ޔޫއެފާ ނޭޝަންސް ލީގުގައި ރޭ ތުރުކީގެ މައްޗަށް 1-3 ގެ ނަތީޖާއަކުން އިޓަލީ ކުރިހޯދައިފިއެވެ.
އިޓަލީއަށް މި މެޗުން މޮޅުވުމާއިއެކު ވަނީ ގްރޫޕް 1 ގެ ދެވަނަ މަގާމް ލިބިފައެވެ. އިޓަލީން ވަނީ ނޭޝަންސް ލީގުގައި މިހާތަނަށް ކުޅުނު 4 މެޗުން 7 ޕޮއިންޓް ހޯދާފައެވެ. ތުރުކީއަށް ހަތަރު މެޗު ކުޅުނުއިރު އަދި ޕޮއިންޓެއް ލިބިފައެއް ނުވެއެވެ.އިޓަލީގައި 30 ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގެ 26 ވަނަ މިނިޓުގައި ޖިއާންލޫކާ ސްކަމާއްކާ ވަނީ ލަނޑެއް ޖަހާ އިޓަލީއަށް ކުރި ހޯދަދީފައެވެ.
މި މެޗުގެ ފުރަތަމަ ހާފުގެ ކުޅުން ނިމުނުއިރު 1-0 ގެ ނަތީޖާއަކުން އިޓަލީ ކުރީގައި އޮތް ނަމަވެސް ދެވަނަ ހާފުގެ ކުޅުން ފެށުނުތާ 16 ވަނަ މިނިޓުގައި ތުރުކީގެ އަރަލް ސިމްޗީރް ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފައެވެ. ނަމަވެސް އޭގެ 4 މިނިޓު ފަހުން އިޓަލީއިން ވަނީ ލަނޑެއް ޖަހާ މި މެޗުގައި ދެވަނަ ފަހަރަށް ކުރި ހޯދާފައެވެ. މި ލަނޑު އެ ޓީމަށް ކާމިޔާބުކޮށްދީފައިވަނީ ލިވަޕޫލްއަށް ކުޅެމުންދާ ރިކާޑޯ ކަލަފިއޯރީއެވެ.
އިޓަލީއަށް މި މެޗުން ތިން ޕޮއިންޓް ކަށަވަރުކޮށްދީފައިވަނީ މެޗުގެ ފުރިހަމަ ވަގުތު ހަމަވާން 3 މިނިޓަށް ވެފައިވަނިކޮށް އިންޓަރ މިލާނަށް ކުޅެމުންދާ އުމުރުން 21 އަހަރުގެ ފްރެންޗެސްކޯ ޕިއޯ އެސްޕެސީތޯ ކާމިޔާބުކޮށްދީފައިވާ ލަނޑުންނެވެ.
އިޓަލީގެ ކޯޗު ކަމާއި ރޮބާޓޯ މަންޗީނީ ހަވާލުވިފަހުން އެ ޓީމުން ވަނީ މިހާތަނަށް ހަތަރު މެޗު ކުޅެފައިވާއިރު 2 މެޗުން މޮޅުވެ، އެއް މެޗުން އެއްވަރުވެ އަދި އެއް މެޗުން ވަނީ ބަލިވެފައެވެ.
ކިޔުންތެރިންގެ ހިޔާލު