މެލޭޝިޔާގެ ކުރީގެ ބޮޑުވަޒީރު ޑރ.މަހާތިރު މުހައްމަދުގެ އަނބިކަނބަލުން ސިއްތި ހަސްމާ މުހައްމަދު އަލީ އަވަހާރުވުމާ ގުޅިގެން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު މަހާތިރަށް ތައުޒިޔާ ވިދާޅުވެއްޖެއެވެ.
ރައީސްގެ ތައުޒިޔާގެ މެސެޖުގައި، އެކަމަނާ އަވަހާރަވި ހަބަރު ލިބިވަޑައިގަތުމަކީ ފުން ހިތާމައެއް ލިބިވަޑައިގަތްކަމެއްކަން ހާމަކުރައްވަމުން، ސިއްތި ހަސްމާ މެލޭޝިޔާއަށް ކުރެއްވި އަގުހުރި ހިދުމަތްތައް ފާހަގަކުރެއްވިއެވެ. އެގޮތުން މެލޭޝިޔާގެ ފުރަތަމަ އަންހެން ޑޮކްޓަރުންގެ ތެރެއިން ބޭފުޅެއްގެ ހައިސްޔަތުން، ދަރިމައިވުމުގެ ސިއްހަތާއި ރަށްފުށުގެ އަންހެނުންގެ ތަރައްގީކޮށް ކުރެއްވި މަސައްކަތްޕުޅު ފާހަގަކުރެއްވިއެވެ.
އަދި އެ ހިދުމަތްތަކުގެ ހަދާންތައް ފުން އިހުތިރާމާއެކު ދެމިގެންދާނެކަމަށާއި، އެ ހިދުމަތްތަކުގެ މަންފާ މުސްތަގުބަލުގައިވެސް އެ ގައުމުގެ ރައްޔިތުންނަށް ލިބެމުންދާނެ ކަމުގައި ރައީސް ވިދާޅުވިއެވެ.
އިތުރަށް ރައީސް ފާހަގަކުރެއްވީ މިންތީގެ ހަމަހަމަކަން ގާއިމުކުރުމާއި އާއިލީ ދުޅަހެޔޮކަން ގާއިމުކުރުމަށް ފެށުނު މަސައްކަތްތަކުގައި ސިއްތި ހަސްމާ އަދާކުރެއްވި މުހިއްމު ދައުރަކީ، މުޖުތަމައަށް ހިދުމަތްކުރައްވަައި، މުސްތަގުބަލުގެ ޖީލުތައް ބާރުވެރިކުރެއްވުމަށް އެކަމަނާގެ މުޅި ހަޔާތްޕުޅުގައި ދެއްވި އަހަންމިއްޔަތު ރަމްޒުކޮށްދޭ ކަންތައްތަކެއް ކަމެވެ.
މަހާތިރާއި އެމަނިކުފާނުގެ އާއިލާއަށް ރައީސްވަނީ ދިވެހި ސަރުކާރާއި ރައްޔިތުންގެ ނަމުގައި ތައުޒިޔާ އަރިސްކުރައްވާފައެވެ. އަދި މި ފުން ހިތާމަ އިހުސާސްކުރަމުންދާ އެންމެހާ ފަރާތްތަކަަށް ކެތްތެރިކަން މިންވަރުކުރެއްވުން އެދިވަޑައިގެން ދުއާކުރެއްވިއެވެ.
އަދި އެކަމަނާގެ ހަހުރަވެތި ޛިކުރާތަކާއި ކޮށްދެއްވި އަގުހުރި ހިދުމަތްތަކާއި، އުނގަންވައިދެއްވި އަގުކުރުންތަކަކީ އެކަމަަނާގެ އާއިލާއާއި، އެކަމަނާގެ ހިދުމަތުން ހެޔޮ އަސަރުކުރި އަދަދުނުވާހާ މެލޭޝިޔާ ރައްޔިތުންނަށް ލިބިގެންދާ ތަސައްލީއެއްކަމަށްވާނެ ކަމުގައި އުންމީދުކުރައްވާކަމަށްވެސް ރައީސް ވިދާޅުވިއެވެ.
ރައީސްގެ ތައުޒިޔާގެ މެސެޖު ނިންމަަވައިލެއްވީ ސިއްތި ހަސްމާގެ ހެޔޮ އަމަލުތައް ގަބޫލުކުރައްވައި އެކަމަނާއަށް ސުވަރުގޭގެ މަތިވެރި ނިއުމަތް މިންވަރުކޮށްދެއްވުން އެދިވަޑައިގަންނަވަމުންނެވެ.
ކިޔުންތެރިންގެ ހިޔާލު