މާލެ ސަރަޙައްދުގެ މަގުތަކަކީ ހިނގާބިގާވެ އުޅޭ ފަރާތްތަކަށާއި އުޅަނދު ދުއްވާ ފަރާތްތަކަށް ރައްކާތެރި ތަނަކަށް ހެދުމުގެ ގޮތުން، ވަކި ގަޑިތަކެއްގައި ބަރު އުޅަނދާއި މުދާ އުފުލާ އުޅަނދު ދުއްވުން މިނިސްޓްރީ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑުން އިޢުލާނަކުން މަނާކޮށްފިއެވެ.
މި ނިންމުމަކީ މަގުމަތީގެ ތޮއްޖެހުން ކުޑަކޮށް އާންމުންގެ ސަލާމަތްތެރިކަން ކަށަވަރުކުރުމަށް އެޅި ފިޔަވަޅެކެވެ. ސަރުކާރުގެ އަމާޒަކީ އެންމެންނަށް ވެސް އަމާން މާހައުލެއް ގާއިމުކޮށްދިނުމެވެ.
އަލަށް އަމަލުކުރަން ފެށި އުސޫލުގައިވާ ގޮތުން ހެނދުނު 6:00 އިން 8:30 އަށް، 350 ކިލޯއަށްވުރެ މަތީގެ މުދާ އުފުލާ އުޅަނދުތައް ދުއްވުން ވަނީ މަނާކޮށްފައެވެ. މީގެއިތުރުން ފޯކްލިފްޓާއި ޓްރަކާއި ކްރޭން އަދި ޓްރެއިލަރ ފަދަ ބަރު އުޅަނދުތައް ވެސް އެ ވަގުތުތަކުގައި ދުއްވުން ވަނީ މަނާކޮށްފައެވެ.
މި މަނާކުރުން ހިނގާނީ ބޮޑުތަކުރުފާނު މަގު ފިޔަވައި މާލޭގެ އެހެނިހެން މަގުތަކުގައެވެ. އަދި ހުޅުމާލޭގެ މަގުތަކުގެ އިތުރުން ސިނަމާލެ ބުރިޖާއި ހައިވޭގައި ވެސް މި ވަގުތުތަކުގައި އެފަދަ އުޅަނދުތައް ދުއްވުން ވަނީ މަނާކޮށްފައެވެ.
މީގެއިތުރުން ހެނދުނު 11:30 އިން މެންދުރު 1:30 އަށް ވެސް ބަރު އުޅަނދުތައް ދުއްވުން މަނާވާނެއެވެ. މި މުއްދަތުގައި ވެސް ބޮޑުތަކުރުފާނު މަގު ފިޔަވައި މާލޭގެ އެހެން މަގުތަކުގައާއި ބުރިޖު އަދި ހައިވޭގައި ދުއްވުން މަނާވާނެއެވެ.
ސްކޫލް އޮންނަ ދުވަސްތަކުގައި ސްކޫލްތައް ފެށޭ ގަޑިއާއި ނިމޭ ގަޑިތަކުގައި ސްކޫލް ސަރަޙައްދުތަކުގައި އެއްވެސް ބަރު އުޅަނދެއް ދުއްވުން ވަނީ މަނާކޮށްފައެވެ. އެ ވަގުތުތަކުގައި އެފަދަ އުޅަނދުތަކުގައި މުދާ އުފުލުމަކީ ވެސް މަނާކަމެއް ކަމަށް މިނިސްޓްރީން ބުނެއެވެ.
މި އުސޫލާ ޚިލާފުވާ ފަރާތްތަކާ މެދު އެއްގަމު ދަތުރުފަތުރުގެ ޤާނޫނުގެ ދަށުން ފިޔަވަޅު އަޅާނެ ކަމަށް މިނިސްޓްރީން ވަނީ ހާމަކޮށްފައެވެ.
ކިޔުންތެރިންގެ ހިޔާލު