ހިތުގެ ދުވަހާ ގުޅިގެން މުޅި ރާއްޖޭގައި ޚާއްސަ ހަރަކާތްތަކެއް ބާއްވައިފިއެވެ.
މާލޭގެ އިތުރުން، ރަށްރަށުގައި މިއަދު ހަވީރު ކުރިއަށްދިޔަ މި ހަރަކާތުގައި، އެންމެން އެއްކޮށް ހިތުގެ ބައްޓަމަށް ހުއްޓިލައިގެން ތިބެ ވަގުތުކޮޅެއް ހޭދަކޮށްފައިވެއެވެ.
މާލޭގައި ބޭއްވި ހަރަކާތް އޮތީ، ހުޅުމާލޭ ފޭސް2ގެ ރުއްގަނޑު-3ގައެވެ. މިހަރަކާތްތައް ޝަރަފުވެރިކޮށްދެއްވީ، ސިއްޙަތާއި އާއިލާއާއި އިޖުތިމާޢީ ހުނަރުތައް ތަރައްްޤީ ކުރުމާބެހޭ ވަޒީރު ޤީލާ އަލީއެވެ.
މީގެއިތުރުން އެކި އުމުރު ފުރާގެ މީހުންނަށް ބައިވެރިވެވޭ ގޮތަށް ސްޓޯލްތަކެއް ޤާއިމްކޮށްފައިވެއެވެ. ސްޓޯލްތަކުގައި ކުރިއަށް ގެންދިޔަ ހަރަކާތްތަކުގެ ތެރޭގައި، ހިތާއި، ހިތުގެ ދުޅަހެޔޮކަމާބެހޭ މަޢުލޫމާތު ޙިއްސާކުރުމާއި، ޒުމްބާ، ކުޑަކުދިންނަށް ބައިވެރިވެވޭ ހަރަކާތްތައް އަދި ހަކުރާއި، ބްލަޑް ޕްރެޝަރ ވަގުތުން ޗެކްކުރުން ހިމެނެއެވެ.
މީގެއިތުރުން މިހަރަކާތުގެ ބައިވެރިންވަނީ ޕްލެޖް ބޯޑެއްގައި އެ މީހެއްގެ ހިތާމެދު އެ މީހަކު ވާ އަހުދެއް ނުވަތަ ދޭ މެސެޖެއް ޙިއްސާކޮށްފައެވެ.
މި ހަރަކާތުގައި ސިއްޙަތާބެހޭ ވުޒާރާ، ޓައިނީ ހާޓްސް އޮފް މޯލްޑިވްސް، ދުނިޔޭގެ ސިއްޙަތު ޖަމިއްޔާ، ހައުސިން ޑިވެލޮޕްމެންޓް ކޯޕަރޭޝަން، ނޭޝަނަލް ސެންޓަރ ފޯރ ކާޑިއޮލަރ ވަސްކިއުލަރ ޑިޕާޓްމެންޓާއި، ހުޅުމާލެ ހޮސްޕިޓަލް، މޯލްޑިވިއަން ރެޑްކްރެސެންޓް، އަރބަން ޕްރައިމަރީ ހެލްތު ކެއަރ ސެންޓަރ، މޯލްޑިވިއަން ފިޒިއޯތެރަޕީ އެސޯސިއޭޝަން، ފެކަލްޓީ އޮފް ހެލްތު ސައިންސް އަދި ނޭޝަނަލް ޑައިބެޓީސް ސެންޓަރުން ބައިވެރިވެފައިވެއެވެ.
ދުނިޔޭގެ ހިތުގެ ދުވަސް ފާހަގަކުރަނީ، ކޮންމެ އަހަރެއްގެވެސް ސެޕްޓެމްބަރު މަހުގެ 29 ވަނަ ދުވަހުގައެވެ. މި އަހަރުގެ ހިތުގެ ދުވަހުގެ ޝިއާރަކީ، ޑޯންޓް މިސް އަ ބީޓެވެ.
ރާއްޖޭގެ ހާލަތަށް ބަލާއިރު 2020-2021 އަށް ކުރި ދިރާސާއަކުން ދައްކާގޮތުން، ރާއްޖޭގައި 15 އަހަރާއި 65 އަހަރާއި ދެމެދުގެ %4.7 މީހުންނަކީ، ހިތުގެ ބަލި، ސްޓްރޯކް އަދި އެންޖީނާ ފަދަ ބަލިތައް ޖެހިފައިވާ މީހުންނެވެ.
ކިޔުންތެރިންގެ ހިޔާލު