އަންނަ އަހަރު ފާހަގަކުރުމަށް ހަމަޖެހިފައިވާ “ވިޒިޓް މޯލްޑިވްސް އިޔަރ” ނުވަތަ ރާއްޖެއަށް ޒިޔާރަތްކުރުމުގެ އަހަރުގެ ކެމްޕެއިން ރަސްމީކޮށް އިފްތިތާޙުކޮށްފިއެވެ.
ޤައުމީ ފަތުރުވެރިކަމުގެ ދުވަސް ފާހަގަކުރުމަށް ބޭއްވި ޚާއްޞަ ރަސްމިއްޔާތުގެ ތެރެއިން މި ކެމްޕެއިން އިފްތިތާޙުކުރުމާއެކު، ކެމްޕެއިންގެ ރަސްމީ ލޯގޯ އާއި ރަސްމީ ލަވަ އަދި ބްރޭންޑިން ވަނީ އާންމުކޮށް ދައްކާލާފައެވެ.
މި ކެމްޕެއިން ރަސްމީކޮށް އިފްތިތާޙުކޮށްދެއްވީ ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން އަދި މި ރަސްމިއްޔާތުގެ ޚާއްޞަ މެހެމާން، މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) ގެ ޗެއަރޕާސަން ނިޝާން ޢިއްޒުއްދީނުގެ ޢިއްޒަތުގެ ވެރިޔާ ޙުސައިން ޢަފީފެވެ. އަންނަ އަހަރަކީ ރާއްޖެއަށް ޒިޔާރަތްކުރުމުގެ އަހަރުގެ ގޮތުގައި ފާހަގަކުރަން ނިންމަވާފައިވާކަން އެންމެ ފުރަތަމަ އިޢުލާނުކުރެއްވީ، މިއަހަރުގެ ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ.
މި ރަސްމިއްޔާތުގައި ވާހަކަފުޅުދައްކަވަމުން ފަތުރުވެރިކަމާ ބެހޭ ވަޒީރު މުޙައްމަދު އަމީން ވިދާޅުވީ، މިއީ ހުރިހާ އެންމެންގެ ޝާމިލުވުން އޮންނަ ޤައުމީ ކެމްޕެއިނެއް ކަމަށެވެ. އެހެންކަމުން ކޮންމެ ރަށަކާއި، ރިސޯޓަކާއި އަދި ފަތުރުވެރިކަމުގެ ސިނާޢަތުގެ ހުރިހާ ފަރާތްތަކެއްގެ ބައިވެރިވުން މި ކެމްޕެއިންގެ ތެރެއިން އޮތުމަކީ ނުހަނު މުހިންމު ކަމެއް ކަމުގައި ވަޒީރު ފާހަގަކުރެއްވިއެވެ.
ރާއްޖެއަށް ޒިޔާރަތްކުރުމުގެ އަހަރުގެ ކެމްޕެއިން އިފްތިތާޙުކުރުމުގެ އިތުރުން، އަންނަ އަހަރު ރާއްޖޭގެ ފަތުރުވެރިކަމުގެ އެވޯޑު ދޭނެ ދާއިރާތައްވެސް މި ރަސްމިއްޔާތުގައި ވަނީ އިޢުލާނުކޮށްފައެވެ. 2022 ވަނަ އަހަރު ދޭން ފެށި މި އެވޯޑު މިހާތަނަށް ދެމުން އައީ ރިސޯޓުތަކާއި، ހޮޓާތަކާއި، ގެސްޓްހައުސްތަކުގެ އިތުރުން ސަފާރީ އުޅަނދުފަހަރާއި ފަތުރުވެރިންނަށް ޚިދުމަތްދޭ ތަންތަނަށެވެ. ނަމަވެސް އަންނަ އަހަރުން ފެށިގެން އެވޯޑު ދިނުމަށް ހަމަޖެހިފައިވަނީ މުޅިން އައު ހަތަރު ދާއިރާއަކުންނެވެ. މި ބަދަލުގެ ބޭނުމަކީ ސިނާޢަތުން ފޯރުކޮށްދޭ ޚިދުމަތްތަކުގެ އިތުރުން، އެ ޚިދުމަތް ފޯރުކޮށްދޭ ފަރާތްތަކާއި އެކަން ކުރާ ގޮތްތައްވެސް އަގުވަޒަންކުރުން ކަމަށް ފަތުރުވެރިކަމާ ބެހޭ ވުޒާރާއިން ބުންޏެވެ.
އަންނަ އަހަރު އެވޯޑު ދިނުމަށް ކަނޑައެޅި ފުރަތަމަ ދާއިރާއަކީ އިންސާނީ ވަސީލަތް ބިނާކުރުމުގެ ދާއިރާއެވެ. މި ދާއިރާއިން މުވައްޒަފުންގެ ދުޅަހެޔޮކަމުގެ އެވޯޑާއި، މުވައްޒަފުން ބިނާކުރުމުގެ މަސައްކަތުގެ އެވޯޑު އަދި އަންހެނުން ބާރުވެރިކުރުމުގެ އެވޯޑު ދިނުމަށް ވަނީ ހަމަޖެހިފައެވެ. ދެވަނަ ދާއިރާއަކީ ދެމެހެއްޓެނިވިކަމުގެ ދާއިރާއެވެ. މި ދާއިރާއިން އިޖުތިމާޢީ ބައިވެރިވުމާއި، ސަގާފަތާއި ތަރިކައިގެ ޕްރޮމޯޝަންގެ އިތުރުން ތިމާވެށީގެ ދެމެހެއްޓެނިވިކަމުގެ އެވޯޑު ދޭނެއެވެ. ފަތުރުވެރިކަމާ ބެހޭ ވުޒާރާއިން ބުނީ މި ދެ ދާއިރާއިން އެވޯޑަށް ކުރިމަތިލުމުގެ ފުރުޞަތު ރިސޯޓުތަކާއި، ގެސްޓްހައުސްތައް އަދި ހޮޓާތަކަށް އޮންނާނެ ކަމަށެވެ.
ތިންވަނަ ދާއިރާއެއްގެ ގޮތުގައި ކަނޑައަޅާފައިވަނީ ޒިޔާރަތްކުރާ މީހުންގެ ތަޖުރިބާގެ ދާއިރާއެވެ. މި ދާއިރާއިން ޓްރެވަލް އޭޖެންސީ ޚިދުމަތާއި، އެކޮމޮޑޭޝަން ޚިދުމަތާއި، ޑައިވް އަދި މޫދުގެ ހަރަކާތްތަކުގެ އިތުރުން މުޅިން އަލަށް ރަށްރަށަށް ދޭ އެވޯޑު ހިމެނެއެވެ. ރަށްރަށުގެ އެވޯޑަށް ކުރިމަތިލުމުގެ ފުރުޞަތު ދިނުމަށް ހަމަޖެހިފައިވަނީ ރަށު ކައުންސިލްތަކަށެވެ. ހަތަރުވަނަ ދާއިރާއަކީ ފަރުދީ ފެންވަރުގައި ފާހަގަކޮށްލެވޭ ފަރާތްތަކުގެ ދާއިރާއެވެ. މި ދާއިރާއިން ޓުއަރ ގައިޑިންގ، މަންޒިލުގެ ކުރިއެރުމަށް ކުރާ މަސައްކަތްތައް، އީޖާދީ މަސައްކަތްތައް، ހުނަރުތައް ތަރައްޤީކުރުން، ޚިދުމަތުގެ ފަންވަރު، އަދި ފަތުރުވެރިކަމުގެ ވާހަކަތައް ހިއްސާކުރުމުގެ އައު ލީޑަރުންގެ އެވޯޑު ހިމެނެއެވެ.
މި އެވޯޑުތަކަށް ކުރިމަތިލުމުގެ ފުރުޞަތު އަންނަ އަހަރުގެ ފުރަތަމަ ކުއާޓަރުގެ ތެރޭގައި ރަސްމީކޮށް ހުޅުވާލާނެ ކަމަށް ފަތުރުވެރިކަމާ ބެހޭ ވުޒާރާއިން ވަނީ ބުނެފައެވެ
ކިޔުންތެރިންގެ ހިޔާލު