ހުޅުމާލެ ރުއްގަނޑު 1 ކައިރީގައި ހުންނަ ކެފޭއެއްގައި ގޭސްފުޅިއެއް ގޮވައި ހިނގި އަލިފާނުގެ ހާދިސާގައި އަނިޔާވެގެން ހުޅުމާލެ ހޮސްޕިޓަލަށް ގެންދިޔަ 4 މީހުންގެ ތެރެއިން 2 މީހަކު ފަރުވާ ދިނުމަށްފަހު ދޫކޮށްލައިފިއެވެ.

މި ހާދިސާ ހިނގާފައި ވަނީ މިއަދު ހެނދުނު 10:00 ހާއިރުއެވެ. ގޭސްފުޅި ގޮވައި ރޯވި ހާދިސާގައި ޖުމްލަ 5 މީހަކަށް އެކި ވަރުގެ އަނިޔާތައް ލިބުނެވެ. ހޮސްޕިޓަލަށް ފަރުވާއަށް ގެންދިޔަ 4 މީހުންނަކީ ވެސް އެ ކެފޭގައި މަސައްކަތްކުރާ ބިދޭސީން ކަމަށް ފުލުހުން މައުލޫމާތު ދެއެވެ.

ހުޅުމާލޭ ހޮސްޕިޓަލުން ބުނި ގޮތުގައި ދެ މީހަކު ދޫކޮށްލި ނަމަވެސް، ބާކީ ތިބި ދެ މީހުންނަށް ދަނީ އެ ހޮސްޕިޓަލުގެ ވޯޑުގައި ފަރުވާ ދެމުންނެވެ. ނަމަވެސް އެ މީހުންނަށް ލިބިފައިވާ އަނިޔާގެ ތަފުސީލެއް ހޮސްޕިޓަލުން ހާމައެއް ނުކުރެއެވެ.

އިޝްތިހާރު އިޝްތިހާރު

މި ހާދިސާ ހިނގި ވަގުތު ކެފޭގައި ތިބި އެއްވެސް ކަސްޓަމަރަކަށް އަނިޔާއެއް ލިބިފައެއް ނުވެއެވެ. އަދި ކެފޭގެ އިމާރާތަށާއި ބަދިގޭގައި ހުރި މުދަލަށް ވެސް ބޮޑު ގެއްލުމެއް ލިބިފައެއް ނުވެއެވެ. ނަމަވެސް ގޭސްފުޅި ގޮވި ބާރު އަޑާއެކު ކަސްޓަމަރުން އަވަހަށް ބޭރަށް ނުކުންނަން އުޅުމުގެ ތެރޭގައި ކެފޭގެ ބައެއް ތަށިތައް ވެއްޓި ތަޅައިގެން ގޮސްފައިވާ ކަމަށް ފުލުހުން ބުންޏެވެ.

މި ހާދިސާއާ ގުޅިގެން ބަލަންޖެހޭ ކަންކަން ފުލުހުން ދަނީ އިތުރަށް ތަހުގީގު ކުރަމުންނެވެ.