ބ. ކުޑަރިކިލު ސްކޫލްގެ ހަތަރު ކްލާސްރޫމް އިމާރާތުގެ މަސައްކަތުގެ 55 އިންސައްތަ ނިމި، އިމާރާތުގެ ފުރަތަމަ ފަންގިފިލާގެ ރޭނުމުގެ މަސައްކަތްތައް ކުރިއަށްދާކަން އެމްޓީސީސީ) އިން ހާމަކޮށްފިއެވެ.
މި މަޝްރޫޢަކީ ކުޑަރިކިލު ސްކޫލަށް ދިމާވެފައިވާ ޖާގައިގެ ދަތިކަމަށް ހައްލެއް ހޯދައިދިނުމުގެ ގޮތުން ތަޢުލީމީ ވުޒާރާއިން އެމްޓީސީސީއާ ހަވާލުކޮށްގެން ކުރިއަށްދާ މަޝްރޫޢެކެވެ.
ކުޑަރިކިލު ސްކޫލުގެ ހަތަރު ކްލާސްރޫމް އިމާރާތްކުރުމުގެ މަސައްކަތް އެންމެ ފުރަތަމަ 23 ޖޫން 2023 ގައި ހަވާލުކުރީ ވޯލްސީ ޕްރައިވެޓް ލިމިޓެޑާއެވެ. 175 ދުވަހުގެ ތެރޭގައި ނިންމާގޮތަށް ކުރީގެ ސަރުކާރުން އެ ކުންފުންޏާ މި މަޝްރޫޢު ހަވާލުކުރީ 4.8 މިލިއަން ރުފިޔާއަށެވެ.
ނަމަވެސް އެ ކުންފުންޏަށް އެއްބަސްވުމާ އެއްގޮތަށް މަސައްކަތް ކުރިއަށް ނުގެންދެވުމުގެ ސަބަބުން، މި ސަރުކާރުން ވަނީ މި މަޝްރޫޢުގެ މަސައްކަތް އެމްޓީސީސީއާ ހަވާލުކޮށްފައެވެ.
އެމްޓީސީސީން މިހާރު ދަނީ އިމާރާތުގެ ފުރަތަމަ ފަންގިފިލާގެ ރޭނުމުގެ މަސައްކަތްތައް ހުއްޓުމެއްނެތި ކުރިއަށްގެންދަމުންނެވެ. މި މަޝްރޫޢު މުޅިން ނިމުމުން ކުޑަރިކިލު ސްކޫލުގެ ދަރިވަރުންނަށް ދިމާވެފައިވާ ޖާގައިގެ ދަތިކަމަށް ބޮޑު ހައްލެއް ލިބި، ކިޔެވުމަށް އެކަށީގެންވާ މާހައުލެއް ތަނަވަސްވެގެންދާނެއެވެ.
ކިޔުންތެރިންގެ ހިޔާލު