އައްޑޫ ސިޓީގެ ކަރަންޓުގެ ހިދުމަތާ ސްޓެލްކޯ އިން ދެވަނަ ފަހަރަށް މިއަދު ރަސްމީކޮށް ހަވާލުވެއްޖެއެވެ.
މާލެ ފިޔަވައި އެންމެ ބޮޑު އާބާދީއެއް އޮންނަ އައްޑޫ ސިޓީގެ ކަރަންޓުގެ ހިދުމަތާ ސްޓެލްކޯއިން ހަވާލުވުމާ ހަމައަށް އެ ސިޓީއަށް އެ ހިދުމަތް ދެމުން އައީ ފެނަކަ ކޯޕަރޭޝަނުންނެވެ. މިއީ އައްޑޫގެ ކަރަންޓުގެ ހިދުމަތް ފޯރުކޮށްދިނުމާ ސްޓެލްކޯއިން ހަވާލުވި ދެވަނަ ފަހަރެވެ.
އައްޑޫގެ ކަރަންޓުގެ ހިދުމަތާ ހަވާލުވުމުގެ ގޮތުން ސްޓެލްކޯގެ މެނޭޖިން ډިރެކްޓަރު ޑރ. އަލީ އަޒުވަރު އެ ސިޓީއަށް ކުރެއްވި ޒިޔާރާތުގައި މިއަދު ވަނީ އައްޑޫގެ މައި އިންޖީނުގެއަށް ވަޑައިގެން އެ އިމާރާތުގައި ސްޓެލްކޯގެ ދިދަ ނަންގަވައިދެއްވައިފަ އެވެ. އަދި މަރަދޫފޭދޫ އޮފީހަށް ވަޑައިގެން، އެ ތަނުގައިވެސް ސްޓެލްކޯގެ ދިދަ ވަނީ ނަންގަވައިދެއްވައިފަ އެވެ.
މި ޒިޔާރާތުގައި މަރަދޫފޭދޫ އޮފީހުގެ މުވައްޒަފުންނާ މުހާތަބުކުރައްވައި ވާހަކަދައްކަވަމުން އަޒުވަރު ވިދާޅުވީ ސްޓެލްކޯއިން އައްޑޫގެ ކަރަންޓުގެ ހިދުމަތާ ދެވަނަ ފަހަރަށް ހަވާލުވުމަކީ އެ ސިޓީގެ ރައްޔިތުންނަށް އާ އުއްމީދުތަކެއް ގެނުވި ކަމެއް ކަމަށެވެ. އަދި ޒަމާނީ ވަސީލަތްތަކާއެކު ދެމެހެއްޓެނިވި، ފެންވަރު ރަނގަޅު ހިދުމަތެއް ރައްޔިތުންނަށް ފޯރުކޮށްދޭނެ ކަމަށް އޭނާ ވިދާޅުވި އެވެ.
އައްޑޫ ސިޓީއަށް ފެނާއި ނަރުދަމާގެ ހިދުމަތްވެސް ދެމުން އައީ ފެނަކައިން ކަމަށްވިޔަސް، މާދަމާއިން ފެށިގެން އެ މަސައްކަތް އެމްޑަބްލިއުއެސްސީގެ ބެލުމުގެ ދަށަށް ބަދަލުކުރުމަށް ވަނީ ނިންމައިފަ އެވެ.
ރާއްޖޭގެ ރަށްރަށަށް ފެނާއި ނަރުދަމާ އަދި ކަރަންޓުގެ ހިދުމަތް ދެމުން އައި ފެނަކަ ކޯޕަރޭޝަން އުވާލައި، ރާއްޖޭގެ ހުރިހާ ރަށެއްގެ ކަރަންޓުގެ ހިދުމަތް ދިނުން ސްޓެލްކޯގެ ބެލުމުގެ ދަށަށް ބަދަލުކުރަން ނިންމެވިކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ އިޢުލާން ކުރައްވައިފަ އެވެ. ފަންނީ ބޭފުޅުންގެ ލަފާގެ މަތިން ސަރުކާރުން އެގޮތަށް ނިންމެވީ ފެނަކައަކީ ދެމެހެއްޓެނިވި ގޮތެއްގައި ރަނގަޅަށް ހިންގިދާނެ ކުންފުންޏެއް ނޫން ކަމަށްވާތީ އެވެ.
ކިޔުންތެރިންގެ ހިޔާލު