އީރާނުން ހުށަހަޅާފައިވާ ޝަރުތުތައް ގަބޫލުކޮށްފިނަމަ ހަތްދުވަސްތެރޭ ހޮރްމޫޒު ކަނޑުއޮޅި ހުޅުވަން ތައްޔާރަށް ތިބި ކަމަށް އީރާނުން ބުނެފިއެވެ.
ނަން ހާމަނުކުރާ އީރާނު ސަރުކާރުގެ އިސް އޮފިޝަލަކާ ހަވާލާދީ މި ޚަބަރު އާންމުކޮށްފައިވަނީ ބައިނަލްއަގްވާމީ ޚަބަރުފަތުރާ ދެ އޭޖެންސީއަކުންނެވެ.
އީރާނު ސަރުކާރުގެ އޮފިޝަލް ވިދާޅުވެފައިވަނީ، އެމެރިކާއިން އަސްކަރީ ޕްރެޝަރު ލުއިކޮށް، އީރާނުގެ ބަނދަރުތަކަށް އަޅާފައިވާ ބްލޮކޭޑް އުވާލައިފިނަމަ، އީރާނުން ހަތްދުވަސްތެރޭ ހޮރްމޫޒް ކަނޑުއޮޅި އަލުން ހުޅުވާލާނޭ ކަމަށެވެ.
އެއް ނޫސް އޭޖެންސީން ބުނެފައިވަނީ، އެމެރިކާއާއެކު މަޝްވަރާ ކުރުމަށް ކުރަމުންދާ މަސައްކަތްތައްވެސް އީރާނުން ވަރުގަދަކޮށް އިތުރު ކުރަމުންދާ ކަމަށެވެ.
އެމެރިކާއާއެކު ބާއްވާ މަޝްވަރާތަކުގައި އީރާނުގެ ފަރާތުން ބައިވެރިވެވަޑައި ގަންނަވާ އެންމެ އިސް މަންދޫބު އަދި އީރާނު ޕާލަމެންޓުގެ ރައީސް މުހައްމަދު ބާގިރު ގާލިބާފް އިހަށްދުވަހު ވިދާޅުވެފައިވަނީ، މަޝްވަރާގެ މޭޒުދޮށަށް އީރާނު އަންނާނެ ޝަރުތުތައް އެމެރިކާއަށް ހުށަހަޅާފައި ވާނޭ ކަމަށާއި، އީރާނުން ހުށަހަޅާފައިވާ ޝަރުތުތައް ފުރިހަމަވާންދެން ހޮރްމޫޒް ކަނޑުއޮޅި އޮންނާނީ ބަންދުކޮށްފައި ކަމަށެވެ.
އަނެއްކޮޅުން، އދގެ އާންމު މަޖިލީހުގެ 81 ވަނަ ޖަލްސާގައި ބައިވެރިވެވަޑައި ގަތުމަށް އީރާނުގެ ޚާރިޖީ ވަޒީރު އައްބާސް އަރަޣްޗީ މިހާރު ހުންނެވީ ނިއުޔޯކްގައެވެ. އަދި އީރާނުގެ ރައީސް ޑރ. މަސްއޫދު ޕެޒެޝްކިއާން މިހާރުވަނީ ނިއުޔޯކަށް ވަޑައިގަތުމަށްޓަކައި ތެހެރާނުން ފުރާވަޑައިގެންފައެވެ.
އީރާނުގެ ވެރިން އެމެރިކާއަށް މިވަޑައިގަންނަވަނީ، އީރާނާއި އެމެރިކާ ހަނގުރާމައިގެ ހާލަތުގައި އޮއްވައެވެ.
އެމެރިކާގެ ރައީސް ޑޮނަލްޑް ޓްރަމްޕް ބުނެފައިވަނީ، ނިއުޔޯކްގައި އީރާނުގެ ރައީސް މަސްއޫދު ޕެޒެޝްކިއަންއާ ބައްދަލުކުރަން ތައްޔާރަށް ހުރި ކަމަށެވެ. އެކަމަކު، އީރާނުގެ ރައީސް، އެމެރިކާގެ ރައީސާ ބައްދަލު ކުރައްވާނޭކަމެއް ނުވަތަ ނޫންކަމެއް ސާފެއް ނުވެއެވެ. އެކަމާ ގުޅޭގޮތުން އީރާނު ސަރުކާރުން އަދި އެއްވެސް އެއްޗެއް ބުނެފައެއް ނުވެއެވެ.
ރިޕޯޓްތައް ބުނާގޮތުގައި، އީރާނު-އެމެރިކާ ހަނގުރާމައަށް ސުލްހަވެރި ހައްލެއް ހޯދުމަށް ދެފަރާތް އެއްމޭޒުދޮށަށް ގެނައުމަށް ގިނަ ގައުމުތަކުން ގެންދަނީ މަސައްކަތް ކުރަމުންނެވެ. އޭގެ ތެރޭގައި ޕާކިސްތާނުވެސް ހިމެނެއެވެ.
އެގޮތުން، އދގެ އާންމު މަޖިލީހުގެ ޖަލްސާގެ އަރިމަތިން އެމެރިކާއާއި އީރާނުގެ ވެރިންގެ ބައްދަލުވުމެއް ބޭއްވޭތޯ ގެންދަނީ ބުރަ މަސައްކަތްތަކެއް ކުރަމުންނެވެ.
މީޑިއާ ރިޕޯޓްތައް ބުނާގޮތުގައި، އެމެރިކާއާއެކު ޑިޕްލޮމެސީ އާލާކުރުމުގެ ފުރިހަމަ ބާރު، އދގެ އާންމު މަޖިލީހުގެ ޖަލްސާއަށްދާ އީރާނުގެ ވަފުދަށް ލިބިގެންވެއެވެ.
ކިޔުންތެރިންގެ ހިޔާލު