ރަސްމާލޭގައި ތަރައްޤީކުރުމަށް ހަމަޖެހިފައިވާ ވޯޓަރފްރަންޓް އަދި މެރީނާ މަޝްރޫޢަކީ ރާއްޖޭގެ އިޤްތިޞާދީ ދުވެލި އަވަސްކޮށް، ބޭރުގެ އިންވެސްޓްމަންޓްތައް އިތުރުކުރުމުގެ އިތުރުން ދިވެހިންނަށް ގިނަގުނަ ވަޒީފާގެ ފުރުޞަތުތައް ފަހިކޮށްދޭނެ މުހިންމު މަޝްރޫޢެއް ކަމަށް ބަޔާންކޮށް މޯލްޑިވްސް ބިޒްނަސް ޗެމްބަރ (އެމްބީސީ) އިން އެ މަޝްރޫޢަށް ފުރިހަމައަށް ތާޢީދުކޮށްފިއެވެ.

މިކަމާ ގުޅިގެން އެމްބީސީން ނެރުނު ބަޔާނެއްގައި ފާހަގަކޮށްފައިވާ ގޮތުގައި، މި މަޝްރޫޢުގެ ސަބަބުން ރާއްޖޭގެ އިޤްތިޞާދު އާންމުކޮށް ބަރޯސާވާ ދާއިރާތަކުގެ އިތުރަށް އެހެން ދާއިރާތަކަށް ވެސް މަގުފަހިވެ، ޚާއްޞަކޮށް އަންނަން އޮތް ޖީލުތަކަށް ދިގު މުއްދަތުގެ އިޤްތިޞާދީ ފާގަތިކަން ގެނެސްދޭނެއެވެ.

އެމްބީސީން ހާމަކުރި ތަފާސްހިސާބުތަކަށް ބަލާއިރު، މި މަޝްރޫޢަކީ ގާތްގަނޑަކަށް 20 ބިލިއަން ޔޫއެސް ޑޮލަރު (ގާތްގަނޑަކަށް 308 ބިލިއަން ރުފިޔާ) ގެ އިންވެސްޓްމަންޓް އަގުހުރި މަޝްރޫޢެކެވެ. އިބްތިދާއީ އަންދާޒާތަކުން ދައްކާ ގޮތުގައި މި މަޝްރޫޢުގެ ދަށުން 30 ބިލިއަން ޑޮލަރަށްވުރެ ގިނަ ބޭރުގެ ސީދާ އިންވެސްޓްމަންޓް ޤައުމަށް ގެނެވިދާނެއެވެ. އަދި ސީދާ ގޮތުންނާއި ނުސީދާ ގޮތުން 54،000 އަށްވުރެ ގިނަ ވަޒީފާ އުފެދި، އަހަރަކު 1 މިލިއަނަށްވުރެ ގިނަ ފަތުރުވެރިން ޒިޔާރަތްކޮށް، މަޝްރޫޢު ފުރިހަމަވުމުން އަހަރަކު 2 ބިލިއަން ޑޮލަރުގެ ފަތުރުވެރިކަމުގެ އާމްދަނީއެއް ޤައުމަށް ލިބިގެންދާނެ ކަމަށް ވެސް އެ ޖަމްޢިއްޔާއިން ފާހަގަކުރެއެވެ.

އިޝްތިހާރު އިޝްތިހާރު

މީގެއިތުރުން، އެތެރޭގެ އުފެއްދުންތެރިކަން އިތުރުކޮށް، ކުދި އަދި މެދުފަންތީގެ ވިޔަފާރިތަކަށް މި މަޝްރޫޢުގެ ސަބަބުން ބޮޑެތި ފުރުޞަތުތަކެއް ހުޅުވިގެންދާނެ ކަމަށް އެމްބީސީން ބުނެއެވެ. މީގެ ތެރޭގައި ޢިމާރާތްކުރުމާއި، ދަނޑުވެރިކަމާއި، މަސްވެރިކަމާއި، ހޮސްޕިޓާލިޓީ، ލޮޖިސްޓިކްސް، ރީޓެއިލް، ޓެކްނޮލޮޖީ އަދި ޕްރޮފެޝަނަލް ޚިދުމަތްތަކުގެ ދާއިރާއިން ވިޔަފާރިތަކަށް އައު މާކެޓްތައް ތަނަވަސްވެގެންދާނެއެވެ.

އެމްބީސީގެ ބަޔާނުގައި އިތުރަށް ބާރުއަޅާފައިވަނީ މި މަޝްރޫޢުގެ ކާމިޔާބީ މިނެކިރަންވާނީ ހަމައެކަނި ލިބޭ އިންވެސްޓްމަންޓާއި ފަތުރުވެރިކަމުގެ އާމްދަނީން އެކަނި ނޫން ކަމަށެވެ. އޭގެ ބަދަލުގައި، ދިވެހިންނަށް އުފައްދައިދޭ ވަޒީފާގެ ފުރުޞަތުތަކާއި، ދިވެހި ވިޔަފާރިތަކުގެ ކުރިއެރުމާއި، ޒުވާނުން ބިނާކުރުމަށް ދަސްކޮށްދެވޭ ހުނަރުތަކާއި، ޤައުމަށް ޖަމާކުރެވޭ މުއްސަނދިކަމަށް ބަލައިގެން ކަމަށްވެސް ބުނެފައިވެއެވެ.

އެހެންކަމުން، ރާއްޖެއިން މުދަލާއި ޚިދުމަތް ހޯދުމާއި، ސަޕްލަޔަރުންގެ ގޮތުގައި ދިވެހިން ބައިވެރިކުރުމާއި، ހުނަރު އިތުރުކުރުމުގެ އިތުރުން އިންވެސްޓްމަންޓްގެ ފުރުޞަތުތައް ދިވެހި ވިޔަފާރިވެރިންނަށް ފަހިކޮށްދީ، އެފަރާތްތަކުގެ ދައުރު ވަރުގަދަކުރުމަށް އެމްބީސީން ވަނީ ގޮވާލާފައެވެ. ދިވެހި ވިޔަފާރިތަކަށް ވާދަކުރުމުގެ ފުރުޞަތު ފަހިކޮށްދިނުމަކީ، މި މަޝްރޫޢުން ލިބޭ އިޤްތިޞާދީ މަންފާ ރާއްޖޭގެ އެތެރޭގައި ހިފެހެއްޓުމަށް އެޅޭނެ މުހިންމު ބާރެއް ކަމުގައިވެސް އެ ޖަމްޢިއްޔާއިން ދެކެއެވެ.

މޯލްޑިވްސް ބިޒްނަސް ޗެމްބަރުން ސިފަކުރި ގޮތުގައި ރަސްމާލެ މަޝްރޫޢަކީ ރާއްޖޭގެ އިޤްތިޞާދު ސިންދަފާތުކޮށް، ދައުލަތުގެ އާމްދަނީ އިތުރުކުރުމަށާއި، ބޯހިޔާވަހިކަމާއި އުމްރާނީ ތަރައްޤީ ހަރުދަނާކޮށް، ކުރިމަގުގެ ޖީލުތަކަށް ވާދަވެރި ވިޔަފާރީގެ މާޙައުލެއް ޤާއިމުކުރުމަށް އެޅޭ ވަރަށް އުންމީދީ އަދި ހެޔޮ ފިޔަވަޅެކެވެ.