މޯލްޑިވްސް އިންލެންޑް ރެވެނިއު އޮޓޯރިޓީ (މީރާ) އިން ހާމަކޮށްފައިވާ މައުލޫމާތުތަކަށް ބަލާއިރު، މި ހިނގާ އަހަރުގެ ފުރަތަމަ 10 މަސްދުވަހު މުދަލު ޒަކާތުގެ ގޮތުގައި ދައުލަތަށް ބަލައިގަތް ފައިސާގެ މިންވަރު، ވޭތުވެދިޔަ އަހަރުގެ އެ މުއްދަތާ އަޅައިކިޔާއިރު 23 އިންސައްތަ މައްޗަށް ޖެހިލައިފިއެވެ.

މީރާގެ އޮކްޓޫބަރު މަހުގެ މާލީ ރިޕޯޓުގައި ފާހަގަކޮށްފައިވާ ގޮތުގައި، މި އަހަރުގެ ފުރަތަމަ 10 މަހުގެ ތެރޭގައި މުދަލު ޒަކާތުގެ ގޮތުގައި ޖުމްލަ 114.9 މިލިއަން ރުފިޔާ ދައުލަތަށް ލިބިފައިވެއެވެ. މިއީ ކުރީ އަހަރުގެ އެ މުއްދަތުގައި ލިބުނު 93.4 މިލިއަން ރުފިޔާއަށްވުރެ ބޮޑު އަދަދެކެވެ. އެހެންނަމަވެސް، ހަމައެކަނި އޮކްޓޫބަރު މަހަށް ބަލާއިރު ފެންނަނީ ކުޑަ ދަށްވުމެކެވެ؛ އެގޮތުން ވޭތުވެދިޔަ އަހަރުގެ އޮކްޓޫބަރުގައި 5.5 މިލިއަން ރުފިޔާ ލިބުނުއިރު، މި އަހަރުގެ އެ މަހު ލިބިފައިވަނީ 5.2 މިލިއަން ރުފިޔާއެވެ.

މޯލްޑިވްސް ޒަކާތު ހައުސްއިން ނެރުނު މިއަހަރުގެ ތިންވަނަ ކުއާޓަރުގެ ރިޕޯޓުތައް ދައްކާގޮތުން، އެ ތިން މަސްދުވަހުގެ ތެރޭގައި އެކަނިވެސް މުދަލު ޒަކާތުގެ ގޮތުގައި 29.86 މިލިއަން ރުފިޔާ ވަނީ ޖަމާވެފައެވެ. މިއީ 2025 ވަނަ އަހަރުގެ ތިންވަނަ ކުއާޓަރާ އަޅައިބަލާއިރު 13.9 އިންސައްތައިގެ ކުރިއެރުމެކެވެ.

އިޝްތިހާރު އިޝްތިހާރު

ޒަކާތު ހައުސްގެ ސްޓްރެޓެޖިކް ޕްލޭނުގައިވާ ގޮތުން، އެ އިދާރާގެ އަމާޒަކީ 2028 ވަނަ އަހަރުގެ މެދާ ހަމައަށްދާއިރު މުދަލު ޒަކާތުން ލިބޭ އާމްދަނީ ބޮޑުތަނުން މަތިކުރުމެވެ. މި ލަނޑުދަނޑި ހާސިލުކުރުމުގެ ބޭނުމުގައި، އަހަރަކު ލިބޭ ޖުމްލަ ޒަކާތުގެ 25 އިންސައްތައަކީ ކުންފުނިތަކާއި ވިޔަފާރިތަކުން ދައްކާ ފައިސާއަށް ހެދުމަށް ޚާއްޞަ ފިޔަވަޅުތަކެއް އަންނަނީ އަޅަމުންނެވެ. އަދި މީގެ އިތުރުން، ކޮންމެ އަހަރަކުވެސް ޒަކާތުގެ ގޮތުގައި ލިބޭ އަދަދު މަދުވެގެން 10 އިންސައްތަ އިތުރުކުރުމަކީވެސް އެ އިދާރާގެ މުހިންމު އަމާޒެކެވެ.

މުދަލު ޒަކާތަކީ މީހެއްގެ މިލްކިއްޔާތުގައި ހުރި މުދަލުގެ އަގު ނިސާބު ހަމަވެ، އެ މުދަލެއް ހުންނަތާ ފުރިހަމަ އަހަރެއް ވުމުން އޭގެ 2.5 އިންސައްތަ ނެރުން ދީނީގޮތުން ވާޖިބުވާ އަޅުކަމެކެވެ. މިވަގުތު ދިވެހިރާއްޖޭގައި މުދަލު ޒަކާތް ނެރުން ވާޖިބުވާ ނިސާބުގެ އަދަދަކީ 19،266.10 ދިވެހި ރުފިޔާއެވެ.