މާލޭގެ މަގު ހެދުމުގެ މަޝްރޫޢުތައް ނިމިގެންދާއިރު އަލިފާނުގެ ހާދިސާތަކަށް އިޖާބަދިނުމަށް މިހާރަށްވުރެ ބޮޑަށް ފަސޭހަވެގެންދާނެ ކަމަށް ދިފާޢީ އަދި ވަޠަނީ ޚިދުމަތާބެހޭ ވަޒީރު ޙަސަން ރަޝީދު ވިދާޅުވެއްޖެއެވެ.
މިރޭ ބޭއްވި އަހާފޯރަމްގައި ވާހަކަފުޅުދައްކަވަމުން ވަޒީރު ޙަސަން ރަޝީދު ވިދާޅުވީ، މާލޭގައި ހިނގާފާނެ އަލިފާނުގެ ހާދިސާތަކުން ރައްކާތެރިވުމަށް ދިފާޢީ ބާރުން ޚާއްސަ ސަމާލުކަމެއްދީގެން މަސައްކަތްތަކެއް ކުރަމުންދާ ކަމަށެވެ. އަދި މިފަދަ ހާދިސާތަކުގައި ވީހާވެސް އަވަހަށް އިޖާބަދީ އަލިފާން ނިއްވުމަށް ގިނަ މަސައްކަތްތަކެއް ކުރަމުންދިޔަ ނަމަވެސް، މިހާރު ހުރި ބައެއް އިންތިޒާމުތަކުގެ ސަބަބުން މަސައްކަތްތަކަށް ހުރަސްއެޅޭ ކަމަށް އެމަނިކުފާނު ފާހަގަކުރެއްވިއެވެ.
ޗައިނާ ސަރުކާރުގެ ހިލޭ އެހީގެ ދަށުން ކުރިއަށްދާ ޒަމާނީ ފެންވަރުގެ މަގު ހެދުމުގެ މަޝްރޫޢުތައް ނިމުމުން އެފަދަ ހުރިހާ ދަތިތަކަކަށް ދެމެހެއްޓެނިވި ހައްލެއް ލިބިގެންދާނެ ކަމަށް ވަޒީރު ވިދާޅުވިއެވެ.
މާލޭގައި އަލިފާނުގެ ހާދިސާތައް އިތުރުވަމުންދާ މައިގަނޑު ސަބަބަކީ ހަނި ތަންތަނުގައި ދިރިއުޅެންޖެހުން ކަމަށާއި، އެފަދަ ތަންތަނުގައި ކަރަންޓު ވަޔަރުކޮށްފައި ހުންނަނީ އެކަށީގެންވާ މިންގަނޑަކަށް ނޫންކަމަށް މައުލޫމާތު ލިބިފައިވެއެވެ. މީގެ އިތުރުން ހަނި ގޯޅިތަކަށް ފަޔަރ ވެހިކަލްތަކަށް ނުވަދެވުމާއި، ފެން ހޮޅި ވަޅުލާފައި ހުންނަ ސަރަޙައްދުތަކުގައި އުޅަނދުފަހަރު ޕާކުކޮށްފައި ހުރުމަކީ އަލިފާން ނިއްވުމުގައި ދިމާވާ ބޮޑު ގޮންޖެހުމެއްކަން ވަޒީރު ފާހަގަކުރެއްވިއެވެ.
ފެންވަރު ދަށް ގޭސް ރެގިއުލޭޓަރު ބޭނުންކުރުމުގެ ސަބަބުންވެސް ބައެއް ނުރައްކާތައް ކުރިމަތިވާކަން ފާހަގަކޮށް، މިފަދަ ކަންކަމުން ރައްޔިތުން ހޭލުންތެރިކުރުމަށް ޚާއްސަ ޕްރޮގްރާމްތައް ހިންގަމުންދާ ކަމަށް ދިފާޢީ ވަޒީރު ވިދާޅުވިއެވެ.
ސަރުކާރުން މިހާރުވެސް ދަނީ މާލޭގެ މަގުތައް ތަރައްޤީކުރުމަށް އިސްކަމެއްދީގެން މުހިންމު މަޝްރޫޢުތަކެއް ހިންގަމުންނެވެ. އެގޮތުން ބޮޑުތަކުރުފާނު މަގުގެ ބޮޑުބައެއް ފުޅާކޮށް ޒަމާނީ ފެންވަރަށް ތަރައްޤީކޮށްފައިވާއިރު، މާލެއާ ވިލިމާލެ ހިމެނޭހެން ޗައިނާގެ އެހީގައި ހިންގާ މަގު ހެދުމުގެ އައު މަޝްރޫޢުތައް ފެށުމަށް މިހާރު ދަނީ ތައްޔާރުވަމުންނެވެ.
ކިޔުންތެރިންގެ ހިޔާލު