-އެންޓްރީ 'ވީ-1' ވިސާ އާއި، 1 އަހަރާއި 10 އަހަރާ ދެމެދުގެ މުއްދަތަށް ދޫކުރާ 'ވީ-2' ވިސާއެވެ.
-
މެޑިކަލް ވިސާ: އާންމު ބޭސްފަރުވާއަށް 'އެމް-1' އަދި އޯލްޓަނޭޓިވް ބޭސްވެރިކަމަށް 'އެމް-3' ވިސާ ތައާރަފުކޮށްފައިވާއިރު، މި ވިސާތައް ދޫކުރާނީ 1 އަހަރުގެ މަލްޓިޕަލް-އެންޓްރީގެ ގޮތުގައެވެ. މީގެއިތުރުން ބަލިމީހާގެ އެހީތެރިންނަށް ހާއްސަ ވިސާތަކެއް ('އެމް-2' އަދި 'އެމް-4') ވެސް ވަނީ ކަނޑައަޅައިފައެވެ. މިއީ ތަކުރާރުކޮށް ޑޮކްޓަރަށް ދައްކަންޖެހޭ ފަރާތްތަކަށް ލިބުނު ބޮޑު ލުޔެކެވެ.
-
ސްޓޫޑަންޓް ވިސާ: ސްކޫލް އަދި ޔުނިވާސިޓީ ދަރިވަރުންނަށް 'އެސް-1' އަދި ޕީއެޗްޑީ، ރިސާޗް ހަދާ ފަރާތްތަކަށް 'އެސް-2' ވިސާ ވަނީ ހަމަޖައްސައިފައެވެ. 'ސްޓަޑީ އިން އިންޑިއާ' ޕޯޓަލް މެދުވެރިކޮށް ރަޖިސްޓްރީވާ ދަރިވަރުންނަށް ކޯހުގެ މުއްދަތަށް (ގިނަވެގެން 5 އަހަރަށް) މަލްޓިޕަލް-އެންޓްރީ ވިސާ ލިބޭނެއެވެ.
-
ބިޒްނަސް ވިސާ: ދިގު މުއްދަތުގެ ވިޔަފާރި އިންވެސްޓްމަންޓްތަކަށް 'ބީ-1' އަދި ކުރު މުއްދަތުގެ ކޮންޓްރެކްޓް މަސައްކަތްތަކާއި ކޮންފަރެންސްތަކަށް 'ބީ-2' ވިސާ ވަނީ ކަނޑައަޅައިފައެވެ.
ދިވެހިންނަށް ކުރާނެ އަސަރު:
ދެ ގައުމުގެ ދެމެދުގައި އޮންނަ ވިސާ އެއްބަސްވުމުގެ ދަށުން، ޗުއްޓީއަށާއި އާންމު ބޭސްފަރުވާއަށް ދަތުރުކުރާ ދިވެހިންނަށް ކުރިއެކޭ އެއްގޮތަށް އެއްވެސް އަގަކާ ނުލައި 90 ދުވަހުގެ އޮން-އެރައިވަލް ވިސާ ލިބެމުންދާނެއެވެ. ނަމަވެސް، ދިގު މުއްދަތަށް ބޭސްފަރުވާ ކުރަންޖެހޭ ދިވެހިންނަށާއި، އިންޑިއާގައި ކިޔަވާ ދަރިވަރުންގެ އިތުރުން ވިޔަފާރިވެރިންނަށް އަލަށް ގެނައި މި އިސްލާހުތަކުގެ ސަބަބުން ބޮޑެތި ލުއިފަސޭހަތަކެއް ލިބިގެންދާނެއެވެ.
ޚިޔާލު ފާޅުކުރައްވާ
ކޮމެންޓްތައް
މި ލިޔުމަށް އަދި ޚިޔާލެއް ފާޅުކޮށްފައެއް ނުވެއެވެ.